ຊອກລັກຊັບພົນລະມືອງມາຫຼາຍເທື່ອແລ້ວ  ເທື່ອນີ້ໄປບໍ່ລອດ ຖືກເຈົ້າໜ້າກັກຕົວໄດ້

ຊອກລັກຊັບພົນລະມືອງມາຫຼາຍເທື່ອແລ້ວ ເທື່ອນີ້ໄປບໍ່ລອດ ຖືກເຈົ້າໜ້າກັກຕົວໄດ້

3rd December 2019 0 By Admin

ເຈົ້າໜ້າທີ່ຕຳຫຼວດໝ່ວຍງານວິຊາສະເພາະຄະດີອາຍາ-ເສດຖະກິດ ປກສ ເມືອງໂພນໂຮງ ແຂວງວຽງຈັນ ໄດ້ຮັບແຈ້ງຄວາມຈາກພົນລະເມືອງດີວ່າມີກຸ່ມຄົນບໍ່ດີເຂົ້າລັກຊັບພົນລະເມືອງ ຈາກນັ້ນເຈົ້າໜ້າທີ່ຈຶ່ງລົງຕິດຕາມເປົ້າໜາຍ ຢູ່ຂອບເຂດ ບ້ານເຕົາຖ່ານ ເມືອງໂພນໂຮງ ແຂວງວຽງຈັນ ສາມາດກັກຕົວຜູ້ຖືກຫາລັກຊັບພົນລະເມືອງ (ລັກເຫຼັກ) ໄດ້ໜຶ່ງຄົນຊື່ ທ້າວ ກະຕ່າຍ ອາຍຸ 30 ປີ ອາຊີບ ຊາວນາ ຢູ່ບ້ານເຕົາຖ່ານ ເມືອງໂພນໂຮງ ແຂວງວຽງຈັນ ໃນຄັ້ງວັນທີ 10 ຕຸລາ 2019 ພ້ອມເກັບກູ້ຂອງກາງເຫຼັກ ມາດໍາເນີນການສືບສວນ – ສອບສວນ.

ຜ່ານການສືບສວນ-ສອບສວນ ຂອງເຈົ້າໜ້າທີ່ຕຳຫຼວດໝ່ວຍວິຊາສະເພາະຄະດີອາຍາ-ເສດຖະກິດ ປກສ ເມືອງໂພນໂຮງ ແຂວງວຽງຈັນ ທ້າວ ກະຕ່າຍ ໄດ້ໃຫ້ການຮັບສາລະພາບວ່າ ໄດ້ຮ່ວມກັນຫຼາຍຄົນ ໃນຄັ້ງວັນທີ 16 ຕຸລາ 2019 ເວລາ 22 ໂມງ ພວກກ່ຽວແມ່ນໄດ້ລອດຮາວຮົ້ວເຫຼັກໜາມໝາກຈັບ ເຂົ້າໄປໃນບໍລິເວນຫຼັງເດີ່ນບານເຕະບ້ານເຕົ່າຖານ ເມືອງໂພນໂຮງ ແຂວງວຽງຈັນ ຈຸດປະສົງແມ່ນຈະເຂົ້າໄປລັກເອົາເຫຼັກທີ່ຢູ່ເດີ່ນບານເຕະດັ່ງກ່າວ ເຫຼັກທີ່ພວກກ່ຽວລັກໄປນັ້ນແມ່ນໄດ້ໄປລັກເທ່ື່ອລະໜ້ອຍ ເຫຼັ້ກທີ່ພວກກ່ຽວລັກນັ້ນມີ ເຫຼັກໂຄງຫຼັງຄາເກົ່າ ທີມີຫຼາຍຂະໜາດ, ຫຼາຍຮູບແບບ ແລະ ມີຄວາມຍາວ ແຕ່ 1 ແມັດ ຫາ 6 ແມັດ, ມີ ໂມ້ປູນເກົ່າຈຳນວນ 2 ໜ່ວຍ ລວມນໍ້າໜັກຂອງເຫຼັກທີ່ພວກກ່ຽວລັກໄປນັ້ນປະມານ 2 ໂຕນ.

