ສາທຸ..!!!​ ສຳເລັດໂຄງການ ທຳມະຍາດຕາ 5 ແຜ່ນດິນລຸ່ມແມ່ນໍ້າຂອງ

ສາທຸ..!!!​ ສຳເລັດໂຄງການ ທຳມະຍາດຕາ 5 ແຜ່ນດິນລຸ່ມແມ່ນໍ້າຂອງ

31st October 2019 0 By Lao Admin

ໃນວັນທີ 30 ຕຸລາ 2019 ນີ້ໄດ້ມີພິທີປິດໂຄງການ ທຳມະຍາດຕາ 5 ແຜ່ນດິນລຸ່ມແມ່ນໍ້າຂອງ ຢູ່ ຣາຊະອານາຈັກ ກຳປູເຈຍ, ພາຍຫລັງດຳເນີນມາເປັນເວລາ 17 ມື້ ໂດຍມີ ສົມເດັດອັກຄະຣະມາຫາສັງຄະຣາຊາ ເທບວົງ ແຫ່ງ ຣາຊະອານາຈັກ ກຳປູເຈຍ ເປັນປະທານຝ່າຍສົງ ແລະ ສົມເດັດ ພິໄຊເສນາ ພົນເອກ ເຕຍບັນ ຮອງນາຍົກລັດຖະມົນຕີ ແລະ ລັດຖະມົນຕີ ກະຊວງປ້ອງກັນປະເທດ ແຫ່ງ ຣາຊະອານາຈັກ ກຳປູເຈຍ ເປັນປະທານ ຝ່າຍຄາລະວາດ, ຝ່າຍລາວມີ ທ່ານ ສົມອົກ ກິ່ງສະດາ ຮອງປະທານສູນກາງແນວລາວສ້າງຊາດ ແລະ ພາກສ່ວນກ່ຽວຂ້ອງເຂົ້າຮ່ວມ.


ໂຄງການທຳມະຍາດຕາ 5 ແຜ່ນດິນ ລຸ່ມແມ່ນໍ້າຂອງຄັ້ງທີ 2 ນີ້ໄດ້ດຳເນີນກິດຈະກຳທາງພຸດທະສາສະໜາ ເຊິ່ງເລີ່ມແຕ່ວັນທີ 14-30 ຕຸລາ 2019 ໄດ້ມີພິທີເປີດ ທີ່ວັດພະທາດຜາເງົາ ເມືອງຊຽງແສນ ແຂວງຊຽງລາຍ ປະເທດໄທ ໃນວັນທີ 15 ຕຸລາ 2019 ໂດຍມີພະສົງແລະ ພຸດທະສາສະນິກະຊົນ ຂອງປະເທດລາວ, ໄທ, ຫວຽດນາມ, ກຳປູເຈຍ ແລະ ມຽນມາ ເຂົ້າຮ່ວມ. ຂະບວນທຳມະຍາດຕາຄັ້ງນີ້ໄດ້ເຄື່ອນໄຫວກິດຈະກຳຕ່າງໆຢູ່ຕາມວັດ ແລະ ສະຖານທີ່ສຳຄັນທາງສາສະໜາຂອງແຕ່ລະປະເທດ ເປັນຕົ້ນ ແມ່ນໃສ່ບາດ, ປູກຕົ້ນພະສີມະຫາໂພ ຫລື ຕົ້ນໂພ, ຢ້ຽມຊົມສະຖານທີ່ສຳຄັນທາງສາສະໜາ ແລະ ວັດທະນະທຳ, ສູດມົນ ແລະ ສະແດງທຳ, ປະຕິບັດກຳມະຖານ ແລະ ອື່ນໆ,

 

