ແຂວງ​ຄ​ຳ​ມ່ວນ​ຈິງ​ຈັງ! ກວດຄືນມາດຕະຖານໝໍ້ວັດແທກນ້ຳປະປາ ພົບເຫັນໝໍ້ວັດແທກນ້ຳປະປາບໍ່ໄດ້ມາດຕະຖານ 9 ໜ່ວຍ

ແຂວງ​ຄ​ຳ​ມ່ວນ​ຈິງ​ຈັງ! ກວດຄືນມາດຕະຖານໝໍ້ວັດແທກນ້ຳປະປາ ພົບເຫັນໝໍ້ວັດແທກນ້ຳປະປາບໍ່ໄດ້ມາດຕະຖານ 9 ໜ່ວຍ

26th August 2020 0 By Admin

ພະແນກ ວຕ ແຂວງຄຳມ່ວນ ລົງເຄື່ອນໄຫວກວດຄືນມາດຕະຖານໝໍ້ວັດແທກນ້ຳປະປາ

ໃນວັນທີ 25 ສິງຫາ 2020 ພະແນກ ວິທະຍາສາດ ແລະ ເຕັກໂນໂລຊີ ແຂວງຄຳມ່ວນ ຮ່ວມກັບໜ່ວຍງານວິທະຍາສາດ ແລະ ເຕັກໂນໂລຊີ ເມືອງນາກາຍ ແລະ ລັດວິສາຫະກິດນ້ຳປະປາ ສາຂາເມືອງນາກາຍ ແຂວງຄຳມ່ວນ.

ໂດຍປະຕິບັດຕາມ ຂໍ້ຕົກລົງຂອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ສະບັບເລກທີ 0543/ກວຕ, ລົງວັນທີ 16 ພຶດສະພາ 2017 ວ່າດ້ວຍການຄຸ້ມຄອງໝໍ້ແທກນ້ຳປະປາ ຢູ່ ສປປ ລາວ. ສະນັ້ນ, ຈຶ່ງໄດ້ລົງເຄື່ອນໄຫວ #ກວດຄືນມາດຕະຖານໝໍ້ວັດແທກນ້ຳປະປາຢູ່ທີ່ເມືອງດັ່ງກ່າວ ເຊິ່ງທົ່ວເມືອງ ມີຈຳນວນໜໍ້ວັດແທກນ້ຳປະປາ ທັງໜົດ 694 ໜ່ວຍ, ກວດສຸ້ມຕົວຈິງ 3 % ເປັນຈຳນວນ 20 ໜ່ວຍ.

ຜ່ານການລົງເຄື່ອນໄຫວຕົວຈິງໄດ້ພົບເຫັນໝໍ້ວັດແທກນ້ຳປະປາທີ່ບໍ່ໄດ້ມາດຕະຖານ ຈຳນວນ 9 ໜ່ວຍ (ໜຸນໄວ 3 ໜ່ວຍ, ໜຸນຊ້າ 6 ໜ່ວຍ, ນໍ້າຮົ່ວ 1 ໜ່ວຍ).

ຕໍ່ກັບວິທີການແກ້ໄຂບັນຫາດັ່ງກ່າວ ທາງພະແນກວິທະຍາສາດ ແລະ ເຕັກໂນໂລຊີ ແຂວງຄຳມ່ວນ ໄດ້ສະເໜີໃຫ້ພາກສ່ວນທີ່ຮັບຜິດຊອບລົງປ່ຽນຖ່າຍບັນດາໝໍ້ວັດແທກນ້ຳປະປາທີ່ບໍ່ໄດ້ມາດຕະຖານໃຫ້ທັນການເພື່ອຮັບປະກັນຄວາມໂປ່ງໃສ, ປົກປ້ອງຜົນປະໂຫຍດ ອັນຊອບທຳ ແລະ ຄວາມຍຸຕິທຳໃນສັງຄົມ.


ຈາກ: https://khammouanenews.com/, ແຂວງຄໍາມ່ວນ