ແຂວງສາລະວັນ ເລີ່ມຂຶ້ນທະບຽນພຣະພຸດທະຮູບ ຄັ້ງທຳອິດ ຢູ່ວັດສີມຸງຄຸນ(ວັດກາງ)

ແຂວງສາລະວັນ ເລີ່ມຂຶ້ນທະບຽນພຣະພຸດທະຮູບ ຄັ້ງທຳອິດ ຢູ່ວັດສີມຸງຄຸນ(ວັດກາງ)

12th August 2020 0 By Admin

ເພື່ອເຮັດໃຫ້ການຄຸ້ມຄອງ ແລະ ປົກປັກຮັກສາວັດຖຸເກົ່າແກ່ ທີ່ມີຄຸນຄ່າທາງດ້ານຈິດໃຈ ຂອງທ້ອງຖີ່ນໃຫ້ ຍຶນຍົງ ໄວ້ເຊັ່ນລູກເຊັ່ນຫຼານ ເປັນຕົ້ນ: ແມ່ນພຣະພຸດທະຮູບ ທີ່ເປັນມໍລະດົກຂອງຊາດ ກໍ່ຄືຂອງທ້ອງຖີ່ນ ແລະ ເປັນທີ່ຂາບໄຫວ້ສັກລະບູຊາ. ທັງເປັນການຂຶ້ນບັນຊີພຣະພຸດທະຮູບເກົ່າແກ່, ວັດຖຸບູຮານຕ່າງໆ ກະກຽມຮອງຮັບເອົາຫໍພຣະໄຕປີດົກ ວັດກາງ ເປັນມໍລະດົກຂອງທ້ອງຖີ່ນ ກໍຄືແຂວງສາລະວັນ.

ມາໃນວັນທີ 11 ສິງຫາ 2020 ນີ້ຢູ່ທີ່ວັດສີມຸງຄຸນ (ວັດກາງ) ເມືອງ ແລະ ແຂວງສາລະວັນ ໄດ້ມີກອງປະຊຸມປຶກສາຫາລື ກ່ຽວກັບການຂຶ້ນທະບຽນພຣະພຸດທະຮູບ, ໂດຍການເຂົ້າຮ່ວມຂອງ ພຣະອາຈານ ດ່ອງ ດາວະດິງ ເຈົ້າຄະນະເມືອງສາລະວັນ, ທ່ານ ມະໄລວອນ ສີປະເສີດ ຮັກສາການຫົວໜ້າພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງສາລະວັນ, ມີຫົວໜ້າຫ້ອງການ ອພສ ແຂວງ, ເຈົ້າອະທິການວັດສີມຸງຄຸນ, ຂະແໜງການ, ອົງການທີ່ກ່ຽວຂ້ອງຂັ້ນແຂວງ, ເມືອງ ຕະຫຼອດຮອດອໍານາດການປົກຄອງບ້ານເຂົ້າຮ່ວມ.


ການປຶກສາຫາລືໃນຄັ້ງນີ້, ກໍ່ເພື່ອແນໃສ່ອຳນວຍຄວາມສະດວກໃນການເກັບກຳຂໍ້ມູນ ພຣະພຸດທະຮູບ, ວັດຖຸເກົ່າບູຮານ ພາຍໃນວັດ ແລະ ຂຶ້ນທະບຽນເປັນມໍລະດົກຂອງທ້ອງຖີ່ນ ອຳນວຍຄວາມສະດວກໃນການຕິດຕາມ, ຄຸ້ມຄອງປົກປັກຮັກສາ ໄວ້ໃຫ້ຍຶນຍົງ ແລະ ຖືກຕ້ອງຕາມລະບຽບກົດໝາຍ. ນອກນັ້ນຍັງເປັນຖານຂໍ້ມູນທີ່ສຳຄັນ ທີ່ເປັນອົງປະກອບໃຫ້ແກ່ການກະກຽມທີ່ຈະຮັບຮອງເອົາ ຫໍພຣະໄຕປີດົກ ວັດກາງ ເມືອງ ແລະ ແຂວງສາລະວັນ ເປັນມໍລະດົກຂອງທ້ອງຖີ່ນ ກາຍເປັນສະຖານທີ່ສູນລວມຈິດໃຈ ທີ່ມີຄຸນຄ່າງທາງດ້ານວັດທະນະທຳ, ປະເພນີ ແລະ ເປັນແຫຼ່ງທ່ອງທ່ຽວທາງດ້ານວັດທະນະທຳ ທີ່ສຳຄັນ.

ການລົງປະຕິບັດຕົວຈິງ ຄັ້ງນີ້ແມ່ນໄດ້ບັນທຶກພາບພຣະພຸດທະຮູບແຕ່ລະອົງ ຕິດໃສ່ແບບຟອມ, ເກັບກຳປະຫວັດ, ປະເມີນອາຍຸ ແລະ ມີການວັດແທກຂະໜາດສ່ວນຕ່າງໆ, ຊັ່ງນ້ຳໜັກ ແລະ ອື່ນໆຢ່າງລະອຽດ ຕາມເຕັກ. ໄລຍະຜ່ານມາແມ່ນໄດ້ມີການສຳຫຼວດ ແລະ ເກັບຂໍ້ມູນແລ້ວ ໃນປີ 2012 ໂດຍມີພຣະພຸດທະຮູບທັງໝົດ 110 ອົງ.

.

ນອກນັ້ນຈາກນັ້ນ, ບັນດາທ່ານຄະນະກຳມະການ ຜູ້ເຂົ້າຮ່ວມກອງປະຊຸມ ກໍ່ໄດ້ປະກອບຄຳຄິດເຫັນ ກ່ຽວກັບຮູບແບບການຈັດຕັ້ງປະຕິບັດ, ການຄຸ້ມຄອງ ແລະ ປົກປັກຮັກສາ.

.
ສຳລັບແຜນການຈັດຕັ້ງປະຕິບັດໃນການຂຶ້ນທະບຽນພຣະພຸດທະຮູບ ຫຼັງຈາກສຳເລັດການເກັບກຳຂໍ້ມູນ, ຂຶ້ນທະບຽນສຳເລັດ ຢູ່ວັດສີມຸງຄຸນ (ວັດກາງ) ເມືອງສາລະວັນ, ກໍ່ຈະໄດ້ສືບຕໍ່ລົງສຳຫຼວດ ແລະ ເກັບກຳຂໍ້ມູນ ຢູ່ວັດພຣະບາດ ບ້ານນາດູ່ ເມືອງລະຄອນເພັງ ແຂວງສາລະວັນ.

.
ຂ່າວພາບ: ວິໄລວອນ ສິດທິໄຊ