ທ່ານນາງ ແສງເດືອນ ພ້ອມຄະນະ ເດີນທາງເຖິງນະຄອນຫລວງມະນີລາ​ ເຂົ້າຮ່ວມງານມະຫະກຳກິລາຊີເກມ​ຄັ້ງທີ​ 30​

ທ່ານນາງ ແສງເດືອນ ພ້ອມຄະນະ ເດີນທາງເຖິງນະຄອນຫລວງມະນີລາ​ ເຂົ້າຮ່ວມງານມະຫະກຳກິລາຊີເກມ​ຄັ້ງທີ​ 30​

28th November 2019 0 By Admin

ທ່ານ​ ນາງ​ ແສງເດືອນ​ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ​ ກິລາ​ ທັງເປັນປະທານຄະນະກຳມະການໂອແລມປິກແຫ່ງຊາດລາວ, ທ່ານ ສົມພູ ພົງສາ ຜູ້ຊ່ວຍລັດຖະມົນຕີ ທັງເປັນຮອງປະທານ ແລະ ເລຂາທິການ ຄະນະກຳມະການໂອແລມປິກແຫ່ງຊາດລາວ, ທ່ານແສງພອນ ພົນອາມາດ ຫົວໜ້າກົມກິລາລະດັບສູງ ເປັນຫົວໜ້າຄະ​ນະ​ນຳ​ທັບ​ນັກ​ກິ​ລາ​ທີມ​ຊາດ​ລາວ​ ພ້ອມດ້ວຍຄະນະ ໄດ້ເດີນທາງເຖິງ​ ນະຄອນຫລວງມະນີລາ​ ປະເທດຟີລິບປິນ ເປັນທີ່ຮຽບຮ້ອຍ

ເພື່ອເຂົ້າຮ່ວມງານມະຫະກຳກິລາຊີເກມ​ຄັ້ງທີ​ 30​ ທີ່ ປະເທດ​ຟີລິບປິນ​ ຮັບ​ກຽດ​ເປັນ​ເຈ​ົ້າ​ພາບ ລະ​ຫວ່າງວັນ​ທີ 30 ພະ​ຈິກ ຫາ 11 ທັນ​ວາ 2019.


ໃນ​ງານ​ມະ​ຫາ​ກຳ​ກິ​ລາ​ຊີ​ເກມ ປີນີ້ ສ​ປ​ປ ລາວ ສົ່ງ​​ຄະ​ນະ​ນຳ​, ກຳ​ມະ​ການ​ຕັດ​ສິນ, ຄູ​ຝຶກ ແລະ ທັບ​ນັກ​ກິ​ລາ ຈາກ 24 ປະ​ເພດ​ກິ​ລາ ​300 ກວ່າຄົນ, ໃນ​ນັ້ນ ​ສະ​ເພາະໝວດ​ກິ​ລາ​ທີ່​ເຄີຍ​ມີ​ມູນ​ເຊື້ອ​ໄດ້​ຫຼຽ​ນ​ຄຳ ມາ​ແລ້ວ ແມ່ນ​​ນຳ​ໃຊ້​ງົບປະ​ມານ​ຂອງລັດ​ຖະ​ບານ ​ຈຳ​ນວນ 18 ປະ​ເພດ​ກິ​ລາ ຈາກ​ທັງ​ໝົດ 230 ຄົນ

ປະ​ກອບ​ມີ​ ເປ​ຕັງ, ບິນ​ລຽດ-ສະ​ນຸກ​ເກີ, ວູ​ຊູ, ກະ​ຕໍ້, ປັນ​ຈັກ​ສີ​ລັດ, ລົດ​ຖີບ, ຍິງ​ທະ​ນູ, ຢູ​ໂດ, ມວຍສາ​ກົນ, ມວຍ​ລາວ, ມວຍ​ປ້ຳ, ລອຍ​ນ້ຳ, ແລ່ນ-ລານ, ເທ​ຄວັນ​ໂດ, ກາ​ຣາ​ເຕ​ໂດ້, ຍົກ​ນ້ຳ​ໜັກ, ຄິກ​ບ໋ອກ​ຊີງ ແລະ ພິ​ເສດ​ແມ່ນ​ກິ​ລາ​ຜ່ານ​ສິ່ງກີດ​ຂວາງ ເປັນ​ກິ​ລາ​ຮູບ​ແບບ​ການ​ທະ​ຫານ

ເຊິ່ງ​ເຈົ້າ​ພາບ​ຮຽກ​ຮ້ອງ​ຂໍ​ຄວາມ​ຮ່ວມ​ມື​ໃຫ້​ເຂົ້າ​ຮ່ວມ​ໂດຍ​ທາງເຈົ້າພາບ​​ຮັບ​ຜິດ​ຊອບ​ຄ່າ​ເດີນ​ທາງ​ໄປ​ກັບ ແລະ ທີ່​ພັກ​ອາ​ຫານ ສ່ວນ​ໝວດ​ບັນ​ດາ​ສະ​ຫະ​ພັນ​ກິ​ລາ​ແຫ່ງ​ຊາດ ຮັບ​ຜິດ​ຊອບ​ກຸ້ມ​ຕົນ​ເອງທາງ​ດ້ານ​ງົບ​ປະ​ມານ ມີ 6 ປະ​ເພດ​ກິ​ລາ ຈາກ​ທັງ​ໝົດຈຳ​ນວນ 140 ຄົນ ມີ​ຄື ກ໋ອບ, ຣັກ​ບີ້, ອີ​ສະ​ປອດ, ບານ​ເຕະ​ຊາຍ, ເທັນ​ນິດ ແລະ ຊ໋ອບ​ເທັນ​ນິດ.
ສປປລາວ​ ຕັ້ງຄວາມຫວັງໄວ້ 2 ຫລຽນຄຳ.​