ພາຍຫລັງເປີດພິທີທາງການ ຄະນະດັ່ງກ່າວ ໄດ້ໄປວັດພະທາດສາຍເມືອງ ເມືອງທ່າຂີ້ເຫລັກ, ວັດພະທາດມະຫາມຸນີ, ໂຮງຮຽນຫົວຂ່ວງປະລິຍະຕິທຳ ທີ່ພວມກໍ່ສ້າງເປັນໂຮງຮຽນສົງ, ວັດພະທາດຈອມຄຳ, ວັດຊຽງຢືນ ເມືອງຊຽງຕຸງ ປະເທດມຽນມາ; ເດີນທາງໄປ ວັດຫລິນກວາງ, ວັດຫລິ່ນເຊີນ, ຢ້ຽມຊົມສານເຈົ້າແຖນບານຟູ, ສູດອຸທິດສ່ວນກຸສົນແກ່ຜູ້ເສຍຊີວິດໃນສົງຄາມດຽນບຽນຟູ ຢູ່ພິພິທະພັນດຽນບຽນຟູ ສສ ຫວຽດນາມ; ທັດສະນະສຶກສາສະຖານທີ່ສຳຄັນຢູ່ນະຄອນຫລວງພະບາງ, ວັດຊຽງທອງ, ວັດວິຊຸນນະຣາດ ຫລື ພະທາດໝາກໂມ, ວັດຜາໂອ ເຊິ່ງມີໂຮງຮຽນພະປາຣິຍັດທຳ; ຢູ່ນະຄອນຫລວງວຽງຈັນ ໄດ້ມີພິທີຕ້ອນຮັບຢ່າງເປັນທາງການຢູ່ວັດພະທາດຫລວງ ແລະ ໄປຢ້ຽມຊົມສະຖານທີ່ສຳຄັນທາງສາສະໜາ ເຊັ່ນ ປະຕູໄຊ, ຫໍພະແກ້ວ, ວັດສີສະເກດ ໄດ້ສະແດງທຳ ແລະ ຈະເລີນກຳມະຖານທີ່ວັດອົງຕື້; ເດີນທາງຈາກນະຄອນຫລວງວຽງຈັນ ໄປ ວັດປ່າ (ວັງນາຄິນ) ຄຳສະໂໜດ ພ້ອມຊົມສິລະປະວັດທະນະທຳທ້ອງຖິ່ນ ແຂວງອຸດອນທານີ, ວັດພະທາດເຊິງຊຸມວໍລະວິຫານ ແຂວງສະກົນນະຄອນ, ຢ້ຽມຊົມໂບດເຈດີ ແລະ ສິລະປະວັດຖຸໃນວັດມະຫາທາດ, ຢ້ຽມຊົມຊຸມຊົນຊາວໄທເຊື້ອຊາຍຫວຽດນາມ ແລະ ບ້ານ ປະທານໂຮ່ຈີມິງແຂວງນະຄອນພະນົມ, ສູດບູຊາພະທາດພະນົມວໍລະວິຫານ, ຢ້ຽມຊົມອະນຸສາວະລີພະຍາສີສັດຕະນະຄະລາດ ແລະ ເດີນທາງໄປຣາຊະອານາຈັກ ກຳປູເຈຍ ເພື່ອດຳເນີນພິທີປິດໂຄງການຢູ່ບໍລິເວນສານຫລັກເມືອງ ແຂວງສຽມລຽບ ເຊິ່ງມີໄລຍະທາງ 2.000 ກວ່າກິໂລແມັດ.

ພາຍຫລັງສຳເລັດພິທີປິດໂຄງການຢ່າງເປັນທາງການ ຂະບວນທຳມະຍາດຕາ 5 ແຜ່ນດິນ ໄດ້ເດີນທາງໄປທີ່ ຜາສາດບາ ຍອນ ສູດມົນຖວາຍເປັນພະກຸສົນແດ່ພະເຈົ້າໄຊຍະວໍລະມັນ ທີ 7 ແລະ ໄປທັດສະນະສຶກສາທີ່ຜາສາດນະຄອນວັດ, ຫລັງຈາກນັ້ນ ໃນວັນທີ 31 ຕຸລາ 2019 ຜູ້ເຂົ້າຮ່ວມໂຄງການດັ່ງກ່າວ ຕ່າງກໍ່ໄດ້ເດີນທາງກັບຄືນປະເທດຂອງຕົນດ້ວຍຄວາມສະຫວັດດີພາບ.

ຂ່າວ-ພາບ: ວີລະວັນ