ໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມ ພ້ອມທີ່ຈະເກັບນໍ້າເຂົ້າອ່າງ ເພື່ອທຳການທົດລອງຜະລິດກະແສໄຟຟ້າ

ໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມ ພ້ອມທີ່ຈະເກັບນໍ້າເຂົ້າອ່າງ ເພື່ອທຳການທົດລອງຜະລິດກະແສໄຟຟ້າ

31st August 2020 0 By Admin

ວັນທີ 26 ສິງຫາ 2020 ຜ່ານມາ, ຫົວໜ້າ ໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມ ພ້ອມດ້ວຍຫົວໜ້າ #ບໍລິສັດຜູ້ຮັບເໝົາກໍ່ສ້າງ ໄດ້ພ້ອມກັນສໍາຫຼວດຄືນຄວາມພ້ອມໃນການກັກເກັບນໍ້າເຂົ້າອ່າງ; ເຊິ່ງຜ່ານມາ ກໍໄດ້ມີການກວດກາທາງວຽກງານເຕັກນິກຕາມຂັ້ນຕອນເປັນແຕ່ລະໄລຍະ ໂດຍໃນທ້າຍເດືອນກໍລະກົດ 2020 ຜ່ານມານີ້, ທາງຄະນະກຳມະການກວດກາເຕັກນິກຂັ້ນແຂວງ ໆເຊກອງໄດ້ລົງມາຕິດຕາມ, ກວດກາການກໍ່ສ້າງ ແລະ ຄວາມພ້ອມດ້ານເຕັກຂອງການກໍ່ສ້າງເຂື່ອນ ເປັນທີ່ຮຽບຮ້ອຍແລ້ວ; ເຊິ່ງມາຮອດຈຸບັນນີ້ ມີຄວາມພ້ອມແລ້ວ ທີ່ຈະກັກເກັບນໍ້າ ເພື່ອນໍາໃຊ້ເຂົ້າໃນການຜະລິດກະແສໄຟຟ້າ ອອກຮັບໃຊ້ສັງຄົມ.


ທ່ານ ຫຼິວຢູຢິນ ( Liu YOUYIN ) ຫົວໜ້າໂຄງການຂອງບໍລິສັດ ຊາຍນາເກີໂຈບາກຼຸບ ( CHINA GEZHOUBA GROUP CO.LTD ) ຜູ້ຮັບເໝົາກໍ່ສ້າງ ເຂື່ອນໄຟຟ້າຫ້ວຍລໍາພັນຕອນລຸ່ມ ໄດ້ລາຍງານວ່າ: ເຂື່ອນໄຟຟ້າຫ້ວຍລໍາພັນຕອນລຸ່ມ ນີ້ ມີທີ່ຕັ້ງຢູ່ #ບ້ານລະວີລໍາພັນ ເມືອງລະມາມ ແຂວງເຊກອງ, ເຊິ່ງໂຄງການນີ້ປະກອບມີ 4 ໜ້າວຽກໃຫຍ່ຄື:

ວຽກກໍ່ສ້າງ, ວຽກໄຟຟ້າ-ກົນຈັກ, ວຽກສາຍສົ່ງ ແລະວຽກສິ່ງແວດລ້ອມ; ໂດຍໂຄງການນີ້ ມີກໍາລັງຕິດຕັ້ງ 15 ເມກາວັດ, ໂດຍປະກອບມີໜ່ວຍປັ່ນໄຟ 02 ໜ່ວຍ ແລະຈະສາມາດຜະລິດກະແສໄຟຟ້າໄດ້ 68,31 ລ້ານກິໂລວັດໂມງຕໍ່ປີ, ໂຄງການນີ້ຍັງປະກອບມີໜ້າວຽກຍ່ອຍຄື: ຕົວເຂື່ອນ(Dam) ຍາວ 492 ແມັດ, ສູງ 55 ແມັດ, ສັນເຂື່ອນກວ້າງ 5 ແມັດ, ປະເພດຕົວເຂື່ອນ ເປັນເຂື່ອນດິນຫນຽວເນື້ອດຽວ, ລະດັບສັນເຂື່ອນ 202 ແມັດ, ທຽບໃສ່ລະດັບນໍ້າທະເລ; ອຸໂມງສົ່ງນໍ້າ(Headrace Tunnel); ອຸໂມງອ່ວຍນໍ້າ(Diversion Tunnel) ຍາວ 255 ແມັດ; ທໍ່ສົ່ງນໍ້າເຂົ້າເຮືອນຈັກ(Penstock ); ເຮືອນຈັກ(Powerhouse);

ສາຍສົ່ງ 01 ວົງຈອນ ມີຄວາມຍາວ 10 ກມ; ການກໍ່ເສັ້ນທາງ ມີຄວາມຍາວ 10 ກມ; ບ້ານພັກຖາວອນ ຂອງພະນັກງານວິຊາການປະຈໍາເຂື່ອນ 4 ຫຼັງ, ສະໂມສອນ 1 ຫຼັງ, ຫ້ອງການ 1 ຫຼັງ ແລະ ປ້ອມຍາມ 1 ຫຼັງ, ໂດຍແມ່ນບໍລິສັດ ຊາຍນາເກີໂຈບາກຼຸບ ຈໍາກັດ ( CHINA GEZHOUBA GROUP CO.LTD ) ເປັນຜູ້ຮັບເໝົາກໍ່ສ້າງ, ດ້ວຍຮູບແບບການກໍ່ສ້າງ ແບບ EPC Contract, ກໍານົດການກໍ່ສ້າງແມ່ນ 36 ເດືອນ, ໃນມູນຄ່າ 48,23 ລ້ານໂດລາສະຫາລັດ.


ໃນຂະນະທີ່ ທ່ານ ບຸນໂຮມ ຜິວລາລິນ ຫົວໜ້າໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມ ໄດ້ລາຍງານວ່າ: ບັນດາໜ້າວຽກຂອງການກໍ່ສ້າງທັງຫມົດ ລວມມີ: ການກໍ່ສ້າງຕົວເຂື່ອນດີນ, ປະຕູສົ່ງຂອງທໍ່ນໍ້າ, ປະຕູລະບາຍນໍ້າລົ້ນ,ເຮືອນຈັກ, ລານໄຟ ແລະອື່ນໆ, ເຊິ່ງມາຮອດປະຈຸບັນ ແມ່ນກໍ່ສ້າງສໍາເລັດເກືອບ 100%ແລ້ວ, ຄາດຄະເນວ່າອາດຈະໄດ້ກັກເກັບນໍ້າເຂົ້າອ່າງ ໃນມໍ່ໆນີ້ ເພື່ອນໍາໃຊ້ນໍ້າດັ່ງກ່າວເຂົ້າໃນການຜະລິດກະແສໄຟຟ້າ ໃນຂັ້ນທົດລອງ ແລະ ກ້າວໄປສູ່ການຜະລິດຢ່າງເຕັມຮູບແບບ.

ຂ່າວເຊກອງ, ຂ່າວ: ພຸດທະສອນ