2 ບໍລີສັດມອບເຄື່ອງຊ່ວຍເຫຼືອໃຫ້ແກ່ແຂວງຈຳປາສັກມູນຄ່າ 1 ມື່ນ 1 ພັນ ກ່ວາໂດລາ

2 ບໍລີສັດມອບເຄື່ອງຊ່ວຍເຫຼືອໃຫ້ແກ່ແຂວງຈຳປາສັກມູນຄ່າ 1 ມື່ນ 1 ພັນ ກ່ວາໂດລາ

20th July 2020 0 By Admin

ວັນທີ 18 ກໍລະກົດ 2020 ທີ່ສໍານັກງານຫ້ອງວ່າການແຂວງ, ບໍລິສັດ ເອເຊັຍ-ປາຊີຟິກ ທີ່ປຶກສາການຄ້າ-ການລົງທຶນ ຈໍາກັດ ຮ່ວມກັບ ບໍລິສັດ ອາໂກຣເຕັກ ໂປຣລາວ ໂດຍຕາງໜ້າແມ່ນ ທ່ານ ນ. ສິລິວັນ ປັດທໍາມະວົງ ຮອງປະທານ ບໍລິສັດ ເອເຊັຍ-ປາຊີຟິກ ທີ່ປຶກສາການຄ້າ-ການລົງທຶນ ຈໍາກັດ, ທ່ານ ນ. ສິລິໂສພາ ບຸດດາຄຳ ປະທານ ບໍລິສັດ ລາວລໍ້ແອນຄອນເຊົາແທນຊີກຣຸບ ພ້ອມດ້ວຍ ກຸ່ມນັກທຸລະກິດພາຍໃນ ແລະຕ່າງປະເທດ ໄດ້ນໍາເອົາເຄື່ອງຊ່ວຍເຫຼືອມາມອບໃຫ້ແຂວງຈໍາປາສັກ ໂດຍມີ ລົດຈັກ 12 ຄັນ, ຄອມພິວເຕີ້ 2 ຊຸດ ແລະ ຊຸດເຄື່ອງຮັບໃຊ້ໃນການຮຽນ 400 ຊຸດ ລວມມູນຄ່າທັງໝົດ ປະມານ 1 ມື່ນ 1 ພັນ ກວ່າໂດລາ.


ໃນໂອກາດນີ້, ທ່ານ ປອ. ວິໄລວົງ ບຸດດາຄຳ ເຈົ້າແຂວງຈຳປາສັກ ກໍໄດ້ກ່າວສະແດງຄວາມຂອບໃຈເປັນຢ່າງສູງມາຍັງ ບັນດາບໍລິສັດ, ແຂກນັກລົງທຶນທັງພາຍໃນ ແລະຕ່າງປະເທດ ທີ່ໄດ້ປະກອບສ່ວນເປັນການຊຸກຍູ້ການພັດທະນາເສດຖະກິດ ສັງຄົມ ຢູ່ແຂວງຈໍາປາສັກ ຜ່ານມາແຂວງຈຳປາສັກ ຍັງໄດ້ຮັບທຶນຊ່ວຍເຫຼືອນັກຮຽນທຸກຍຸກ ແລະ ດ້ອຍໂອກາດ (ໂຄງການສາກາກຸໂມະ) ຈາກ ບໍລິສັດພາກໃຕ້ພັດທະນາ ຈຳກັດ ຈຳນວນ 26 ທຶນ ລວມເປັນມູນຄ່າຫຼາຍກວ່າ 460 ລ້ານກີບ ແລະໃນໄລຍະທີ່ມີການແຜ່ລະບາດຂອງພະຍາດໂຄວິດ-19 ກໍຍັງ ໄດ້ຮັບການຊ່ວຍເຫຼືອທາງດ້ານປັດໃຈ ແລະ ອຸປະກອນການແພດ ຈາກ ທະນາຄານ FCB, ທະນາຄານCUB ແລະ ທະນາຄານTCB ໂດຍຜ່ານ ມູນນິທິຊ່ວຍເຫຼືອປະທານນໍ້າໃຈ ຊຶ່ງລວມມູນຄ່າຫຼາຍກ່ວາ 1 ຕື້ 500 ລ້ານກີບ.

ສໍາລັບການມອບເຄື່ອງຊ່ວຍເຫຼືອເທື່ອນີ້ກໍແມ່ນເພື່ອສ້າງຂະບວນການຂໍ່ານັບຮັບຕອ້ນ ວັນສ້າງຕັ້ງສະຫະພັນແມ່ຍິງລາວ ຄົບຮອບ 65 ປີ ແລະກອງປະຊຸມໃຫ່ຍ ຄັ້ງທີ VIII ຂອງອົງຄະນະພັກແຂວງຈໍາປາສັກ ແລະເຄື່ອງທີ່ນຳມາມອບໃນຄັ້ງນີ້, ອໍານາດການປົກຄອງແຂວງຈໍາປາສັກ ຈະໄດ້ນໍາໄປມອບໃຫ້ແກ່ ບັນດາເມືອງ ແລະກົມກອງ ພາກສ່ວນຕ່າງໆ ຕາມເຈດຈໍານົງຂອງຜູ້ມອບ ນໍາອີກດ້ວຍ.


ຂ່າວ: ທັດຊະນະ ນັກຂ່າວຫ້ອງວ່າການແຂວງ.