ຊາຍ​ໄວ 46 ປີ ຕັດ​ສິນ​ໃຈ​ເປີດ​ບ່ອນ​ຜະ​ລິດເຂົ້າປຸ້ນແຫ້ງ ສ້າງວຽກເຮັດງານທໍາ ສ້າງລາຍ​ຮັບຫຼາຍ​ກວ່າ 200 ລ້ານກີບ​ຕໍ່​ປີ

ຊາຍ​ໄວ 46 ປີ ຕັດ​ສິນ​ໃຈ​ເປີດ​ບ່ອນ​ຜະ​ລິດເຂົ້າປຸ້ນແຫ້ງ ສ້າງວຽກເຮັດງານທໍາ ສ້າງລາຍ​ຮັບຫຼາຍ​ກວ່າ 200 ລ້ານກີບ​ຕໍ່​ປີ

5th August 2020 0 By Admin

ຈາກຄວາມພະຍາຍາມ ແລະ ຄວາມຕັ້ງໃຈ ເພື່ອນໍາເອົາບົດຮຽນ ແລະ ປະສົບການທີ່ໄດ້ຮໍ່າຮຽນມາຖ່າຍທອດເຂົ້າໃນວຽກງານຕົວຈິງ ເພື່ອພັດທະນາຄອບຄົວໃຫ້ຫຼຸດພົ້ນອອກຈາກຄວາມທຸກຍາກ ແລະ ກ້າວໄປສູ່ພັດທະນາ ກາຍເປັນບໍລິສັດຜະລິດເສັ້ນເຂົ້າປຸ້ນແຫ້ງ ທີ່ຖືກຕ້ອງຕາມລະບຽບກົດໝາຍ, ສາມາດສ້າງວຽກເຮັດງານທໍາໃຫ້ແກ່ກໍາມະກອນມື້ໜຶ່ງເກືອບ 20 ຄົນ. ອີງໃສ່ເງື່ອນໄຂ ແລະ ກາລະໂອກາດທີ່ອໍານວຍ, ຄວາມຮຽກຮ້ອງຕ້ອງການຂອງຕະຫຼາດ ບວກໃສ່ຫົວຄິດປະດິດສ້າງ ແລະ ຄວາມດຸໝັ່ນຂະຫຍັນພຽນຂອງຄອບຄົວ.

ທ່ານ ຊົງປະດິດ ແກ້ວບົວ ອາຍຸ 46 ປີ ປະຈຸບັນຢູ່ ບ້ານ ສີເມືອງ ເມືອງໄຊຍະບູລີ ແຂວງໄຊຍະບູລີ; ພາຍໃນຄອບຄົວມີນໍາກັນ 4 ຄົນ ໄດ້ເວົ້າສູ່ຟັງວ່າ: ກ່ອນຈະມາເຖິງຈຸດນີ້ໄດ້ ເມື່ອກ່ອນຕົນເອງໄປຮໍ່າຮຽນສຶກສາຢູ່ປະເທດຈີນ ຈາກນັ້ນຈົບມາຢູ່ບ້ານເລີຍທໍາທຸລະກິດຄ້າຂາຍຍ່ອຍ ແລະ ສົ່ງຕາມຫ້າງຮ້ານຕ່າງໆພາຍໃນເມືອງໄຊຍະບູລີ ແຕ່ຊ່ວງເວລານັ້ນການຄ້າຂາຍກໍ່ບໍ່ລຸ້ງປານໃດ. ຄອບຄົວຂອງຕົນເອງໄດ້ປຶກສາຫາລື ຊອກທາງອອກທີ່ດີ ເພື່ອເສີມລາຍຮັບເຂົ້າໃນຄອບຄົວ ເລີຍລົງທຶນຊື້ດິນຈໍານວນ 1 ຕອນ ປະມານ 3.300 ແມັດກາເລ, ຊື້ເຄື່ອງຈັກຜະລິດເສັ້ນເຂົ້າປຸ້ນແຫ້ງ ຢູ່ເຂດບ້ານນາໄຮ ເມືອງໄຊຍະບູລີ ແຂວງໄຊຍະບູລີ ໃນປີ 2018


