ແຂວງຫົວພັນ ເປີດຂະບວນການ ເສຍຄ່າທາງ-ພາສີທີ່ດິນຜ່ານລະບົບທະນາຄານ

ແຂວງຫົວພັນ ເປີດຂະບວນການ ເສຍຄ່າທາງ-ພາສີທີ່ດິນຜ່ານລະບົບທະນາຄານ

26th August 2020 0 By Admin

ເພື່ອສືບຕໍ່ຫັນເອົາວຽກງານເກັບລາຍຮັບເຂົ້າງົບປະມານແຫ່ງລັດເຂົ້າສູ່ລະບົບທັນສະໄໝເທື່ອລະກ້າວ, ທັງຮັບປະກັນໃຫ້ແກ່ການເກັບລາຍຮັບບັນລຸຕາມແຜນການ ແລະ ລື່ນແຜນການທີ່ມອບໝາຍໃຫ້, ສ່ວຍສາອາກອນ ປະຈໍາແຂວງຫົວພັນໄດ້ສົມທົບກັບທະນາຄານການຄ້າຕ່າງປະເທດລາວມະຫາຊົນ (ທຄຕລ) ສາຂາແຂວງຫົວພັນ ແລະ ຕໍາຫຼວດຈະລາຈອນ ແຂວງຫົວພັນ, ເປີດຂະບວນການເສຍຄ່າທໍານຽມທາງ ແລະ ພາສີທີ່ດິນຜ່ານລະບົບທະນາຄານປະຈໍາປີ 2020 ຢູ່ທີ່ບ້ານພັນໄຊ ເມືອງຊໍາເໜືອ ແຂວງຫົວພັນ.


ພິທີດັ່ງກ່າວ, ໄດ້ຈັດຂຶ້ນໃນວັນທີ 25 ສິງຫາ 2020 ໂດຍມີທ່ານ ຫົງທອງ ຈັນທາຈິດ ຫົວໜ້າພະແນກການເງິນແຂວງຫົວພັນ, ທ່ານ ມີຈວນ ພົມເມືອງງາ ຫົວໜ້າສ່ວຍສາອາກອນ ປະຈໍາແຂວງຫົວພັນ, ພ້ອມນີ້ກໍມີຜູ້ຕາງໜ້າທະນາຄານການຄ້າຕ່າງປະເທດລາວ ມະຫາຊົນສາຂາແຂວງຫົວພັນ, ຕາງໜ້າຈາກຕໍາຫຼວດຈະລາຈອນ ແລະ ວິຊາການກ່ຽວຂ້ອງເຂົ້າຮ່ວມ.

.
ການເສຍຄ່າທໍານຽມທາງ ແລະ ພາສີທີ່ດິນ ເປັນການປະກອບສ່ວນເຂົ້າໃນວຽກງານການພັດທະນາເສດຖະ ກິດ-ສັງຄົມແຫ່ງຊາດ ແລະ ເປັນພື້ນຖານໃຫ້ແກ່ຄາດໝາຍຂອງການພັດທະນາ, ການປະຕິບັດພັນທະເຂົ້າງົບປະມານແຫ່ງລັດແມ່ນໜ້າທີ່ຂອງທຸກພາກສ່ວນນັບທັງອົງການຈັດຕັ້ງພັກ-ລັດ, ອົງການຈັດຕັ້ງມະຫາຊົນ,ຫົວໜ່ວຍທຸລະກິດ ແລະ ພົນລະເມືອງລາວທຸກໆຄົນຕ້ອງມີສ່ວນຮ່ວມ.


ດັ່ງນັ້ນ, ການເປີດຂະບວນການເສຍຄ່າທໍານຽມທາງ ແລະ ພາສີທີ່ດິນຜ່ານລະບົບທະນາຄານປະຈໍາປີ 2020 ເພື່ອເປັນການປຸກລະດົມກະຕຸກຊຸກຍູ້ ແລະ ອໍານວຍຄວາມສະດວກໃຫ້ບັນດາອົງການຈັດຕັ້ງລັດ, ພະນັກ ງານ-ລັດຖະກອນລວມເຖິງປະຊາຊົນລາວບັນດາເຜົ່າໄດ້ມາເສຍຄ່າທໍານຽມທາງ ແລະ ພາສີທີ່ດິນປະຈໍາປີ 2020 ໃຫ້ເປັນຂະບວນຟົດຟື້ນ, ອັນສໍາຄັນກໍແມ່ນການສ້າງຂະບວນການໃຫ້ເປັນແບບຢ່າງນໍາໜ້າ, ສະແດງເຖິງສະຕິຕື່ນຕົວ,ຄວາມສະໝັກໃຈທີ່ປະກອບສ່ວນເຂົ້າງົບປະມານໃຫ້ແກ່ລັດກໍຄືການສ້າງສາພັດທະນາປະເທດຊາດ.


ພາບ-ຂ່າວ: ອາພັດສະລາ ຈັນທະວົງ