ທ່ານ ປອ ບຸນທອງ ຈິດມະນີ ຮອງນາຍົກລັດຖະມົນຕີ ເຄື່ອນໄຫວເຮັດວຽກ ແລະ ຢ້ຽມຢາມແຂວງຫຼວງນໍ້າທາ

ທ່ານ ປອ ບຸນທອງ ຈິດມະນີ ຮອງນາຍົກລັດຖະມົນຕີ ເຄື່ອນໄຫວເຮັດວຽກ ແລະ ຢ້ຽມຢາມແຂວງຫຼວງນໍ້າທາ

25th August 2020 0 By Admin

ໃນລະຫວ່າງວັນທີ 19-20 ສິງຫາ 2020 ທ່ານ ປອ ບຸນທອງ ຈິດມະນີ ກຳມະການກົມການເມືອງ ສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານ ອົງການກວດກາ ລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ທັງເປັນຫົວໜ້າຄະນະ ຊີ້ນໍາໂຄງການກໍ່ສ້າງທາງລົດໄຟລາວ-ຈີນ, ພ້ອມດ້ວຍຄະນະ ໄດ້ເຄື່ອນໄຫວເຮັດວຽກ ແລະ ຢ້ຽມຢາມ ຢູ່ແຂວງ ຫຼວງນໍ້າທາ, ມີທ່ານ ປອ ບູນຈັນ ສິນທະວົງ ກໍາມະການສູນກາງພັກ, ລັດຖະມົນຕີກະຊວງໂຍທາທິການ ແລະ ຂົນ ສົ່ງ, ຮອງຫົວໜ້າ, ຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ (ຜູ້ປະຈໍາການ) ຮ່ວມເຄື່ອນໄຫວ; ໂດຍໄດ້ຮັບ ການຕ້ອນຮັບຈາກທ່ານ ຄໍາໄຫຼ ສີປະເສີດ ເລຂາຄະນະບໍລິຫານງານພັກແຂວງຫຼວງນໍ້າທາ, ບັນດາທ່ານຄະນະ ປະຈໍາພັກ, ຄະນະຮັບຜິດຊອບໂຄງການກໍ່ສ້າງທາງລົດໄຟລາວ-ຈີນ ແລະ ພະນັກງານທີ່ກ່ຽວຂ້ອງ ເຂົ້າຮ່ວມເຮັດ ວຽກນໍາ.

ທ່ານ ຄໍາໄຫຼ ສີປະເສີດ ໄດ້ລາຍງານສະພາບການພັດທະນາເສດຖະກິດສັງຄົມຂອງແຂວງ,ສະພາບການ ເຝົ້າລະວັງ ແລະ ປ້ອງກັນການແຜ່ລະບາດຂອງພະຍາດ COVID 19 ຢູ່ແຂວງຫຼວງນໍ້າທາໃຫ້ທ່ານຮອງນາຍົກ ແລະ ຄະນະຊາບ. ໃນໄລຍະຜ່ານມາເສດຖະກິດຂອງແຂວງໄດ້ມີການຂະຫຍາຍຕົວຢ່າງຕໍ່ເນື່ອງ ຂົງເຂດວັດທະນະທໍາ ສັງຄົມໄດຮັບການບູລະນະ, ວຽກງານປ້ອງກັນຊາດ-ປ້ອງກັນຄວາມສະຫງົບ ໄດ້ຫັນເປັນຂອງທົ່ວປວງຊົນຮອບ ດ້ານ, ຫັນພະນັກງານລົງກໍ່ສ້າງຮາກຖານຢູ່ຊົນນະບົດ, ຊີວິດການເປັນຢູ່ຂອງປະຊາຊົນ, ທະຫານ, ຕໍາຫຼວດ ໄດ້ຮັບການປັບປຸງ ຍົກລະດັບໃຫ້ດີຂຶ້ນເປັນກ້າວໆ, ຄວາມທຸກຍາກໄດ້ຫຼດລົງ. ເຊິ່ງໃນໄລຍະ 6 ເດືອນຕົ້ນປີ 2020 ຜ່ານມາ ການເຕີບໃຫຍ່ຂະຫຍາຍຕົວຂອງເສດຖະກິດແຂວງ ແມ່ນພົບຄວາມຫຍຸ້ງຍາກ ແລະ ບໍ່ສາມາດບັນລຸຕາມ ແຜນການທີ່ວາງໄວ້ ເນື່ອງຈາກການລະບາດຂອງພະຍາດ COVID 19.

