ຊ່າງສີມືດີ ດັງກ້ອງທົ່ວອາຊຽນ ຜະ​ລິດ​ຕະ​ພັນ​ຂອງ​ຄົນ​ລາວ ຫັດ​ຖະ​ກຳ​ອັນ​ລ້ຳ​ຄ່າ “ຊ້ານໍ້າກ້ຽງ”

ຊ່າງສີມືດີ ດັງກ້ອງທົ່ວອາຊຽນ ຜະ​ລິດ​ຕະ​ພັນ​ຂອງ​ຄົນ​ລາວ ຫັດ​ຖະ​ກຳ​ອັນ​ລ້ຳ​ຄ່າ “ຊ້ານໍ້າກ້ຽງ”

20th August 2020 0 By Admin

ບໍ່ແມ່ນເລື່ອງງ່າຍພໍເທົ່າໃດ ແລະ ບໍ່ແມ່ນເລື່ອງຍາກອີກຖ້າສິ່ງທີ່ເຮົາເຮັດມາຈາກໃຈຢ່າງແທ້ຈິງທີ່ທັງເຮັດທັງຮຽນໄປນຳທັງອົດທົນເຖິງທີ່ສຸດ ຄວາມຫວັງທີ່ຕັ້ງໄວ້ຄົງສຳເລັດ ດັ່ງຊາຍໜຸ່ມໄວ 30 ປີ ຢູ່ບ້ານຊຽງທອງຄີລີ ນະຄອນຫລວງພະບາງ ແລະ ເຖິງວ່າເປັນພະນັກງານ ສັງກັດຢູ່ຫ້ອງວ່າການນະຄອນ ຫລວງພະບາງ, ແຕ່ກໍ່ໄດ້ໃຊ້ເວລາວ່າງນອກໂມງການ ແລະ ວັນພັກ ຜະລິດຊ້ານໍ້າກ້ຽງ ຟອກແຜ່ນຄຳປີວແທ້ ໂດຍມີເຄື່ອງໝາຍການຄ້າ (brand) ວ່າ: “ຊຽງທອງຫັດຖະກຳ”. ປັດຈຸບັນ ຊ້ານໍ້າກ້ຽງ ພວມໄດ້ຮັບຄວາມນິຍົມຢ່າງຫລວງຫລາຍທັງໃນປະເທດກໍ່ຄືອະນຸພາກພື້ນ ແລະ ສາກົນ.

ໄຊຍະແສງ ພັນທະວົງ ຜູ້ບໍລິຫານຜະລິດຕະພັນດັ່ງກ່າວ ແລະ ແຮງງານ 6 ຄົນ, ຍິງ 2 ຄົນ ໄດ້ຮ່ວມກັນສ້າງສັນຜົນງານມາຈາກໃຈຢ່າງແທ້ຈິງ ເວົ້າວ່າ: ການເຮັດອາຊີບເສີມນີ້ຍ້ອນມີໝູ່ຄູ່ຢູ່ຕ່າງແຂວງ ສົນໃຈສັ່ງຊື້ ຜະລິດຕະພັນຊ້ານໍ້າກ້ຽງ ຢູ່ແຂວງຫລວງພະບາງ ເປັນຈຳນວນຫລາຍ ຈຶ່ງຢາກທົດລອງເຮັດເບິ່ງ ແລະ ແຮງບັນດານໃຈສັ່ງໃຫ້ເຮັດແທ້ ເມື່ອມື້ໜຶ່ງຂອງປີ 2015 ໄດ້ຍ່າງເລາະຫລິ້ນຕະຫລາດກາງຄືນ ນະຄອນຫລວງພະບາງ ພໍດີຫລຽວເຫັນແມ່ຄ້າຂາຍຜະລິດຕະພັນຊ້ານໍ້າກ້ຽງ ຈຶ່ງຖາມລາຄາ ຊຶ່ງຕອນນັ້ນ 4-6 ແສນກີບຕໍ່ໜ່ວຍ.

