ເລີ່ມ​ແລ້ວ ເປີດການສອບເສັງຈົບຊັ້ນ ມັດທະຍົມຕອນຕົ້ນ ມ. 4 ຢ່າງເປັນທາງການ ນ້ອງໆ​ສູ້ໆ​ເດີ້

ເລີ່ມ​ແລ້ວ ເປີດການສອບເສັງຈົບຊັ້ນ ມັດທະຍົມຕອນຕົ້ນ ມ. 4 ຢ່າງເປັນທາງການ ນ້ອງໆ​ສູ້ໆ​ເດີ້

22nd July 2020 0 By Admin

ວັນທີ 22 ກໍລະກົດ 2020 ທີ່ໂຮງຮຽນ ມັດທະຍົມສົມບູນ ປ່ອງຄໍາ ນະຄອນຫຼວງພະບາງ ໄດ້ຈັດພິທີເປີດ ການສອບເສັງຈົບຊັ້ນ ມັດທະຍົມຕອນຕົ້ນ ມ. 4 ຢ່າງເປັນທາງການ ກໍ​ຄື​ກັບ​ທົ່ວ​ປະ​ເທດ ໂດຍໃຫ້ກຽດເຂົ້າຮ່ວມຂອງ ທ່ານ ວິໄລທອງ ມະນີວອນ ຫົວໜ້າຄະນະ ຈັດຕັ້ງນະຄອນ ຫຼວງພະບາງ , ທ່ານ ນາງ ຈັນສີ ຜາລິວັນ ຫົວໜ້າສູນສຶກສານິເທດມັດທະຍົມ ພະແນກສຶກສາ ທິການ ແລະ ກິລາ ແຂວງ ຫຼວງພະບາງ , ມີ ທ່ານຫົວໜ້າ – ຮອງ ຫົວໜ້າຫ້ອງການສຶກສາທິການ ແລະ ກິລາ ນະຄອນ ຫຼວງພະບາງ, ຄະນະກໍາມະການ , ພະນັກງານ ຄູ – ອາຈານ ແລະ ນ້ອງນັກສອບເສັງ ເຂົ້າຮ່ວມ.


ທ່ານ ບົວແຫວນ ບຸນທະວົງ ຫົວໜ້າຫ້ອງການສຶກສາທິການ ແລະ ກິລາ ນະຄອນຫຼວງພະບາງ ກ່າວລາຍງານ ທົ່ວນະຄອນຫຼວງພະບາງ ມີ ໂຮງຮຽນມັດທະຍົມຕອນຕົ້ນ ທັງໝົດ 26 ແຫ່ງ, ໃນນັ້ນໂຮງຮຽນ ມີຊັ້ນຮຽນຄົບຂັ້ນແຕ່ ມ.1 – ມ.4, ມີ 20 ແຫ່ງ , ໂຮງຮຽນຊັ້ນຮຽນບໍ່ຄົບຂັ້ນມີ 6 ແຫ່ງ , ມີສູນສອບເສັງ 12 ສູນ, ມີຫ້ອງສອບເສັງທັງໝົດ 81 ຫ້ອງ ,

ມີ ນັກສອບເສັງ 1.579 ຄົນ,ຍິງ 710 ຄົນ , ສະເລ່ຍມີ ນັກສອບເສັງ 20 ຄົນ ຕໍ່ຫ້ອງ ແລະ ອະນຸກໍາມະການເຝົ້າຫ້ອງ 2 ຄົນ ຕໍ່ຫ້ອງ. ສໍາລັບໄລຍະ ການສອບເສັງ ແມ່ນ 3 ວັນ , ລະຫວ່າງ ວັນທີ 22 – 24 ກໍລະກົດ 2020. ກໍານົດເອົາ 6 ວິຊາຫຼັກຄື: ພາສາລາວ – ວັນນະຄະດີ , ສຶກສາພົນລະເມືອງ , ວິທະຍາສາດທໍາມະຊາດ , ວິທະຍາສາດສັງຄົມ , ຄະນິດສາດ ແລະ ພາສາອັງກິດ.

ເຊິ່ງໃນ ສົກຮຽນ ນີ້ໄດ້ກໍານົດເອົາ ໂຮງຮຽນ ມ.ສ ປ່ອງຄໍາເປັນສະຖານທີ່ ເປີດການສອບເສັງ ຈົບຊັ້ນມັດທະຍົມຕົ້ນ ມ.4 ທົ່ວ ນະຄອນ ຫຼວງພະບາງ.


ທັງໝົດນີ້ກໍ່ເພື່ອຄວາມໂປ່ງໃສ, ຍຸດຕິທໍາ ບໍ່ມີການລໍາອຽງ ເຮັດຕາມພາລະບົດບາດຂອງຕົນ, ຫຼີກລຽງຫາງສຽງຈົ່ມວ່າ ຂອງສັງຄົມ, ທັງນີ້ກໍ່ເພື່ອຊອກໃຫ້ໄດ້ນັກຮຽນທີ່ມີຄຸນນະພາບ, ມີຄວາມຮູ້ຄວາມສາມາດ, ມີຄຸນສົມບັດ, ເພື່ອສືບທອດພາລະກິດ ປົກປັກຮັກສາ ແລະ ສ້າງສາ ພັດທະນາ ປະເທດຊາດໃນອານາຄົດໃຫ້ມີຄວາມຈະເລີນຮຸ່ງເຮືອງ ແລະ ສີວິໄລ.

ຂ່າວ: ວິໄຊ ຫຸມພັນ ສ.ກ.ນ ຫຼວງພະບາງ