ໂອກາດນີ້ ທ່ານ ປອ ບຸນທອງ ຈິດມະນີ ຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມຕໍ່ການນໍາ ຂອງແຂວງ ຕື່ມອີກ ໂດຍທ່ານໄດ້ເນັ້ນໜັກໃຫ້ຄະນະນໍາຂອງແຂວງພ້ອມກັນຂຸ້ນຂ້ຽວເຊື່ອມຊຶມ ແລະ ຜັນຂະຫຍາຍຜົນສໍາເລັດ ຂອງກອງປະຊຸມໃຫຍ່ຂອງອົງຄະນະພັແຂວງ, ເມືອງ ແລະ ບັນດາຂະແໜງການຂອງແຂວງໃຫ້ທົ່ວປວງຊົນ ແລະ ຂະແໜງການຕ່າງຮັບຮູ້ ແລະ ພ້ອມກັນຈັດຕັ້ງປະຕິບັດ; ຮີບຮ້ອນຜັນຂະຫຍາຍບັນດາຄາດໝາຍທີ່ກໍານົດໄວ້ ຢູ່ໃນມະຕິກອງປະຊົມໃຫຍ່ອົງຄະນະພັກແຂວງ ຄັ້ງທີ VIII ກ່ຽວກັບການພັດທະນາເສດຖະກິດຂອງແຂວງ ໂດຍຫັນເປັນອັນລະອຽດຂອງຂະແໜງການຂອງພາກສ່ວນຕ່າງໆ ເອົາໃຈໃສ່ເປັນພິເສດ ໃນການຊຸກຍູ້ການ ຜະລິດ ເປັນສິນຄ້າຂອງປະຊາຊົນຕິດພັນກັບການສົ່ງເສີມທຸລະກິດຂະໜາດນ້ອຍ, ຂະໜາດກາງ; ເອົາໃຈໃສ່ການແກ້ໄຂຄວາມທຸກຍາກຂອງປະຊາຊົນ ໂດຍການຈັດສັນທີ່ຢູ່ອາໄສ, ຈັດສັນອາຊີບໃຫ້ປະຊາຊົນ ຢ່າງເໝາະສົມ, ສ້າງວຽກເຮັດງານທໍາໃຫ້ເຂົາເຈົ້າ; ແກ້ໄຂບັນຫາປະກົດການຕ່າງ ທີ່ເກີດຂຶ້ນໃນສັງຄົມໃຫ້ຫຼຸດນ້ອຍຖອຍລົງ; ພິເສດໃນໄລຍະນີ້ແມ່ນໃຫ້ເອົາໃຈໃສ່ການເຝົ້າລະວັງ ແລະ ປ້ອງກັນການແຜ່ລະບາດຂອງເຊື້ອພະຍາດ COVID 19 ຕາມການແນະນໍາຂອງຄະນະສະເພາະກິດ;

.

ສືບຕໍ່ໃນການປະຕິບັດວຽກງານ 3 ສ້າງຕາມມາດຖານຕ່າງໆທີ່ກໍານົດໄວ້ ໃຫ້ແຕ່ລະເມືອງ, ບ້ານສູ້ຊົນປະຕິບັດໃຫ້ໄດ້ແຕ່ລະມາດຖານ ຢາກເຮັດໄດ້ຕ້ອງມີການແບ່ງສິດແບ່ງຄວາມຮັບຜິດຊອບໃຫ້ແຕ່ລະຂັ້ນໃຫ້ເໝາະສົມ; ສືບຕໍ່ປັບປຸງພາຍໃນພັກໃຫ້ເຂັ້ມແຂງ ແບ່ງງານແບ່ງຄວາມຮັບຜິດຊອບ ໃຫ້ເໝາະສົມຕາມແຕ່ລະຂົງເຂດວຽກງານ, ປັບປຸງລະບອບລະບຽບການເຮັດວຽກຂອງອົງຄະນະພັກໃຫ້ແທດເໝາະ,ເພີ່ມທະວີການຕິດຕາມ, ກວດກາພາຍໃນພັກໃຫ້ເຂັ້ມແຂງ; ຕ້ອງເພີ່ມຄວາມສາມັກຄີພາຍໃນອົງຄະນະພັກແຂວງ ເພື່ອເປັນຫຼັກແຫຼ່ງເປັນບ່ອນອີງ ໃນການເຕົ້າໂຮມຄວາມສາມັກຄີທົ່ວອົງຄະນະພັກ ທົ່ວປວງຊົນບັນດາເຜົ່າ ໃຫ້ເປັນປຶກແຜ່ນ ເພື່ອພ້ອມກັນພັດທະນາແຂວງໃຫ້ຈະເລີນກ້ວໜ້າຕໍ່ໄປ.