ມາຮອດປີ 2016 ຜະລິດຕະພັນ​ຊ້ານໍ້າກ້ຽງ ໄດ້ຮັບຄວາມນິຍົມຫລາຍຂຶ້ນ ຜູ້ຜະລິດກໍ່ເພີ່ມຂຶ້ນ ແຕ່ບໍ່ໄດ້ມາດຕະຖານ, ຄຸນນະພາບຕໍ່າ ລາຄາຫລຸດລົງ 1-3 ແສນກີບຕໍ່ໜ່ວຍ ເພາະວ່າຜູ້ຜະລິດບໍ່ໄດ້ໃສ່ໃຈລາຍລະອຽດຂອງລວດລາຍ, ເຮັດແບບງ່າຍໆຄື ເອົາຂີ້ເລື່ອຍປະສົມກັບກາວລາເຕັກ ຂຶ້ນເປັນຮູບຊ້າ ຕິດດອກແລ້ວພົ່ນສີນໍ້າຄຳທຳມະດາ.

.

ນີ້ຄືຈຸດທີ່ຖາມໂຕເອງວ່າ: ຫັດຖະກໍາສີມືທີ່ເນັ້ນຄວາມລະອຽດອ່ອນ ແລະ ປານີດທັງເປັນເອກະລັກຂອງເມືອງມໍລະດົກໂລກຫລວງພະບາງ ເປັນຫຍັງຈຶ່ງປ່ອຍໃຫ້ລາຄາຖືກຂະໜາດນີ້. ຈາກນີ້ຈຶ່ງໃຊ້ເວລາວ່າງຕອນເລີກການ ແລະ ວັນພັກໃຫ້ເປັນປະໂຫຍດໂດຍການສຶກສາຄົ້ນຄວ້າຜະລິດຕະພັນຊ້ານໍ້າກ້ຽງ ໃນສະໄໝກ່ອນທັງໄດ້ຂໍຄຳປຶກສານຳຜູ້ມີປະສົບການເພື່ອຜະລິດ ແລະ ສັນຍາວ່າຕ້ອງເຮັດໃຫ້ແໜ້ນໜາ, ງາມແວວວາວ ແລະ ແຕກຕ່າງຈາກທີ່ວາງຂາຍຕາມທ້ອງຕະຫລາດທົ່ວໄປ.

ໃນທີ່ສຸດກໍໄດ້ຖາມ ແລະ ຮຽນຮູ້ຂັ້ນຕອນການຜະລິດກັບນາຍຊ່າງທີ່ຮຽນຈົບສະເພາະນໍ້າກ້ຽງ ແລະ ຝາ ຈິ່ງຮູ້ວ່າ ເມື່ອກ່ອນ ເພິ່ນໃຊ້ເຖົ່າຖ່ານໄຟມາຜະລິດໂດຍເອົາເຖົ່າຖ່ານໄຟ (ຂີ້ເຖົ່າ) ມາເຂີງໃຫ້ລະອຽດ ແລະ ນຳໄປແຊ່ນໍ້າໄວ້ 1 ຄືນ ເພື່ອໃຫ້ຂີ້ເຖົ່ານອນແລ້ວກໍ່ເຫຍັ້ນນໍ້າຖິ້ມ, ຈາກນັ້ນກໍ່ເອົາຂີ້ເຖົ່ານັ້ນຖອກໃສ່ຖົງຫ້ອຍໄວ້ໃຫ້ສະເດັດນໍ້າແລ້ວນຳເອົາມາປະສົມກັບ ນໍ້າກ້ຽງ ໂປ້ໃສ່ກະຊ້າໄມ້ໄຜ່ທີ່ສານແລ້ວ ຂຶ້ນເປັນຮູບເປັນຮ່າງ ຕາມຕ້ອງການ ແລ້ວນຳໄປຕາກແດດຈົນແຫ້ງດີ ຈິ່ງເອົາມາຕິດດອກຂະມຸກ (ລວດລາຍຕ່າງໆ) ແລະ ຟອກດ້ວຍແຜ່ນຄຳປີວ.

.

ການຜະລິດແບບດັ້ງເດີມນີ້ ງາມຫລາຍ, ເງົາເຫລື້ອມທົນທານ ແລະ ແໜ້ນໜາດີ. ພາຍຫລັງຮຽນຮູ້ແລ້ວ ກໍ່ໃຊ້ທຶນຕົນເອງ 5 ລ້ານກີບ ຊື້ວັດຖຸດີບມາຜະລິດທົດລອງ 20 ໜ່ວຍ ໃຊ້ເວລາ 2 ເດືອນ ແລ້ວນຳມາຂາຍຢູ່ຕະຫລາດ ພາຍໃນແຂວງ, ສະເລ່ຍແລ້ວໜ່ວຍໜຶ່ງ 1.300.000 ກີບ.

