ເສຍຫາຍກວ່າ 1 ຕື້ກີບ ເຫດແຜ່ນດິນໄຫວທີ່ຫົງສາ, ປັດຈຸບັນຕ້ອງການວັດສະດຸກໍ່ສ້າງ ຊ່ວຍຜູ້ປະສົບໄພ

ເສຍຫາຍກວ່າ 1 ຕື້ກີບ ເຫດແຜ່ນດິນໄຫວທີ່ຫົງສາ, ປັດຈຸບັນຕ້ອງການວັດສະດຸກໍ່ສ້າງ ຊ່ວຍຜູ້ປະສົບໄພ

25th November 2019 0 By Admin

ຈາກກໍລະນີ ເກີດເຫດການແຜ່ນດິນໄຫວນັບແຕ່ວັນທີ 21 ພະຈິກ 2019 ມາຮອດປະຈຸບັນ ໄດ້ສ້າງຄວາມເສຍຫາຍແກ່ຊັບສິນຂອງລັດ ແລະ ປະຊາຊົນ. ສຳລັບຢູ່ເມືອງຫົງສາກໍ່ ມີ 134 ຄອບຄົວ, ເຮືອນເປ່ເພ 7 ຫຼັງ ແລະ ໂຄງລ່າງພື້ນຖານອີກຈຳນວນໜຶ່ງ ລວມມູນຄ່າເສຍຫາຍປະມານ 1 ຕື້ກວ່າກີບ.

ອິງຕາມຂ່າວທ້ອງຖິ່ນລາຍງານວ່າ: ປັດຈຸບັນ ອຳນາດການປົກຄອງເມືອງ ແລະ ຄະນະຄວບຄຸມໄພພິບັດຂັ້ນເມືອງ, ຂັ້ນບ້ານໄດ້ລົງເກັບກຳຂໍ້ມູນປະເມີນຜົນເສຍຫາຍທີ່ເກີດຂື້ນ.

ຜ່ານການລົງກວດກາເຫັນວ່າມີບ້ານທີ່ຖືກຜົນກະທົບຈຳນວນ 17 ບ້ານ, ມີ 134 ຄອບຄົວ, ໃນນີ້ມີເຮືອນ 7 ຫຼັງເປ່ເພໜັກບໍ່ສາມາດດສ້ອມແປງຄືນໄດ້. ນອກນັ້ນ, ຍັງມີອາຄານສະຖານທີ່ເປ່ເພເຫຼັກນ້ອຍປະກອບມີ ໂຮງຮຽນ 11 ແຫ່ງ, ວັດວາອາຮາມ 12 ແຫ່ງ, ໂຮງໝໍຊຸມຊົນ ແລະ ໂຮງໝໍນ້ອຍ 4 ແຫ່ງ, ຫ້ອງການສໍານັກງານຂອງລັດ 2 ແຫ່ງ, ສໍານັກງານຂອງທະນາຄານ 2 ແຫ່ງ, ລວມມູນຄ່າຜົນເສຍຫາຍໃນຄັ້ງນີ້ມີທັງໝົດ 1 ຕື້, 141 ລ້ານກ່ວາກີບ.

ສ່ວນໂຮງງານໄຟຟ້າພະລັງງານຄວາມຮ້ອນຫົງສາ ຜ່ານການລົງກວດກາຂອງພາກສ່ວນທີ່ກ່ຽວຂ້ອງເຫັນວ່າມີຜົນກະທົບພຽງເລັກນ້ອຍເທົ່ານັ້ນ ເຊິ່ງບໍ່ມີຜົນກະທົບຕໍ່ອຸປະກອນ ຫຼື ໂຄງສ້າງຫຼັກ, ຕໍ່ກັບເຫດການໃນຄັ້ງນີ້ ໃນເບື້ອງຕົ້ນທາງອົງການປົກຄອງເມືອງ , ຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນເມືອງ, ຂັ້ນບ້ານ ກໍ່ໄດ້ລົງຊຸກຍູ້ອົງການປົກຄອງບ້ານປຸກລະດົມປະຊາຊົນຢູ່ພາຍໃນບ້ານອານາໄມເກັບມ້ຽນພັດສະດຸສິ່ງທີ່ແຕກຫັກ ແລະ ສ້ອມແຊມໃນເບື້ອງຕົ້ນ.

ປັດຈຸບັນນີ້, ແມ່ນມີຄວາມຈຳເປັນໃນການ ຕ້ອງການວັດສະດຸ ເພື່ອແກ້ໄຂຊ່ວຍເຫຼືອໄພພິບັດໃນຄັ້ງນີ້ເປັນຕົ້ນແມ່ນ: ດິນບ໋ອກ, ດິນຈີ່, ຊີມັງ, ກະເບື້ອງ, ເຫຼັກເສັ້ນ, ເຫຼັກຕາປູ ແລະ ອື່ນໆເພື່ອມາສ້ອມແປງຕໍ່ກັບການເສຍຫາຍໃນຄັ້ງນີ້.

 

ຂ່າວ: ໄກເພັດ ຄຳມູງແກ້ວ