ເຈົ້າແຂວງໄຊສົມບູນ ລົງຕິດຕາມ, ກວດກາ ແລະ ໂຄງການກໍ່ສ້າງຫໍຫຼັກເມືອງ ແລະ ໂຄງການກໍ່ສ້າງປ້ອງກັນຕາຝັ່ງເຈື່ອນ ແລະ ພັດທະນາແຄມນໍ້າຈັ້ງ ໄລຍະທີ 2

ເຈົ້າແຂວງໄຊສົມບູນ ລົງຕິດຕາມ, ກວດກາ ແລະ ໂຄງການກໍ່ສ້າງຫໍຫຼັກເມືອງ ແລະ ໂຄງການກໍ່ສ້າງປ້ອງກັນຕາຝັ່ງເຈື່ອນ ແລະ ພັດທະນາແຄມນໍ້າຈັ້ງ ໄລຍະທີ 2

October 27, 2022 0 By MC

ໃນຕອນບ່າຍຂອງວັນທີ 26 ຕຸລາ 2022 ນີ້ ທ່ານ ພອຍຄໍາ ຮຸ່ງບຸນຍວງ ເຈົ້າແຂວງໄຊສົມບູນ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມ, ກວດກາ ໂຄງການກໍ່ສ້າງຫໍຫຼັກເມືອງ ແລະ ໂຄງການກໍ່ສ້າງປ້ອງກັນຕາຝັ່ງເຈື່ອນ ແລະ ພັດທະນາແຄມນໍ້າຈັ້ງ ໄລຍະທີ 2 ໂດຍສະເພາະ ໜ້າວຽກກໍ່ສ້າງສວນສາທາລະນະ, ຊຶ່ງມີທ່ານ ໄຜ ສີສະເກດ ຮອງປະທານບໍລິສັດ ສີສະເກດກໍ່ສ້າງຂົວ-ທາງ ແລະ ຊົນລະປະທານ ຈໍາກັດ ພ້ອມດ້ວຍບໍລິສັດທີ່ປຶກສາ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.


ໂອກາດດັ່ງກ່າວ ທ່ານເຈົ້າແຂວງໄຊສົມ ບູນ ພ້ອມດ້ວຍຄະນະ ໄດ້ຮັບຟັງລາຍງານການຈັດຕັ້ງປະຕິບັດວຽກງານຂອງສອງໂຄງການ ເປັນຕົ້ນແມ່ນວຽກງານທີ່ທາງສອງບໍລິສັດຮັບເໝົາກໍາລັງສຸມໃສ່ຈັດຕັ້ງປະຕິບັດ ຄື: ສວນຫໍຫຼັກເມືອງ ຂອງໂຄງ ການກໍ່ສ້າງຫໍຫຼັກເມືອງ ບໍລິສັດກໍາລັງສຸມໃສ່ຈັດຕັ້ງປະຕິບັດວຽກປັບໜ້າເດີ່ນ, ປູກຫຍ້າ, ກໍ່ສ້າງຮ່ອງລະບາຍນໍ້າເສຍ ແລະ ກໍ່ສ້າງຫ້ອງນໍ້າສາທາລະນະ. ສໍາລັບ ວຽກກໍ່ສ້າງສວນສາທາລະນະຖໍ້າເຈົ້າອະນຸວົງ ແລະໂຄງ ການກໍ່ສ້າງປ້ອງກັນຕາຝັ່ງເຈື່ອນ ແລະ ພັດທະນາແຄມນໍ້າຈັ້ງ ໄລຍະທີ 2, ບໍລິສັດກໍລັງສຸມໃສ່ການປັບປຸງທາງຍ່າງເຂົ້າໄປໃນຖໍ້າ, ຕິດຕັ້ງປ້າຍຕ່າງໆ, ກໍ່ສ້າງ ແລະ ປັບ ປຸງສະຖານທີ່ຈອດລົດ, ປູກຫຍ້າ; ປູກຕົ້ນໄມ້ໃຫ້ໝາກ; ປູກດອກໄມ້ ແລະ ຕົ້ນ ໄມ້ປະດັບ ລຽບຕາມສອງຝາກທາງ ແລະ ພື້ນທີ່ຕ່າງໆ ທີ່ເໝາະສົມ, ວຽກຫຼໍ່ທອງ, ວຽກລົງສີ ແລະ ຈອດຕໍ່ຂັດແຕ່ງ ຮູບປັ້ນຫຼໍ່ເຈົ້າອະນຸວົງ, ວຽກອະນາໄມ ແລະ ອື່ນໆ.

 

ຊຶ່ງໂອກາດທີ່ລົງ ຕິດຕາມໂຄງການໃນຄັ້ງນີ້ ທ່ານ ພອຍຄໍາ ຮຸ່ງບຸນຍວງ ໄດ້ເນັ້ນໜັກໃຫ້ພາກສ່ວນທີ່ກ່ຽວ ຂ້ອງ ກໍຄືບໍລິສັດຮັບເໝົາ ຈົ່ງສືບຕໍ່ເອົາໃຈໃສ່ຮີບຮ້ອນຈັດຕັ້ງປະຕິບັດບັນດາໜ້າວຽກຂອງຕົນໃຫ້ສໍາເລັດພາຍໃນເດືອນ ພະຈິກ 2022 ນີ້ ກໍຄືຕ້ອງໃຫ້ສໍາເລັດກ່ອນພິທີສົມໂພດຫໍຫຼັກເມືອງ, ສົມໂພດຮູບປັ້ນຫຼໍ່ເຈົ້າອະນຸວົງ ຕິດພັນກັບບັນດາກິດຈະກໍາສົ່ງເສີມການທ່ອງທ່ຽວ ທີ່ແຂວງໄຊສົມບູນ ກໍາລັງກະກຽມຈະຈັດຂຶ້ນໃນທ້າຍປີ 2022 ນີ້ ເພື່ອຮັບປະກັນໃຫ້ສະຖານທີ່ດັ່ງກ່າວມີຄວາມສວຍງາມ ທັງເປັນສະຖານທີ່ທ່ອງທ່ຽວ ແລະ ອອກກໍາລັງກາຍ ໃຫ້ເປັນຈຸດດຶງດູດນັກທ່ອງ ທ່ຽວທັງພາຍໃນ ແລະ ຕ່າງປະເທດ ໃຫ້ເຂົ້າມາທ່ຽວຊົມ ແຂວງໄຊສົມບູນ ໃຫ້ນັບມື້ຫຼາຍຂຶ້ນເລື້ອຍໆ.


ພາບຂ່າວ: ພາພອນ ນະວົງໄຊ