ເມື່ອເຫັນວ່າສັງຄົມສົນໃຈຫລາຍຈົນບໍ່ພໍຂາຍ, ໄຊຍະແສງ ຈິ່ງເອົາເງິນທີ່ຂາຍໄດ້ໄປຊື້ວັດຖຸດິບ ມາຜະລິດເພີ່ມເປັນ 35 ໜ່ວຍ ແລ້ວນຳມາຂາຍຢູ່ບຸນພະທາດຫລວງວຽງຈັນ ແລະ ຂາຍ 3 ວັນກໍ່ໝົດ. ຈາກຄວາມນິຍົມຊົມຊອບຂອງສັງຄົມ ຈິ່ງໄດ້ຮັບເຊີນເຂົ້າຮ່ວມວາງສະແດງເຄື່ອງຫັດຖະກໍາສີມືລາວ ທັງຢູ່ພາຍໃນແຂວງ ແລະ ຕ່າງແຂວງ.

ນອກນີ້ ຍັງໄດ້ຜະລິດຫົວໂຂນ, ຂອບຮູບ, ກັບເຈ້ຍອະນາໄມ, ໂຖດອກໄມ້ ທີ່ເປັນຜະລິຕະພັນໃໝ່ ຊຶ່ງທຸກຢ່າງໄດ້ຕິດດອກລາຍລາວ ແລະຟອກດ້ວຍຄຳປີວໝົດ, ເປັນຜະລິດຕະພັນທີ່ສ້າງຄວາມສົນໃຈໃຫ້ແກ່ແຂກຕ່າງດ້າວທ້າວຕ່າງເມືອງທີ່ມາຢ້ຽມຢາມຫລວງ ພະບາງ.

“ປີ 2018 ໄດ້ເພີ່ມກິດຈະການກ່ຽວກັບໃບຕອງ ຫລື ການຈັດພາຂວັນແບບຄົບວົງຈອນ ເຊັ່ນ: ພາຂວັນແຕ່ງດອງ, ສູ່ຂວັນທົ່ວໄປ, ພາສູດຂຶ້ນເຮືອນໃໝ່ ແລະ ອື່ນໆ ທີ່ຕິດພັນກັບສາສະໜາ ແລະຮີດ ຄອງປະເພນີຂອງຊາວຫລວງພະບາງ. ສະເລ່ຍແລ້ວເດືອນໜຶ່ງໄດ້ຮັບ 8 ວຽກ ລາຄາແຕ່ 1.500.000-3.500.000 ກີບ ໂດຍນຳໃຊ້ຜະລິດຕະພັນຫັດຖະກຳນໍ້າກ້ຽງຟອກດ້ວຍຄຳປີວຂອງຮ້ານທັງໝົດ ແລະ ສະເລ່ຍແລ້ວປີໜຶ່ງສ້າງລາຍຮັບໄດ້ 180 ລ້ານກີບ” ໄຊຍະແສງ ກ່າວ.

ຍ້ອນຄວາມອົດທົນ, ດຸໝັ່ນ ແລະ ການສະແຫວງຫາຄວາມຮູ້ມາພັດທະນາຜະລິດຕະພັນຂອງຕົນເລື້ອຍໆ ຈິ່ງເຮັດໃຫ້ ໄຊຍະແສງ ໄດ້ຮັບລາງວັນ “ຫັດຖະກຳສີມືອາຊຽນ (Best of ASEAN) ໃນປີ 2020 ຊຶ່ງເປັນລາງວັນທີ່ລາວພາກພູມໃຈທີ່ສຸດ. ເອົາເປັນວ່າຖ້າທ່ານສົນໃຈຢາກໄດ້ຜະລິດຕະພັນຂອງ ໄຊຍະແສງ ຫລື ຢາກສຶກສາ ຮຽນຮູ້, ແລກປ່ຽນບົດຮຽນ ຮັບຮອງວ່າບໍ່ຜິດຫວັງໂດຍຮ້ານຕັ້ງຢູ່ບ້ານວິຊຸນ (ສີ່ແຍກຄອກງົວ) ນະຄອນ ຫລວງພະບາງ ແຂວງຫລວງພະບາງ.

ໂດຍ: ດາວອນ ມະນີວັນ