ຄຶກຄື້ນແນ່ນອນ! ຈະສ້າງກິລາບານເຕະໃຫ້ເປັນກິດຈະກຳຍອດນິຍົມອັນດັບໜຶ່ງໃນ ສປປ ລາວ

ຄຶກຄື້ນແນ່ນອນ! ຈະສ້າງກິລາບານເຕະໃຫ້ເປັນກິດຈະກຳຍອດນິຍົມອັນດັບໜຶ່ງໃນ ສປປ ລາວ

25th August 2020 0 By Admin

ສະຫະພັນບານເຕະແຫ່ງຊາດລາວ ໄດ້ຈັດກອງປະຊຸມ ພັດທະນາບານເຕະທົ່ວປະເທດ ໂດຍມີບັນດາສະຫະພັນບານເຕະຂອງແຕ່ລະແຂວງເຂົ້າຮ່ວມ ໃນວັນທີ 22 ສິງຫາ 2020 ທີ່ ໂຮງແຮງລາວພາຊາ ນະຄອນຫຼວງວຽງຈັນ

.

ເຊິ່ງຈຸດປະສົງໃນການຈັດງານຄັ້ງນີ້ ບອກເລີຍສາຍກິລາບານເຕະມີເຮ ແລະ ກຽມພົບໃບໜ້າໃໝ່, ສີສັນທີ່ຄຶກຄື້ນແນ່ນອນ ທ່ານ ວີເພັດ ສີຫາຈັກຣ, ປະທານ ສະຫະພັນ ບານເຕະ ແຫ່ງຊາດລາວໄດ້ກ່າວວ່າ ກອງປະຊຸມໃນຄັ້ງນີ້ ແມ່ນແນໃສ່ການເສີມຂະຫຍາຍສາຍພົວພັນລະຫວ່າງ ສຕລ ແລະ ສະຫະພັນບານເຕະແຂວງ ໂດຍເນັ້ນໃຫ້ບັນດາສະຫະພັນບານເຕະແຂວງມີຫ້ອງການປະຈໍາຂອງຕົນ;

ເພີ່ມຈໍານວນພົນກິລາບານເຕະໃຫ້ຫຼາຍຂຶ້ນໃນທົ່ວປະເທດ; ການສ້າງອາຊີບ ແລະ ພັດທະນາບຸກຄະລາກອນກິລາບານເຕະ; ເສີມຂະຫຍາຍກິລາບານເຕະຂັ້ນພື້ນຖານໃນເຂດຊຸມຊົນ ແລະ ທ້ອງຖິ່ນ; ແລະ ການສ້າງກິລາບານເຕະໃຫ້ເປັນກິດຈະກໍາຍອດນິຍົມໃນ ສປປ ລາວ.

ພາຍໃນກອງປະຊຸມ ຜູ້ເຂົ້າຮ່ວມຍັງໄດ້ມີໂອກາດປະກອບຄໍາຄິດເຫັນໃນການແບ່ງກຸ່ມສົນທະນາໃນ 5 ຫົວຂໍ້ຄື: ການຈັດຕັ້ງສະຫະພັນບານເຕະແຂວງ; ທິດທາງໃນການເພີ່ມຈໍານວນພົນກິລາບານເຕະໃນທົ່ວປະເທດ; ການຝຶກອົບຮົມຄູຝຶກ, ກໍາມະການຕັດສິນ, ບຸກຄະລາກອນເຕັກນິກ ແລະ ອື່ນໆ; ການສົ່ງເສີມນັກລາບານເຕະພາຍໃນທ້ອງ ໃຫ້ເປັນຕົວແທນແຂວງ; ແລະ ການສະກັດກັ້ນການລົ້ມບານໃນທຸກຮູບແບບ.

ນອກນັ້ນ, ທ່ານ ວີເພັດ ສີຫາຈັກຣ ຍັງໄດ້ແຈ້ງຕໍ່ທີ່ປະຊຸມວ່າ ສຕລ ຈະໃຫ້ການຊ່ວຍເຫຼືອດ້ານງົບປະມານບໍລິຫານຫ້ອງການ ສຕຂ ຖ້າ ສຕຂ ມີເງື່ອນໄຂຄົບຖ້ວນກໍ່ຄື ຕ້ອງມີຄະນະບໍລິຫານງານ ສຕຂ, ຄະນະປະທານ ສຕຂ, ເລຂາທິການ ສຕຂ, ຫ້ອງການ ສຕຂ ແລະ ເປີດບັນຊີທະນາຄານ ທີ່ເປັນຂອງ ສຕຂ.

ໃນຊ່ວງທ້າຍຂອງກອງປະຊຸມ ທ່ານວີເພັດ ໄດ້ເຊີນບັນດາສະຫະພັນບານເຕະແຂວງເຂົ້າຮ່ວມການແຂ່ງຂັນບານເຕະທົ່ວປະເທດ ຍິງ-ຊາຍ ເພື່ອຂໍ່ານັບຮັບຕ້ອນວັນຊາດ 2 ທັນວາ ຄົບຮອບ 45 ປີ ຊຶ່ງຈະຈັດຂຶ້ນໃນເດືອນພະຈິກ 2020.

ແບບນີ້ກໍຖ້າຕິດຕາມວົງການກິລາບານເຕະ, ກິລາບານເຕະ ທີ່ແນ່ນອນວ່າຄຶກຄື້ນ ມ່ວນຊື່ນ ແລະ ເປັນໂອກາດດີໆໃຫ້ກັບຄົນມັກຮັກໃນກິລາບານເຕະນີ້ແນ່ນອນ.

ຈາກ: Sportvarietyfm98,8