ຂອບໃຈເຈົ້າໜ້າທີ່! ເດັກຊາຍຖືກແມ່ເລາະຈ່າວຂາຍ ປັດຈຸບັນໄດ້ກັບຄືນບ້ານເກີດແລ້ວ

ຂອບໃຈເຈົ້າໜ້າທີ່! ເດັກຊາຍຖືກແມ່ເລາະຈ່າວຂາຍ ປັດຈຸບັນໄດ້ກັບຄືນບ້ານເກີດແລ້ວ

27th November 2019 0 By Admin

ກໍລະນີ ເກີດເຫດການ ມີແມ່ເລາະຈ່າວຂາຍລູກຢູ່ຕະຫຼາດບ້ານ ຫົວນາ ເມືອງ ນໍ້າບາກ ແຂວງ ຫຼວງພະບາງ ພາຍຫຼັງຄລິບວິດີຮໂອດັ່ງກ່າວໄດ້ຖືກເຜີຍແຜ່ອອກໄປ ຈົນກາຍເປັນທີ່ຕິດຕາ ແລະ ຖືກວິພາກວິຈານຈາກສັງຄົມ ກ່ຽວກັບການປະພຶດທີ່ບໍ່ເໝາະສົມ. ຈົນໃນທີ່ສຸດ, ເຈ້າໜ້າທີ່ເມືອງນໍ້າບາກ ແຂວງ ຫຼວງພະບາງ ໄດ້ລົງກວດກາ ແລະ ສືບຫາສາເຫດທີ່ໄປທີ່ມາ ຫຼັງຈາກນັ້ນທັງສອງແມ່ລູກກໍ່ໄດ້ກັບຄືນຖິ່ນຖານບ້ານເກີດຮຽບຮ້ອຍແລ້ວ.

ໃນວັນທີ 26 ພະຈິກ 2019 ອີງຕາມບົດລາຍງານຂອງກອງບັນຊາການ ປກສ ເມືອງນໍ້າບາກ ສະບັບເລກທີ 15/ປນຖ, ລົງວັນທີ 26 ພະຈິກ 2019 ໃຫ້ຮູ້ວ່າ:  ໃນວັນທີ 20 ພະຈິກ 2019 ມີພົນລະເມືອງດີຢູ່ບ້ານຫົວນາ  ໄດ້ໂທລະສັບແຈ້ວງເຈົ້າໜ້າທີ່ ປກສ ກຸ່ມນໍ້າຖ້ວມວ່າ ມີຄົນມາຈ່າວຂາຍເດັກນ້ອຍ ເມື່ອໄດ້ຮັບແຈ້ງເຫດຄືແນວນັ້ນ ເຈົ້າໜ້າທີ່ຈຶ່ງລົງກວດກາພິສູດແຫຼ່ງຂ່າວຕົວຈິງ ຈຶ່ງໄດ້ພົບເຫັນແມ່ຍິງ 1 ຄົນ ພ້ອມລູກຊາຍ 1 ຄົນ ຢູ່ຕະຫຼາດບ້ານຫົວນາ ຈຶ່ງເຊີນຜູ້ກ່ຽວມາຫ້ອງການເພື່ອສອບຖາມ.

ຜ່ານການສອບສວນຂອງເຈົ້າໜ້າທີ່ວິຊາສະເພາະ ຜູ້ກ່ຽວຊື່ ນາງ ເຮີຊົງ ອາຍຸ 29 ປີ ຊົນເຜົ່າມົ້ງ ຢູ່ບ້ານພູກູ້ ກຸ່ມນ້ຳງາ ເມືອງນ້ຳບາກ, ແຂວງຫຼວງພະບາງ ໄດ້ສ້າງຄອບຄົວກັບທ້າວຈໍວື ອາຍຸ 30 ປີ ຊົນເຜົ່າມົ້ງ ຢູ່ບ້ານພູກູ້ ມີລູກນຳກັນ 2 ຄົນ ຜູ້ທີ 1 ຊື່ທ້າວຊົງປໍວື ຜູ້ທີ 2 ເປັນເພດຍິງ (ບໍ່ຮູ້ຊື່) ແຕ່ໄດ້ຢ່າຮ້າງກັນແລ້ວໄດ້ 4 ປີ

ຕາມຜູ້ກຽ່ວລາຍງານໃນວັນທີ 20 ພະຈິກ 2019 ນາງເຮີຊົງ ກັບລູກຊາຍໄດ້ມາເລາະຫຼິ້ນຢູ່ຕະຫຼາດຫົວນາ ແລະ ກໍ່ໄດ້ຈ່າວຂາຍລູກຊາຍຂອງຜູ້ກ່ຽວ ຊື່ທ້າວຊົງປໍວື ອາຍຸ 7 ປີ ໃນລາຄາ 10,000,000 ກີບ (ສິບລ້ານກີບ) ໃຫ້ກັບແມ່ຄ້າຂາຍເຄື່ອງຢູ່ຕະຫຼາດ ບ້ານຫົວນາ ແຕ່ບໍ່ໄດ້ຂາຍ ເພາະເຈົ້າໜ້າທີ່ກຸ່ມບ້ານໄປຮອດກ່ອນ.

ຫຼັງຈາກນັ້ນ, ປກສ ກຸ່ມນ້ຳຖ້ວມ ,ເມືອງນ້ຳບາກ, ແຂວງຫຼວງພະບາງ ຈິ່ງປະສານຫາເຈົ້າໜ້າທີ່ກຸ່ມນ້ຳງາ ໃຫ້ຕິດຕໍ່ຫາຍາດພີ່ນ້ອງຂອງ ນາງເຮີຊົງ ຢູ່ບ້ານພູກູ້ ກຸ່ມນ້ຳງາ ເມືອງນ້ຳບາກ, ແຂວງຫຼວງພະບາງ ຮອດເວລາ 14:00 ໂມງ ກໍ່ມີພີ່ນ້ອງຂອງ ນາງ ເຮີຊົງ ຊື່ທ້າວເຢັງກົງຊົງ ອາຍຸ 35 ປີ ອາຊີບຊາວສວນ ຊົນເຜົ່າມົ້ງ ຢູ່ບ້ານຫົວນາ ໜ່ວຍ12 ເມືອງນ້ຳບາກ ໄດ້ມາຮັບເອົານາງ ເຮີຊົງ ພ້ອມກັບລູກຊາຍ ຊື່ທ້າວ ຊົງປໍວື ນຳເຈົ້າໜ້າທີ່ ປກສ ກຸ່ມນ້ຳຖ້ວມ ຄືນຖິ່ນຖານບ້ານເກີດແລ້ວ.