ເຄີຍກິນບໍ່ ເຂົ້າໝົມໝໍ້ທອດ ຫລວງພຣະບາງ

1st December 2019 0 By Admin

ໃຜແນ່ຮູ້ຈັກ ເຂົ້າສະຕຸກ້ອນສະຕຸຜົງ ? ເຂົ້າໝົມໝໍ້ທອດ ຫລວງພຣະບາງ ມີປະຫວັດທີຍາວນານເຖິງສະໄຫມພຸທທະກາຣ

ເຄີຍອ່ານພຸດທະປະຫວັດ ທີ່ພໍ່ຄ້າສອງພີ່ນ້ອງຕະປຸດສະ ແລະ ພັນລິກະທີ່ກຳລັງລຳລຽງສິນຄ້າດ້ວຍ ໕໐໐ ເຫລັ້ມກວຽນ ຜ່ານມາໃກ້ສະຖານທີ່ພຣະພຸດທະເຈົ້າປະທັບສະເຫວີຍວິມຸດຕິສຸຂຈາກການຕັດສະຮູ້ໃໝ່ໆ ໃນແຄ້ວນອຸຣຸເວລາເສນານິຄົມ.

ເມື່ອນັ້ນທັງ ໒ ພີ່ນ້ອງ ໄດ້ນຳເອົາອາຫານຖວາຍແດ່ພຣະພຸດທະອົງຄ໌ ເຊິ່ງປະເພດຂອງອາຫານແມ່ນ ເຂົ້າສະຕຸກ້ອນ ສະຕຸຜົງ.

ທັງສອງຄົນນີ້ເປັນພໍ່ຄ້າຈາກເມືອງອຸກກະລະຊົນນະບົດ ເປັນບຸດຂອງກຸມພີ(ພໍ່ຄ້າເສດຖີ)ໃນອະສິຕັນຊະນະນະຄອນ,ທັງ໒ ໄດ້ກາຍເປັນທະເວວາຈິກະອຸບາສົກ ໝາຍເຖິງຸບາສົກຄູ່ທຳອິດທີ່ຢຶດຖື ຣັຕນະ ໒ ຄືເຂົ້າເຖິງພຣະພຸດ ແລະພຣະທັມ ຕໍ່ໜ້າພຣະພັກຂອງພຣະພຸດທະເຈົ້າ.

ເຫດໃດຈິ່ງວ່າ ຣັຕນະ໒ ກໍເນື່ອງຈາກວ່າ ຕອນນັ້ນພຣະພຸດທະເຈົ້າຕັດສະຮູ້ໃໝ່ໆ ບໍ່ທັນໄດ້ສະແດງທັມໂຜດໃຜເລີຍ ຈິ່ງຍັງບໍ່ທັນມີໃຜບວດເປັນພິກຂຸ ສະນັ້ນ ສັງຄະຣັຕນະຈິ່ງບໍ່ທັນມີ.

ດ້ວຍເຫດນີ້ເອງ ທັງສອງພີ່ນ້ອງຈິ່ງກາຍເປັນເອຕະທັກຄະ ໃນຄວາມເປັນເລີດທາງອຸບາສົກທີ່ມີໂອກາດໄດ້ເຂົ້າເຖິງສະຣະນະກ່ອນຜູ້ອື່ນ.

ໃນຕຳນານທາງພະມ້າ ໄດ້ກ່າວໄວ້ວ່າ ທັງສອງເປັນຊາວມອນມາຈາກນະຄອນຫລວງຢ້າງກຸ້ງ ເມື່ອໄດ້ຖວາຍອາຫານໃຫ້ແກ່ພຣະທະເຈົ້າແລ້ວ ພຣະອົງກໍໄດ້ປະທານພຣະເກສາ ໘ ເສັ້ນໃຫ້ເພື່ອເປັນທີ່ລະນຶກ ຈາກນັ້ນທັງສອງຈິ່ງໄດ້ນຳພຣະເກສາໄປປະດິດສະຖານໄວ້ໃນເຈດີສະເວດາກອງ ໃນນະຄອນຫລວງຢ້າງກຸ້ງທີ່ຍັງຄົງຢູ່ໃນປັດຈຸບັນນີ້.

ເຂົ້າສະຕຸກ້ອນສະຕຸຜົງທີ່ວ່ານີ້ ຜູ້ຂຽນເອງນັບແຕ່ເກີດໄດ້ໃຫຍ່ມາ ກໍຫາກໍໄດ້ມີໂອກາດພົບພໍ້ເປັນເທື່ອທຳອິດ ຢູ່ນະຄອນຫລວງພຣະບາງນີ້ເອງ ດັ່ງທີ່ເຫັນຢູ່ໃນຮູບ.ເຫດໃດຜູ້ຂຽນຈິ່ງຮູ້ວ່າ ເຂົ້າສະຕະກ້ອນ ສະຕຸຜົງ ເພາະວ່າຜູ້ນັ່ງຮ່ວມພາດຽວກັນມີພຣະພະມ້າທີ່ຢູ່ໃກ້ຊາຍແດນອິນເດຍ ແລະຖືພາດສະປອດອິນເດຍເອີ່ຍຂຶ້ນວ່າ “ສະຕຸ ສະຕຸ” ຫລັງຈາກທີ່ຂ້າພະເຈົ້າໄດ້ຍື່ນເຂົ້າໜົມນີ້ໃຫ້ສັນ.

ປ.ລ.ໃນປະເທດລາວ ມີເຂົ້າສະຕຸກ້ອນສະຕຸຜົງ ຄົງຈະຢູ່ແຂວງຫລວງພຣະບາງແຫ່ງດຽວເທົ່ານັ້ນ

(ຈົບການພັນລະນາໄວ້ພຽງສຳ່ນີ້)

ຮູບພາບແລະບົດຄວາມ ຈາກພຣະອາຈາຣຍ໌ ໄຊຍະເດດ ວົງໂສພາ : Sayadej VP ໃນວັນທີ 24/10/2019 ໃນໂຄງການທັມມະຍາດຕາ 5 ແຜ່ນດິນ ທີຄະນະສົງເພິ່ນເດິນທາງໃສຢ້ຽມຢາມແຂວງຫລວງພຣະບາງ ແລະໄດ້ມີໂອກາດສັນເຂົ້າຫມໍ້ທອດ ມື້ນີ້ຈຶ່ງຮູ້ທີມາທີໄປປະຫວັດຂອງຄວາມເປັນມາຂອງເຂົ້າໜົມແບບນີ້ແລ.