ສາວໄວ 33 ປີ ຖິ້ມວຽກປະຈຳ ຫັນມາປູກສີໃຄຂາຍ ມີເງິນ 30 ລ້ານຕໍ່ເດືອນ

ສາວໄວ 33 ປີ ຖິ້ມວຽກປະຈຳ ຫັນມາປູກສີໃຄຂາຍ ມີເງິນ 30 ລ້ານຕໍ່ເດືອນ

29th November 2019 0 By Admin

ບໍ່ວ່າຈະປະກອບອາຊີບໃດກໍ່ຕາມ ລ້ວນແຕ່ໄດ້ຜົນຕອບແທນກັນທັງນັ້ນ, ຈະນ້ອຍ ຫຼື ຫຼາຍ ມັນຂຶ້ນກັບໜ້າວຽກ, ກາລະໂອກາດ, ຄວາມເໝາະສົມ ແລະ ເວລາ. ເຊິ່ງເຮົາບໍ່ສາມາດກະລັນຕີໄດ້ວ່າ ວຽກທີ່ເຮົາເຮັດໃນປັດຈຸບັນນີ້ ຈະເຮັດໃຫ້ເຮົາໄດ້ຂຶ້ນດີ ຫຼື ບໍ່ດີ. ເພາະສະນັ້ນ, ການຈະປະກອບອາຊີບໜຶ່ງ ຫຼື ລົງມືເຮັດທຸລະກິດໃດໜຶ່ງເປັນຂອງຕົນເອງ ຕ້ອງເບິ່ງເວລາ, ຄວາມເໝາະສົມ ແລະ ຊ່ອງທາງທີ່ສາມາດສ້າງລາຍໃຫ້ເຮົາໄດ້ ດັ່ງເລື່ອງລາວຂອງສາວໄວ 33 ປີ ທ່ານນີ້ ທີ່ຈັງຫວັດ ມະຫາສະລະຄາມ ປະເທດໄທ ທີ່ພິກດິນນາ 30 ໄລ່ ມາປູກສີໃຄຂາຍ ສ້າງລາຍໄດ້ 1 ແສນບາດຕໍ່ເດືອນ ຫຼື ປະມານ 30 ລ້ານກີບ.

ນາງ ກິດສະນາ ຊ່າງຢາ ອາດີດພະນັກງານຫ້ອງການຖິ້ມວຽກປະຈໍາສູ່ອາຊີບກະເສດຕະກອນ ປ່ຽນແປງຜືນນາກ່ວາ 30 ໄລ່ ປູກຫົວສີໃຄ 3 ສາຍພັນ ທັງຫົວສົດ ແລະ ຕາກແຫ້ງ ສ້າງລາຍໄດ້ 1 ແສນບາດ ຫຼື 30 ກ່ວາລ້ານກີບ ຕໍ່ເດືອນ. ຫຼ້າສຸດເລັງສົ່ງອອກຫົວສີໃຄຕັດໃບໄປຍັງປະເທດຈີນເພື່ອເຮັດຊາ.

ກິດສະນາ ຊ່າງຢາ ກ່າວວ່າ: ກ່ອນໜ້ານີ້ ຕົນເອງເຮັດອາຊີບເປັນພະນັກງານຫ້ອງການ ຄວບຄູ່ກັບການປູກຕົ້ນດາວເຮືອງຕັດດອກຂາຍສົ່ງຕະຫຼາດໄທ, ຕໍ່ມາໄດ້ເຫັນຕະຫຼາດການຂາຍຫົວສີໃຄ ທີ່ມີໂອກາດສ້າງລາຍໄດ້ເພີ່ມໃຫ້ຄອບຄົວ ຈຶ່ງລອງປຶກສາກັບຄອບຄົວ ແລະ ທົດລອງປູກ, ໂດຍແບ່ງດິນນາເກົ່າມາຂຸດຮ່ອງເຮັດໜານປູກ. ຫຼັງຈາກນັ້ນ, ບໍ່ດົນການສັ່ງຊື້ຫົວສີໃຄໃນສວນເພີ່ມຂຶ້ນ ເຮັດໃຫ້ຕັດສິນໃຈລາອອກຈາກວຽກປະຈໍາ ມາປູກຫົວສີໃຄຂາຍແບບເຕັມຕົວ ໂດຍລົງທຶນປັບທີ່ນາ 30 ໄລ່ມາປູກຫົວສີໃຄ 3 ສາຍພັນຄື: ຫົວສີໃຄແດງ ເຊິ່ງເປັນພັນພື້ນບ້ານ, ຫົວສີໃຄຂາວກະເສດ ແລະ ຫົວສີໃຄຢວກ.

