​ສາ​ທຸ! ອະດີດປະທານປະເທດ ແລະ ມວນຊົນແຫ່ພະເຈົ້າໄຊເສດຖາ ເພື່ອກຽມສົ່ງໄປແຂວງອັດຕະປື

​ສາ​ທຸ! ອະດີດປະທານປະເທດ ແລະ ມວນຊົນແຫ່ພະເຈົ້າໄຊເສດຖາ ເພື່ອກຽມສົ່ງໄປແຂວງອັດຕະປື

21st July 2020 0 By Admin

ອະດີດປະທານປະເທດ ແລະມວນຊົນແຫ່ພະເຈົ້າໄຊເສດຖາເພື່ອກຽມສົ່ງໄປແຂວງອັດຕະປື
ໃນວັນທີ 21 ກໍລະກົດ 2020, ທີ່ນະຄອນຫຼວງວຽງຈັນ ມີຂະບວນຄູບາ, ອາຈານ ແລະພະສົງ ຮວມທັງອະດີດປະທານປະເທດລາວ ທ່ານ ຈູມມະລີ ໄຊຍະສອນ ແລະມວນຊົນນັບຮ້ອຍຄົນພາກັນສ້າງຂະບວນແຫ່ພະເຈົ້າໄຊເສດຖາ, ຊ້າງ ແລະພະພຸດທະຮູບຈໍານວນໜຶ່ງ ເພື່ອກຽມນໍາສົ່ງຮູບປັ້ນທອງຫຼໍ່ພະເຈົ້າໄຊເສດຖາໄປປະທັບຢູ່ອານຸສາວະລີພະເຈົ້າໄຊເສດຖາທີ່ແຂວງອັດຕະປື.


ຕາມຂໍ້ມູນອໍານາດການປົກຄອງນະຄອນຫຼວງໃຫ້ຮູ້ວ່າ: ຫຼັງຈາກການແຫ່ຂະບວນຄັ້ງນີ້ສໍາເລັດແລ້ວ, ພະເຈົ້າໄຊເສດຖາລວມທັງຊ້າງ ແລະພະພຸດທະຮູບກໍຈະຖືກປະດິດສະຖານຢູ່ທາດຫຼວງ, ຫຼັງຈາກນັ້ນ, ວັນທີ 27 ກໍລະກົດນີ້ ກໍ່ຈະຄ່ອຍເຄື່ອນຍ້າຍພ້ອມຂະບວນລົງໄປພາກໃຕ້ໂດຍຜ່ານ ແລະພັກຢູ່ແຂວງບໍລິຄໍາໄຊ, ຄໍາມ່ວນ, ສະຫວັນ, ຈໍາປາສັກ

ແລະຄາດວ່າຈະເຖິງຈຸດໝາຍໃນວັນທີ 31 ກໍລະກົດ ແລະຍົກຂຶ້ນພະແທ່ນປະດິດສະຖານພ້ອມບໍາເພັນກຸສົນທີ່ອານຸສາວະລີພະເຈົ້າໄຊເສດຖາ ບ້ານຫາດຊາຍຂາວ, ເມືອງໄຊເສດຖາ ແຂວງອັດຕະປື. ໂຄງການສ້າງພະເຈົ້າໄຊເສດຖາ ຍັງເປັນອີກໂຄງການລະດັບຊາດອັນໜຶ່ງ ທີ່ມີມູນຄ່າ 39 ຕື້ກີບ ລວມທັງການກໍ່ສ້າງສະຖານອານຸສາວະລີ ທີ່ໄດ້ເລີ່ມການກໍ່ສ້າງມາແຕ່ປີ 2014.


ນອກນັ້ນ, ຂໍ້ມູນເພີ່ມໃຫ້ຮູ້ວ່າ: ແທ່ນຕັ້ງອະນຸສາວະລີພະເຈົ້າໄຊເສດຖາ, ຮູບປັ້ນຊ້າງ, ຮູບປັ້ນຫຼໍ່ພະເຈົ້າໄຊເສດຖາຊົງປະທັບຊ້າງປະທານພອນນັ່ງເທິງແຍ່ງຊ້າງ ເຊິ່ງທັງໝົດແມ່ນຫຼໍ່ດ້ວຍທອງເຫຼືອງ, ທັງໝົດມີນໍ້າໜັກລວມເຖິງ 18 ໂຕນ ເຊິ່ງປະດິດຢູ່ນະຄອນຫຼວງວຽງຈັນ, ແລະຈະຖືກນໍາສົ່ງໄປແຂວງອັດຕະປື ເພື່ອເປັນການໃຫ້ກຽດແກ່ການນຳທີ່ເປັນປະຫວັດສາດຂອງກະສັດໃນການສ້າງສາ ແລະປົກປັກຮັກສາປະເທດຊາດ ແລະພັດທະນາບັນດາແຂວງພາກໃຕ້ຂອງປະເທດ,

ໂດຍສະເພາະແມ່ນແຂວງອັດຕະປື, ພາຍໃຕ້ການນໍາພາ ແລະປົກຄອງໂດຍອານາຈັກລ້ານຊ້າງ ເຊິ່ງພະເຈົ້າໄຊເສດຖາໄດ້ເດີນທາງໄປແຂວງອັດຕະປືສອງຄັ້ງໃນປີ 1564 ແລະ 1572 ແລະແຂວງອັດຕະປືເປັນບ່ອນທີ່ພະອົງສິ້ນພະຊົນໃນປີ 1572.

ຈາກ: CRI-FM93