ການນຳແຂວງ ໄຊຍະບູລີ ມອບເຄື່ອງໃຫ້ຜູ້ປະສົບໄພໜາວຢູ່ເມືອງ ໄຊສະຖານ ມູນຄ່າເກືອບ 100 ລ້ານກີບ

ການນຳແຂວງ ໄຊຍະບູລີ ມອບເຄື່ອງໃຫ້ຜູ້ປະສົບໄພໜາວຢູ່ເມືອງ ໄຊສະຖານ ມູນຄ່າເກືອບ 100 ລ້ານກີບ

9th December 2019 0 By Admin

2-3 ມື້ຜ່ານມາ, ອາກາດໜາວຫຼາຍ ປະຊາຊົນໃນແຕ່ລະແຕ່ລະພາກປະສົບກັບໄພໜາວ ໂດຍສະເພາະ ປະຊາຊົນ ທີ່ອາໄສຢູ່ບັນດາເຂດພູສູງ, ຮ່ອມພູ, ເຂດພູດອຍ ອຸນຫະພູມຫຼຸດລົງເຖິງຂັ້ນຕິດລົບ, ສ່ວນບາງທ້ອງຖິ່ນມີນໍ້າໝອກກ້າມໃນຕອນເຊົ້າ. ເຊັ່ນດຽວກັນກັບແຂວງ ໄຊຍະບູລີ ກໍ່ເປັນແຂວງໜຶ່ງ ໂດຍສະເພະາແມ່ນປະຊາຊົນພາຍໃນເມືອງ ໄຊສະຖານໄດ້ຮັບຜົນກະທົບຈາກໄພໜາວ. ສະນັ້ນ, ເພື່ອເປັນການຊ່ວຍເຫຼືອບັນເທົາໜາວ ການນຳແຂວງ ໄຊຍະບູລີ ໄດ້ລົງມອບເຄື່ອງຊ່ວຍເຫຼືອຈຳນວນໜຶ່ງ ແກ່ພໍ່ແມ່ປະຊາຊົນ ເພື່ອຕ້ານໄພໜາວ.

ໃນວັນທີ 8 ທັນວາ 2019 ນີ້, ການນໍາແຂວງໄຊຍະບູລີ ນໍາໂດຍ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ພ້ອມດ້ວຍບັນດາຫົວໜ້າ, ຮອງຫົວໜ້າພະແນກການອ້ອມຂ້າງແຂວງ ແລະບໍລິສັດຈໍາປາຄໍາ ໄດ້ນໍາເອົາເຄື່ອງຊ່ວຍເຫຼືອບັນເທົາໜາວ ມອບໃຫ້ແກ່ຄອບຄົວທຸກຍາກ ເມືອງໄຊຊະຖານ, ແຂວງໄຊຍະບູລີ, ໃຫ້ການຕ້ອນຮັບໂດຍທ່ານ ກອງສີ ວົງສີ ເຈົ້າເມືອງ ໄຊຊະຖານ.

ເຄື່ອງບັນເທົາໜາວທີ່ນໍາມາມອບຄັ້ງນີ້ປະກອບມີ: ຜ້າຫົ່ມ, ຜ້າຊົວ, ສົ້ງ-ເສື້ອກັນໜາວເດັກ ແລະ ຜູ້ໃຫຍ່, ຜ້າພັນຄໍ ແລະ ອຸປະກອນການຮຽນ-ການສອນຈໍານວນໜຶ່ງ ລວມມູນຄ່າທັງໝົດເກືອບ 100 ລ້ານກີບ, ໂດຍໄດ້ມອບຢູ່ 3 ຈຸດຄື: ຈຸດກຸ່ມບ້ານສະແມດໃຫຍ່, ຈຸດກຸ່ມບ້ານ ກໍ່-ສະປິ ແລະຈຸດບ້ານປາກລອງ, ນອກນີ້ ຍັງໄດ້ນໍາເອົາເຄື່ອງອຸປະໂພກ-ບໍລິໂພກ ເປັນຕົ້ນແມ່ນອາຫານແຫ້ງ ມອບໃຫ້ແກ່ອ້າຍນ້ອງທະຫານ ທີ່ປະຕິບັດໜ້າທີ່ປ້ອງກັນຊາຍແດນ, ໂດຍແມ່ນ ທ່ານ ພົງສະຫວັນ ສິດທະວົງ, ເຈົ້າແຂວງ ໄຊຍະບູລີ, ພ້ອມດ້ວຍທີມງານໃຫ້ກຽດມອບ ແລະ ນຸ່ງເຄື່ອງກັນໜາວໃຫ້ເດັກນ້ອຍ.

ທັງນີ້, ກໍ່ເພື່ອເຮັດໃຫ້ກຸ່ມຄົນທີ່ທຸກຍາກໃນຂອບເຂດທົ່ວເມືອງດັ່ງກ່າວ ໂດຍສະເພາະແມ່ນຜູ້ເຖົ້າ ແລະເດັກນ້ອຍທີ່ມີພູມຕ້ານທານຕໍ່າ, ເພາະເມືອງດັ່ງກ່າວຍັງມີຄອບຄົວທຸກຍາກປະມານ 920 ກວ່າຄອບຄົວ, ເປັນເຂດທີ່ມີຄວາມສູງຈາກລະດັບໜ້ານໍ້າທະເລ 1.300 ກວ່າກິໂລແມັດ, ມີອາກາດໜາວຈັດ ແລະ ມີລົມພັດແຮງຕະຫລອດປີ. ພ້ອມກັນນີ້, ໃຫ້ພໍ່ແມ່ປະຊາຊົນຈົ່ງພ້ອມກັນເອົາໃຈໃສ່ເບິ່ງແຍງສຸຂະພາບໃຫ້ດີ, ໂດຍສະເພາະແມ່ນຜູ້ເຖົ້າ ແລະ ເດັກນ້ອຍ ເພື່ອຫຼີກລ່ຽງຈາກການເຈັບປ່ວຍ.

ທີ່ມາ: ຂປລ