ສ່ວນລູກຄ້າສ່ວນຫຼາຍເປັນກຸ່ມກະສິກໍາອາຫານ ໄດ້ແກ່ໂຮງງານເຮັດພິກແກງ, ໂຮງງານຜະລິດຜົງປຸງລົດໝີ່ສໍາເລັດຮູບ, ນອກຈາກນີ້ຍັງມີກຸ່ມວິສາຫະກິດຊຸມຊົນຮັບຫົວສີໃຄຕາກແຫ້ງ ໄປເຮັດວັດຖຸດິບສະໝຸນໄພ ຫຼື ລູກປະຄົບ ແລະ ກໍາລັງຈະເປີດຕະຫຼາດໃໝ່ຄື ຫົວສີໃຄຕັດໃບ ທີ່ມີຄໍາສັ່ງຊື້ຈາກ ສປ ຈີນ ເພື່ອເຮັດຊາໃບຫົວສີໃຄ ທີ່ກໍາລັງເປັນທີ່ນິຍົມຫຼາຍໃນໝູ່ຊາຫົວສີໃຄ.


ກິດສະນາ  ບອກວ່າ: ສໍາລັບວິທີການປູກ ແລະ ດູແລຮັກສາບໍ່ມີຫຍັງຍາກ ເຊິ່ງເຄັດລັບການປູກຂອງສວນແຫ່ງນີ້ແມ່ນເລີ່ມຈາກໄຖຕີໜານ, ພູນດິນ, ແລ້ວກຽມແນວປູກ ທີ່ຕັດໃບອອກໃຫ້ເຫຼືອຕົ້ນຍາວປະມານ 30-40 ຊັງຕີແມັດ ນໍາມາໄວ້ບ່ອນຮົ່ມ ແລະ ຫົດນໍ້າ ເຊົ້າແລງປະມານ 3-5 ວັນ ເພື່ອໃຫ້ຮາກງອກ. ເມື່ອຮາກແກ່ເຕັມທີ່ແລ້ວມັນຈະກາຍເປັນສີເຫຼືອງເຂັ້ມ ຫຼັງຈາກນັ້ນຈຶ່ງນໍາໄປປູກໃນໜານໂດຍເວັ້ນໄລຍະຫ່າງແຕ່ລະກໍກ້ວາງຄູນຍາວ1×1 ແມັດ. ຖ້າເປັນໂຕຕັດໃບ ຈະຫຼຸດໄລຍະຄວາມກ້ວາງຂອງຮ່ອງ ແລະ ຕົ້ນລົງມາເຫຼືອ 50×70ຊັງຕີແມັດ ສ່ວນການວາງຕົ້ນພັນ ໃຫ້ວາງອຽງ 45ອົງສາ ໄປດ້ານໃດດ້ານໜຶ່ງແລ້ວຖົມດິນ. ຊ່ວງ 2 ອາທິດທໍາອິດ ຈະຕ້ອງຫົວນໍ້າສະໝໍ່າສະເໝີ ມື້ລະ 2ຄັ້ງ, ເຊົ້າແລງ ຈົນມັນແຕກໃບ ແລ້ວຫົດວັນລະຄັ້ງກໍ່ໄດ້.

ອາຍຸການເກັບກ່ຽວຫົວ ໃຊ້ເວລາ 6 ເດືອນ, ຕັດໃບ 3 ເດືອນເຊິ່ງສາມາດຕັດໄດ້ຕໍ່ເນື່ອງເຖິງ 2 ປີ. ການປູກໃນເນື້ອທີ່ 30 ໄລ່ ສາມາດສົ່ງຫົວສີໃຄແບບຫົວສົດໃຫ້ໂຮງໄດ້ ອາທິດລະ 10 ໂຕນ. ນອກຈາກນີ້, ຍັງມີຫົວສີໃຄຕາກແຫ້ງອີກເດືອນລະຫຼາຍ 100 ກິໂລ ສະເລ່ຍຍອດຂາຍຕໍ່ເດືອນ 1 ແສນບາດ ຫຼືປະມານ 30 ລ້ານກີບ, ປັດຈຸບັນໄດ້ຂະຫຍາຍເຄືອຂ່າຍຜູ້ປູກພາຍໃນແຂວງ ແລະ ແຂວງໃກ້ຄຽງ ລວມພື້ນທີ່ ຫຼາຍກ່ວາ 100 ໄລ່ ແຕ່ກໍຍັງບໍ່ພຽງພໍຕໍ່ຄວາມຕ້ອງການຂອງລູກຄ້າ

ທີ່ມາ: http://www.saraknews.net/