ທ້າວ ກະຕ່າຍ ຍັງໃຫ້ການຮັບສາລະພາບອີກວ່າ ໃນໄລຍະຜ່ານມາຜູ້ກ່ຽວໄດ້ລັກເອົາເຫຼັກຢູ່ສະຖານທີ່ດັ່ງກ່າວມາແລ້ວປະມານ 25-30 ຄັ້ງ ໄປລັກແຕ່ລະຄັ້ງແມ່ນໄດ້ຮ່ວມກັບຜູ້ຂະບວນການນໍາກັນ ພາຍຫຼັງລັກໄດ້ແລ້ວ ກໍ່ເອົາໄປຂາຍໃຫ້ຮ້ານຊື້ຂາຍເຫຼັກເສດຢູ່ທີ່ບ້ານເຕົາຖ່ານ ເມືອງ ໂພນໂຮງ ແຂວງວຽງຈັນ ເອົາໄປຂາຍໃນລາຄາກິໂລລະ 1,500 ກີບ ແຕ່ລະຄັ້ງໄດ້ເງີນປະມານ 40,000 ຫາ 50,000 ກີບ ເງີນທີ່ໄດ້ມາຈາກການຂາຍເຫຼັກ ແມ່ນໄດ້ແບ່ງກັນ ແລະ ຊື້ຢາບ້າມາເສບໝົດ ແຕ່ຄັ້ງນີ້ໄປບໍ່ລອດມີຄົນພົບເຫັນກ່ອນຈຶ່ງໄດ້ຈັບຕົວສົ່ງໃຫ້ເຈົ້າໜ້າທີ່ມາດຳເນີນຄະດີຕາມລະບຽບກົດໝາຍ ສ່ວນຜູ້ຮ່ວມຂະບວນການແມ່ນໄດ້ເອົາຕົວລົບໜີ ປະຈຸບັນເຈົ້າໜ້າທີ່ຕຳຫຼວດກໍ່ໄດ້ເລັ່ງຕິດຕາມຜູ້ຮ່ວມຂະບວນການມາລົງໂທດຕາມລະບຽບກົດໝາຍຂອງບ້ານເມືອງ.

ຜ່ານການສືບສວນ-ສອບສວນເຈົ້າໜ້າທີ່ຕຳຫຼວດວໜ່ວຍງານວິຊາສະເພາະຄະດີອາຍາເຫັນວ່າ: ທ້າວ ກະຕ່າຍ ແມ່ນມີເຈດຕະນາເຄື່ອນໄຫວລັກຊັບຜົນລະເມືອງຢ່າງແທ້ຈິງ ເຊິ່ງການກະທຳດັ່ງກາວແມ່ນໄດ້ສ້າງຄວາມເສຍຫາຍໃຫ້ແກ່ບຸກຄົນ, ເຮັດໃຫ້ສັງຄົມບໍ່ມີຄວາມເປັນລະບຽບຮຽບຮ້ອຍ ແລະ ຜິດຕໍ່ກົດໝາຍອາຍາມາດຕາ 231 ໃນສະຖານການລັກຊັບພົນລະເມືອງ.

ແລະ ໃນວັນດຽວກັນນັ້ນທາງເຈົ້າໜ້າທີ່ຕຳຫຼວດໝ່ວຍງານວິຊາສະເພາະຄະດີອາຍາ-ເສດຖະກິດ ປກສ ເມືອງໂພນໂຮງ ໄດ້ຈັດພິທີມອບ-ຮັບຊັບຄືນເຈົ້າຂອງເດີມ ທ່ານ ຮທ ສົມໃຈ ລ້ວນພູວົງ ຕາງໜ້າໝ່ວຍງານວິຊາສະເພາະຄະດີອາຍາ-ເສດຖະກິດກ່າວມອບ, ທ່ານ ເພັດດຳຄຳມິວົງວິຈິດ ຕາງໜ້າບໍລິສັດບຸນໂຮມກໍ່ສ້າງຂົວທາງ ກ່າວຮັບ ພ້ອມດ້ວຍພະນັກງານ-ນັກຮົບເຂົາຮ່ວມເປັນສັກຄີພະຍານ ໂອກາດດຽວກັນນີ້ເຈົ້າຂອງຊັບກໍ່ໄດ້ສະແດງຄວາມຂອບອົກຂອບໃຈມາຍັງເຈົ້າໜ້າທີ່ຕຳຫຼວດ ທີ່ໄດ້ເອົາໃຈໃສ່ປະຕິບັດໜ້າທີ່ວຽກງານຈົນສາມາດເກັບກູ້ເຄື່ອງຂອງກາງຈຳນວນດັ່ງກ່າວຄືນມາໄດ້ ເຈົ້າໜ້າທີ່ຕໍາຫຼວດຍັງໄດ້ຮຽກຮ້ອງໃຫ້ເຈົ້າຂອງຊັບຈົ່ງເອົາໃຈໃສ່ໃນການປົກປັກຮັກສາວັດຖຸສິງຂອງທີ່ມີຄ່າໄວ້ໃຫ້ດີເພື່ອບໍ່ໃຫ້ຄົນບໍ່ດີສວຍໂອກາດລັກຊັບຂອງທ່ານ.

 

ຂ່າວ ປກສ ແຂວງວຽງຈັນ