ຮູ້​ຈັກ ‘ຂີ້ເຫລົ້າ’​ ອາຫານທ້ອງຖິ່ນຍອດນິຍົມພາກໃຕ້ຂອງ​ລາວ ໃຜ​ເຄີຍ​ກິນ​ແນ່?

ຮູ້​ຈັກ ‘ຂີ້ເຫລົ້າ’​ ອາຫານທ້ອງຖິ່ນຍອດນິຍົມພາກໃຕ້ຂອງ​ລາວ ໃຜ​ເຄີຍ​ກິນ​ແນ່?

28th August 2020 0 By Admin

ຂີ້ເຫລົ້າ ເປັນອາຫານກິນຫລິ້ນທີ່ມີມາຢ່າງຍາວນານໃນຂົງເຂດພາກໃຕ້ເຊັ່ນ ຈຳປາສັກ,​ ສາລະວັນ,​ອັດຕະປື (ມີຄົນບອກມາວ່າຢູ່ສະຫວັນນະເຂດກໍມີເມນູນີ້ວ່າຊັ້ນ)​ ມັນໄດ້ສ່ວນປະກອບຫລັກທີ່ແປກໆມາຈາກການຕົ້ມເຫລົ້າຂາວ ຫລືເຫລົ້າທີ່ເຮັດມາຈາກເຂົ້າຫນຽວ ນັ້ນກໍຄືຂອງແຫລວສີຂາວໆ ລົດຊາດສົ້ມໆ ແລະມີກິ່ນຫອມຂອງເຂົ້າ.

ກຳມະວິທີການເຮັດຂີ້ເຫລົ້າ ແມ່ນແຕກຕ່າງກັນໄປໃນແຕ່ລະທ້ອງຖິ່ນ ຫລືຂຶ້ນກັບຄວາມມັກຂອງໃຜລາວ, ຂໍຍົກຕົວຢ່າງສູດທີ່ໄດ້ມາຈາກອັດຕະປື

ການປຸງແຕ່ງແມ່ນແບ່ງເປັນ 2 ຂັ້ນຕອນຄື ການກຽມນ້ຳຂີ້ເຫລົ້າ ແລະການກຽມເຫຍື່ອ.
ນ້ຳຂີ້ເຫລົ້າ: ແຊ່ນ້ຳຫມາກຂາມປຽກພໍປະມານປະສົມລົງໃນນ້ຳຂີ້ເຫລົ້່າທີ່ໄດ້ຈາກການຕົ້ມເຫລົ້າ,​ ຈີ່ປາກະເຕົາ (ປາແຫ້ງຊະນິດຫນຶ່ງທີ່ໄທໃຕ້ປຸງແຕ່ງໂດຍການເກັບໄວ້ໃນກະບອກໄມ້ໄຜ່)​ ຫລືຫາກບໍ່ມີກໍໃຊ້ປາແຫ້ງທົ່ວໄປ ຫລັງຈາກນັ້ນກໍນຳມາຕຳໃຫ້ມຸ່ນ ແລ້ວປະສົມລົງໄປໃນນ້ຳຫມາກຂາມປຽກ,​ນ້ຳຂີ້ເຫລົ້າ ພ້ອມທັງເຂົ້າຂົ້ວ ແລະຫມາກເຜັດປົ່ນ; ປຸງລົດດ້ວຍປາແດກ,​ເກືອ,​ແປ້ງນົວ ຕາມຄວາມມັກ.

ເຫຍື່ອ: ບັນດາພືດພັກຕ່າງໆທີ່ສາມາດຫາໄດ້ໃນທ້ອງຖິ່ນ ເຊັ່ນ ຫມາກຫຸ່ງ,​ຫມາກຖົ່ວ,​ ຫມາກເດື່ອ, ຫມາກງິ້ວອ່ອນ,​ ກ້ວຍທະນີ,​ ຫໍາຫມາກມີ້; ຜັກຫອມເປ,​ຫອມລາບ,​ຜັກຊີ….​ນຳມາຊອຍ ຫລືຟັກຕາມຂະຫນາດເຫມາະສົມ.

ຈາກນັ້ນນຳເຫຍື່ອເທລົງໃນນ້ຳຂີ້ເຫລົ້າທີ່ກະກຽມໄວ້ກໍເປັນອັນວ່າຮຽບຮ້ອຍ ພ້ອມຊົດແກ້ເຫງົານອນ ຫລືຮັບປະທານຮ່ວມກັນເປັນຖ້ວຍໃຫຍ່ໆ.

ລົດຊາດຂອງຂີ້ເຫລົ້າຈະມີຄວາມເຜັດ-ສົມ,​ມີກິ່ນຫອມຈາກຂີ້ເຫລົ້າ ແລະໄດ້ຄວາມນົວຈາກປາແຫ້ງທີ່ຕຳໃສ່ ຫລືບາງຄົນກໍອາດຈະຂົ້ວປາແກ້ວໂຮຍລົງໄປພ້ອມກໍໄດ້.

ພາບ:tou boualay
ຈາກ: ກິນທີ່ນີ້, ທ່ຽວທີ່ນີ້