ດີ​ສຸດໆ! ໂຄງການທົດລອງແກ້ໄຂຄວາມທຸກຍາກລາວ-ຈີນ ໄດ້ພັດທະນາຫຼາຍຢ່າງໃຫ້ ບ້ານຊໍ້ ​

ດີ​ສຸດໆ! ໂຄງການທົດລອງແກ້ໄຂຄວາມທຸກຍາກລາວ-ຈີນ ໄດ້ພັດທະນາຫຼາຍຢ່າງໃຫ້ ບ້ານຊໍ້ ​

30th August 2020 0 By Admin

ປັດຈຸບັນ ໂຄງການທົດລອງຮ່ວມມືແກ້ໄຂຄວາມທຸກຍາກລາວ-ຈີນ (ຄທລຈ) ໄດ້ກໍ່ສ້າງພື້ນຖານໂຄງລ່າງ ແລະສິ່ງອໍານວຍຄວາມສະດວກຫຼາຍດ້ານ ສໍາເລັດເກືອບ 100% ຂອງ(ຄທລຈ) ໃຫ້ກັບປະຊາຊົນໃນບ້ານຊໍ້ ເມືອງສັງທອງ ເຊິ່ງໝູ່ບ້ານນີ້ຫ່າງຈາກຕົວເມືອງນະຄອນຫຼວງວຽງຈັນປະມານ 85 ກິໂລແມັດ ແລະໂຄງການພັດນະນາດັ່ງກ່າວ ຍັງນອນຢູ່ໃນຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງອີກດ້ວຍ.


​ໃນວັນທີ 28 ສິງຫາ 2020 ນີ້, ທ່ານ ຄໍາບຸນນັດ ໄຊຍະນົນ ຮອງລັດຖະມົນຕີກະຊວງກະສິກໍາ ແລະປ່າໄມ້ ໄດ້ລົງກວດກາຜົນສໍາເລັດ ແລະຄວາມຄືບໜ້າບາງໂຄງການທີ່ກໍາລັງກໍ່ສ້າງ ແລະພົບປະກັບປະຊາຊົນໃນບ້ານຊໍ້ ພ້ອມກັບທ່ານ ແຄນທອງ ສີສຸວົງ ຮອງປະທານຄະນະກໍາມາທິການຮ່ວມມືລາວ-ຈີນ, ທ່ານ ຄໍາອ້ວນ ຄໍາພູແກ້ວ ຮັກສາການຫົວໜ້າກົມພັດທະນາຊົນນະບົດ ແລະສະຫະກອນ ໂດຍໃຫ້ການຕ້ອນຮັບຈາກທ່ານເຈົ້າເມືອງໆສັງທອງ, ນາຍບ້ານຊໍ້, ຊ່ຽວຊານຈີນປະຈໍາໂຄງການ ພ້ອມດ້ວຍພາກສ່ວນທີ່ກ່ຽວຂ້ອງຂອງໂຄງການເຂົ້າຮ່ວມ.


​ກະຊວງກະສິກໍາໃຫ້ຮູ້ວ່າ: ໂຄງການພັດທະນາບ້ານຊໍ້ ມີທັງໝົດ 9 ໂຄງການ ເຊິ່ງໄດ້ຈັດຕັ້ງ ແລະປະຕິບັດມາແຕ່ປີ 2017, ປັດຈຸບັນມີ 8 ໂຄງການທີ່ກໍ່ສ້າງສໍາເລັດແລ້ວ ຄື: ໂຄງການກໍ່ສ້າງເສັ້ນທາງ, ກໍ່ສ້າງຫໍພັກຄູ-ນັກຮຽນ, ກໍ່ສ້າງຫ້ອງນໍ້າ, ເດີ່ນບານບ້ວງໃນໂຮງຮຽນ, ສະໜອງອຸປະກອນການຮຽນ-ການສອນ, ກໍ່ສ້າງສຸກສາລາ, ສະໂມສອນບ້ານ, ຕິດຕັ້ງນໍ້າປະປາ, ຕິດຕັ້ງພະລັງງານໄຟຟ້າແສງຕາເວັນ ແລະຍັງອີກໜຶ່ງໂຄງການ ຄາດວ່າຈະໃຫ້ສໍາເລັດໃນອີກບໍ່ດົນນີ້ ຄື ໂຄງການກໍ່ສ້າງຂົວຂ້າມນໍ້າສັງ ສໍາເລັດ 80% ແລ້ວ.

