ປະ​ກາດ ເສັ້ນທາງກາສີ ຫາພູຄູນສາມາດສັນຈອນໄປມາໄດ້ປົກກະຕິແລ້ວ

ປະ​ກາດ ເສັ້ນທາງກາສີ ຫາພູຄູນສາມາດສັນຈອນໄປມາໄດ້ປົກກະຕິແລ້ວ

26th August 2020 0 By Admin

ປັດຈຸບັນເສັ້ນທາງກາສີຫາພູຄູນສາມາດສັນຈອນໄປມາໄດ້ປົກກະຕິແລ້ວ ພາຍຫຼັງໄດ້ຮັບການສ້ອມແປງ ຍ້ອນໄດ້ຮັບຜົນກະທົບຈາກຝົນຕົກ ເຮັດໃຫ້ດິນເຊາະເຈື່ອນຖົມເສັ້ນທາງ ແລະ ທາງຂາດ ບໍ່ສາມາດສັນຈອນໄປມາໄດ້.


ທ່ານ ສະຫວ່າງ ສິລິມະໂນທຳ ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງວຽງຈັນໃຫ້ຮູ້ວ່າ ໃນອາທິດຜ່ານມາຝົນຕົກໜັກຕິດຕໍ່ກັນຫຼາຍວັນ ເຮັດໃຫ້ເກີດດິນເຊາະເຈື່ອນຖົມເສັ້ນທາງ ແລະ ທາງຂາດ ບໍ່ສາມາດສັນຈອນໄປມາໄດ້ຢູ່ຈຸດ ກິໂລແມັດທີ 2,131 ບວກ 260 ເຂດບ້ານນ້ຳແກ່ນ ຊຶ່ງພະແນກໂຍທາທິການ ແລະ ຂົນສົ່ງແຂວງ ສົມທົບກັບບໍລິສັດຮັບເໝົາກໍ່ສ້າງສ້ອມແປງເສັ້ນທາງ ລົງແກ້ໄຂເພື່ອໃຫ້ສາມາດສັນຈອນໄປມາໄດ້ເປັນປົກກະຕິ.


ທ່ານ ສະຫວ່າງ ສິລິມະໂນທຳ ໃຫ້ຮູ້ຕື່ມວ່າ ປັດຈຸບັນ ພະແນກໂຍທາທິການ ແລະ ຂົນສົ່ງແຂວງວຽງຈັນ ໄດ້ສົ່ງພະນັກງານວິຊາການລົງຕິດຕາມສະພາບເສັ້ນທາງທີ່ເປ່ເພ ເພື່ອຂຶ້ນແຜນຂໍງົບປະມານສ້ອມແປງ ໃຫ້ສາມາດສັນຈອນໄປມາໄດ້ສະດວກສະບາຍ.