ວັນຊາດທີ 2 ທັນວາ ໝັ້ນຍືນ! ການນໍາພັກ-ລັດ ວາງພວງມາລາກະຕ່າດອກໄມ້ ຢູ່ອະນຸສາວະລີນັກຮົບນີລະນາມ

ວັນຊາດທີ 2 ທັນວາ ໝັ້ນຍືນ! ການນໍາພັກ-ລັດ ວາງພວງມາລາກະຕ່າດອກໄມ້ ຢູ່ອະນຸສາວະລີນັກຮົບນີລະນາມ

2nd December 2019 0 By Admin

ເນື່ອງໃນໂອກາດສະເຫຼີມສະຫຼອງວັນຊາດທີ 2 ທັນວາ ຄົບຮອບ 44 ປີ (2/12/1975-2/12/ 2019) ການນໍາພັກ-ລັດຂັ້ນສູງ ພ້ອມດ້ວຍອົງການຈັດຕັ້ງມະຫາຊົນເຂົ້າຮ່ວມວາງພວງມາລາຢູ່ອະນຸສາ ວະລີນັກຮົບນີລະນາມ ແລະ ວາງກະຕ່າດອກໄມ້ຢູ່ຫໍພິພິທະພັນໄກສອນ ພົມວິຫານ ໃນວັນທີ 2 ທັນວາ 2019.


ປະກອບມີ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ນໍາໂດຍ ທ່ານ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ ສູນກາງແນວລາວສ້າງຊາດ ແລະ ອົງການຈັດຕັ້ງມະຫາຊົນ ນໍາໂດຍ ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ກະຊວງປ້ອງກັນປະເທດ ນໍາໂດຍທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ.

ກະຊວງປ້ອງກັນຄວາມສະຫງົບ ນໍາໂດຍທ່ານ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ແລະ ອົງການປົກຄອງນະຄອນຫຼວງວຽງຈັນ ນໍາໂດຍ ທ່ານ ອານຸພາບ ຕຸນາລົມ ປະທານສະພາປະຊາຊົນ ນະຄອນຫຼວງວຽງຈັນ.

ການເຂົ້າວາງພວງມາລາ ແລະ ກະຕ່າດອກໄມ້ ຄັ້ງນີ້ແມ່ນ ເພື່ອລະນຶກເຖິງຄຸນງາມຄວາມດີ ຂອງບັນດານັກຮົບປະຕິວັດລວມ ໄປເຖິງພໍ່ແມ່ປະຊາຊົນລາວບັນດາເຜົ່າຜູ້ທີ່ໄດ້ເສຍສະຫຼະເລືອດ ເນື້ອໃນຂະບວນການຕໍ່ສູ້ກູ້ຊາດ ກັບພວກລ່າເມືອງຂຶ້ນແບບເກົ່າ ແລະ ໃໝ່

ໂດຍສະເພາະແມ່ນປະທານ ໄກສອນ ພົມວິຫານ ພ້ອມບັນດາການນໍາໄດ້ເອົາໃຈໃສ່ໃນການປຸກລະດົມປະຊາຊົນລາວ ບັນດາເຜົ່າພາຍໃຕ້ຄັນທຸງຂອງ ພັກປະຊາຊົນປະຕິວັດລາວ ຈົນສາມາດໄດ້ຮັບໄຊຊະນະຄັ້ງຍິ່ງໃຫຍ່ ແລະ ສະຖາປານາ ສປປ ລາວໃນວັນທີ 2 ທັນວາ 1975.

ທີ່ມາ: Vientiane Mai