ໃນໂອກາດນີ້, ທ່ານຮອງນາຍົກລັດຖະມົນຕີ ພ້ອມດ້ວຍຄະນະໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ ການກໍ່ສ້າງທາງລົດໄຟລາວ-ຈີນ ຢູ່ຈຸດສະຖານີນາເຕີຍ, ສະຖານີບໍ່ເຕ່ນ ແລະ ການຈັດສັນບ່ອນຢູ່ໃໝ່ ໃຫ້ປະຊາຊົນຜູ້ທີ່ໄດ້ຮັບຜົນກະທົບຈາກການກໍ່ສ້າງທາງລົດໄຟລາວ-ຈີນ ຢູ່ຈຸດບ້ານນາເຕີຍ. ສໍາລັບການກໍ່ສ້າງທາງ ລົດໄຟລາວ-ຈີນ ຊ່ວງຜ່ານແຂວງຫຼວງນໍ້າທາມາຮອດປັດຈຸບັນແມ່ນພວມຢູ່ໃນໄລຍະອອກແບບສະຖານີ ບໍ່ເຕ່ນ ແລະ ສະຖານີນາເຕີຍ ເພື່ອໃຫ້ແທດເໝາະກັບສະພາບຕົວຈິງ ແລະ ສາມາດຮອງຮັບການພັດທະນາທີ່ຈະມີຂຶ້ນ ໃນອະນາຄົດ, ສາມາດກາຍເປັນຈຸດສູນກາງໃນການເຊື່ອມຈອດລະຫວ່າງ ສປ ຈີນ ກັບພາກພື້ນອາຊຽນ ແລະ ສາກົນ; ປັດຈຸບັນຄະນະຮັບຜິດຊອບພວມເລັ່ງດໍາເນີນການປຶກສາຫາລື ຕົກລົງເອົາຮູບແບບສະຖານີ, ບຸກເບີກເນື້ອທີ່ ທີ່ນອນຢູ່ໃນໂຄງການ ແລະ ເລັ່ງດໍາເນີນການທາງດ້ານເອກະສານເພື່ອນໍາເອົາຊ່ຽວຊານຈາກຕ່າງປະເທດເຂົ້າມາ ດໍາເນີນການກໍ່ສ້າງ ຄາດວ່າຈະສາມາດລົງມືການກໍ່ສ້າງທັງສອງສະຖານີໃນໄວໆນີ້ ແລະ ໃຫ້ສໍາເລັດໃນເດືອນກັນຍາ ປີ 2021.

.
ພ້ອມກັນນັ້ນທ່ານ ປອ ບຸນທອງ ຈິດມະນີ ຮອງນາຍົກລັດຖະມົນຕີພ້ອມດ້ວຍຄະນະ ກໍ່ໄດ້ເຄື່ອນໄຫວ ຢ້ຽມຢາມໂຄງການກໍ່ສ້າງ ດ່ານຜ່ານລົດຂົນສົ່ງສິນຄ້າສາກົນບໍ່ເຕ່ນ ທີ່ສ້າງຂຶ້ນໃໝ່ເພື່ອຮອງຮັບການຂົນສົ່ງສິນຄ້າ ຈໍານວນ ມະຫາສານ ລະຫວ່າງສອງ ປະເທດລາວ-ຈີນ ຊຶ່ງສໍຳເລັດການກໍ່ສ້າງເມື່ອບໍ່ດົນມານີ້ ແລະ ຈະເປີດໃຫ້ລົດ ຂົນສົ່ງສິນຄ້າສາມາດຜ່ານໄປ-ມາໄດ້ ຫຼັງຈາກການກໍ່ສ້າງຂອງເບື້ອງຊາຍແດນຈີນສໍາເລັດ; ຢ້ຽມຢາມເຂດເສດຖະ ກິດພິເສດບໍເຕນແດນງາມ ທີ່ຕັ້ງຢູ່ໃກ້ກັບດ່ານສາກົນບໍ່ເຕນ ອັນຈະກາຍເປັນສູນລວມທາງດ້ານເສດຖະກິດ, ການເງິນ, ການລົງທຶນແຫ່ງໃໝ່ ຂອງ ລາວໃນອະນາຄົດ ທີ່ລົງທຶນໂດຍນັກລົງທຶນຕ່າງປະເທດດ້ວຍຮູບແບບ ສໍາປະທານ; ຢ້ຽມຊົມໂຮງງານຜະລິດເສື້ອຜ້າແຟຊັນ ຂອງບໍລິສັດ ຟູ້ສິ້ງ ເສື້ອຜ້າແຟຊັນ ລາວຈໍາກັດ ທີ່ເປັນໂຮງງານໜຶ່ງທີ່ເຂົ້າມາລົງທຶນ ຢູ່ໃນເຂດ ເສດຖະກິດພິເສດບໍ່ເຕ່ນແດນງາມ ຕື່ມອີກ.

ຈາກ: ວາລະສານກວດກາ