ແລະ ໄດ້ເລີ່ມຜະລິດເສັ້ນເຂົ້າປຸ້ນແຫ້ງເລີ່ມແຕ່ປີ 2018 ເປັນຕົ້ນມາ ໂດຍໃຊ້ກໍາມະກອນມື້ໜຶ່ງ ເກືອບ 20 ຄົນ ໂດຍຄ່າຈ້າງມື້ລະ 50 ພັນກີບຕໍ່ມື້. ຂັ້ນຕອນຂອງການຜະລິດເສັ້ນເຂົ້າປຸ້ນແຫ້ງ ແມ່ນໂມ້ແປ້ງລະອຽດ ແລ້ວສົ່ງເຂົ້າເຄື່ອງບີບ ແລ້ວບີບອອກມາລ້າງນໍ້າ ແລ້ວເອົາອອກຕາກແດດ 2-3 ຊົວ່ໂມງ ແລ້ວມາມັດແພັກເຂົ້າຖົງ; ແຕ່ລະມື້ສາມາດຜະລິດໄດ້ 1 ໂຕນເຄິ່ງ ຖ້າອາກາດເໝາະສົມ, ແດດດີ, ຟ້າຝົນບໍ່ເອື້ອອໍານວຍ ກໍ່ຈະຜະລິດໄດ້ມື້ລະ 1 ໂຕນ. ສ່ວນວັດຖຸດິບມາຮັບໃຊ້ໂຮງງານ ແມ່ນນໍາເຂົ້າຈາກ ສປ ຈີນ ເຊັ່ນ: ແປ້ງເຂົ້າຈ້າວສໍາເລັດຮູບ, ນໍ້າມັນພືດ ເດືອນໜຶ່ງ 30 ໂຕນ ມູນຄ່າຊື້ປະມານ 7 ລ້ານກວ່າກີບ, ດ້ານການຈໍາໜ່າຍ ແມ່ນສົ່ງຂາຍພາຍໃນແຂວງ ແລະ ແຂວງໃກ້ຄຽງຄື: ແຂວງຫຼວງພະບາງ ໃນລາຄາ 38.000 ກີບຕໍ່ 5 ກິໂລ ສັງລວມແລ້ວສະເລ່ຍລາຍຮັບໃນປີໜຶ່ງ ການຜະລິດເສັ້ນເຂົ້າປຸ້ນແຫ້ງ ເມື່ອຫັກຄ່າຈ້າງແຮງງານ ແລະ ຄ່າສິ້ນເປືອງອື່ນໆແລ້ວຈະມີກໍາໄລຢູ່ 100 ລ້ານກີບຕໍ່ປີ.

ນອກຈາກເຮັດໂຮງງານເສັ້ນເຂົ້າປຸ້ນແຫ້ງແລ້ວ ທາງບໍລິສັດ ຊົງປະດິດ ແກ້ວບົວ ຍັງໄດ້ເປັນຕົວແທນຈໍາໜ່າຍຂາຍຍົກ-ຂາຍຍ່ອຍ ປະເພດເຄື່ອງອຸປະໂພກ, ບໍລິໂພກ ເຊັ່ນ: ນໍ້າດື່ມໄອເດຍລີ, ນໍ້າຕານ, ກໍ້ເຈ້ຍ, ເຂົ້າໜົມ, ສະບູຝຸ່ນ, ນໍ້າສົ້ມ ແລະ ອື່ນໆອີກ; ເມື່ອສັງລວມລາຍຮັບໝົດປີທາງບໍລິສັດ ແມ່ນມີລາຍຮັບທັງໝົດ 300 ລ້ານກີບຕໍ່ປີ. ນັ້ນໄດ້ຢັ້ງຢືນໃຫ້ເຫັນວ່າ ຈາກທຸລະກິດນ້ອຍ, ຈາກຄອບຄົວທີ່ບໍ່ຫຼູຫຼາ ຈຶ່ງກາຍມາເປັນບໍລິສັດ ຊົງປະດິດ ແກ້ວບົວ ອັນໄດ້ສົ່ງເສີມ ແລະ ສ້າງວຽກເຮັດງານທໍາໃຫ້ແກ່ກໍາມະກອນມີລາຍໄດ້ເສີມໃນແຕ່ລະວັນໄປໃນທຸກມື້ນີ້. ທ່ານຍັງໃຫ້ຮູ້ຕື່ມວ່າ ເມື່ອມາເບິ່ງຄວາມຮຽກຮ້ອງຕ້ອງການໃນການບໍລິໂພກຂອງສັງຄົມ ກໍຄືການຕະຫຼາດຈໍາໜ່າຍນັບມື້ນັບຫຼາຍຂຶ້ນ ທາງບໍລິສັດເຮົາກໍມີແຜນຜະລິດຈໍາໜ່າຍເສັ້ນເຂົ້າປຸ້ນແຫ້ງໃຫ້ໄດ້ໜຶ່ງເດືອນຈາກ 1 ໂຕນເຄິ່ງ ມາເປັນ 2 ໂຕນ ແລະ ນໍາເຂົ້າວັດຖຸດິບຈາກ 30 ໂຕນ ມາເປັນ 35 ໂຕນຕໍ່ປີ.
……….
ຂ່າວ: ບຸນທີ. News.XBL