ນອກຈາກໂຄງການສ້າງໂຄງລ່າງພື້ນຖານແລ້ວ, ຍັງມີໂຄງການປັບປຸງ ແລະພັດທະນາຊີວິດການເປັນຢູ່ຂອງປະຊາຊົນອີກ 3 ໂຄງການກ່ຽວກັບການຜະລິດກໍ່ໄດ້ສໍາເລັດແລ້ວ ຄື: ໂຄງການສົ່ງເສີມການປູກສາລີ, ໂຄງການສົ່ງເສີມການລ້ຽງງົວ ແລະໂຄງການຫັດຖະກໍາຕໍ່າຫູກ-ຕໍ່າແຜ່ນ. ໂຄງການກໍ່ສ້າງໂຄງລ່າງພື້ນຖານ ແລະການພັດທະນາຊີວິດການເປັນຢູ່ຂອງປະຊາຊົນບ້ານຊໍ້ ເຊິ່ງໃຊ້ງົບປະມານທັງໝົດເກືອບ 7,5 ຕື້ກີບ. ນອກຈາກນີ້, ກະຊວງກະສິກໍາຍັງໃຫ້ຮູ້ຕື່ມວ່າ:

ໃນໄລຍະດຽວກັນຂອງການຈັດຕັ້ງປະຕິບັດໂຄງການທົດລອງຮ່ວມມືແກ້ໄຂຄວາມທຸກຍາກລາວ-ຈີນ ແຕ່ປີ 2017-2020 ໄດ້ມີໂຄງການສ້າງໂຄງລ່າງພື້ນຖານ, ສິ່ງອໍານວຍຄວາມສະດວກ ແລະໂຄງການປັບປຸງຊີວິດການເປັນຢູ່ໃຫ້ກັບ 3 ບ້ານຄື: ບ້ານຊຽງລ້ອມ ນະຄອນຫຼວງພະບາງ, ບ້ານທ່າດອກຄໍາ ເມືອງໄຊທານີ ນະຄອນຫຼວງວຽງຈັນ, ລວມທັງບ້ານຊໍ້ ເມືອງສັງທອງ ນະຄອນຫຼວງວຽງຈັນ ເຊິ່ງທັງສາມບ້ານນີ້ ມີໂຄງການພັດທະນາທັງໝົດ 19 ໂຄງການ. ບ້ານຊໍ້ ມີ 9 ໂຄງການ, ບ້ານຊຽງລ້ອມມີ 8 ໂຄງການ ແລະອີກ 2 ໂຄງການແມ່ນຢູ່ບ້ານທ່າດອກຄໍາ.

ທ່ານ ແຄນທອງໄດ້ກ່າວວ່າ: ສອງລັດທະບານລາວ-ຈີນໄດ້ສ້າງໂຄງການດັ່ງກ່າວນີ້ ແມ່ນເພື່ອປະກອບສ່ວນການສ້າງສາ ແລະພັດທະນາຂອງສອງປະເທດ ເຊິ່ງນອນຢູ່ໃນການຮ່ວມມືຢ່າງຮອບດ້ານ ແລະການສ້າງຄູ່ຮວມຊາຕະກໍາລາວ-ຈີນໃຫ້ນັບມື້ຮັກແພງ, ພັດທະນາ ແລະສ້າງຄວາມເຂັ້ມແຂງຂຶ້ນເລື້ອຍໆ ເພື່ອໃຫ້ປະຊາຊົນມີຢູ່ມີກິນ ແລະມີການພັດທະນາຂະຫຍາຍຕົວໄປເທື່ອລະກ້າວຢ່າງຍືນຍົງ.


ພ້ອມນັ້ນ, ທ່ານເຈົ້າເມືອງສັງທອງໄດ້ຕາງໜ້າເມືອງ, ຂັ້ນບ້ານ ແລະປະຊາຊົນບ້ານຊໍ້ສະແດງຄວາມຄອບໃຈຢ່າງສູງມາຍັງທັງສອງລັດຖະບານລາວ-ຈີນ ທີ່ໃຫ້ການຊ່ວຍເຫຼືອ ແລະໃຫ້ປະໂຫຍດຫຼາຍດ້ານຢ່າງເຫັນເປັນຮູບປະທໍາທີ່ສາມາດເຮັດໃຫ້ປະຊາຊົນຫຼຸດຜົ້ນອອກຈາກຄວາມທຸກຍາກໄດ້. ທ່ານ ຍັງໄດ້ກ່າວຍໍ້າວ່າ: ປະຊາຊົນບ້ານຊໍ້ທຸກຄົນຕ້ອງພ້ອມກັນສືບສານຕໍ່ ແລະຕໍ່ຍອດໂອກາດທີ່ໄດ້ຮັບຫຼາຍຢ່າງນີ້ໃຫ້ເກີດການພັດທະນາ ແລະຄວາມກ້າວໜ້າຢ່າງຍືນຍົງນັບມື້ເຂັ້ມແຂງ.

ພາບ+ຂ່າວ: ສອນປະເສີດ