ຮັບຮອງເອົາ ບ້ານໂດນ ແລະ ນາສຳພັນ ເມືອງໂພນທອງ ເປັນບ້ານປ້ອງກັນຊາດເຂັ້ມແຂງ

ຮັບຮອງເອົາ ບ້ານໂດນ ແລະ ນາສຳພັນ ເມືອງໂພນທອງ ເປັນບ້ານປ້ອງກັນຊາດເຂັ້ມແຂງ

25th November 2019 0 By Admin

ໃນລະຫວ່າງ ວັນທີ 19-20 ພະຈິກ 2019 ເມືອງໂພນທອງ ແຂວງຫຼວງພະບາງ ໄດ້ມີພິທີປະກາດຮັບຮອງເອົາ 2 ບ້ານພາຍໃນກຸ່ມ ໂພນທອງ ເປັນບ້ານປ້ອງກັນຊາດເຂັ້ມແຂງ. ໂດຍການເປັນປະທານຂອງ ທ່ານ ນາງ ວັນເພັງ ພະຫົງຈັນ ຮອງເຈົ້າເມືອງໆໂພນທອງ, ມີທ່ານ ພັນຕີ ສູນທອນ ສອນມະນີ ຫົວໜ້າການເມືອງກອງບັນຊາການທະຫານເມືອງໂພນທອງ, ມີຫ້ອງການ ແລະ ພະແນກການທີ່ກ່ຽວຂ້ອງ, ອໍານາດການປົກຄອງບັນດາບ້ານ ຕະຫຼອດຮອດພໍ່ແມ່ປະຊາຊົນພາຍບ້ານເຂົ້າຮ່ວມ.


ໃນພິທີທ່ານ ຄໍາຜາຍ ໄຊພອນ ນາຍບ້ານນາສຳພັນ ເມືອງໂພນທອງ ໄດ້ຂຶ້ນຜ່ານບົດລາຍງານການລົງກໍ່ສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງວ່າ: ບ້ານໂດນ ແລະ ບ້ານນາສຳພັນ ທີ່ຂຶ້ນກັບກຸ່ມໂພນທອງ, ປະກອບມີ 13 ໜ່ວຍ, ມີ 145 ຄອບຄົວ, ມີພົນລະເມືອງທັງໝົດ 865 ຄົນ ຍິງ 418 ຄົນ, ໃນນີ້ມີເຜົ່າລາວລຸ່ມ 385 ຄົນ ຍິງ 184 ຄົນ, ເຜົ່າກືມມຸ 484 ຄົນ ຍິງ 234 ຄົນ.


ຈາກການລົງກໍ່ສ້າງ ແລະ ປະເມີນຕາມ 6 ມາດຖານເງື່ອນໄຂ ທີ່ກະຊວງປ້ອງກັນປະເທດວາງອອກ ສາມາດຢັ້ງຢືນຮັບຮອງເອົາເປັນຄອບຄົວ ແລະ ບ້ານປ້ອງກັນຊາດເຂັ້ມແຂງໄດ້ທັງໝົດ 136 ຄອບຄົວ, ເທົ່າກັບ 93,79% ຍັງບໍ່ທັນໄດ້ມີ 9 ຄອບຄົວເທົ່າກັບ 6,20%.
ຈາກນັ້ນ, ທ່ານ ພັນຕີ ທອງສຸກ ມະນີວັນ ໄດ້ຜ່ານຂໍ້ຕົກລົງຂອງທ່ານເຈົ້າເມືອງໂພນທອງ ແລະ ຂໍ້ຕົກລົງຂອງທ່ານເຈົ້າແຂວງຫຼວງພະບາງ ວ່າດ້ວຍການອະນຸມັດຮັບຮອງເອົາ ບ້ານໂດນ ແລະ ບ້ານ ນາສຳພັນ ເປັນຄອບຄົວ ແລະ ບ້ານປ້ອງກັນຊາດເຂັ້ມແຂງ, ພ້ອມທັງມອບໃບຢັ້ງຢືນໃຫ້ບັນດາບ້ານ ແລະ ຄອບຄົວ ໂດຍແມ່ນ ທ່ານ ນາງ ວັນເພັງ ພະຫົງຈັນ ແລະ ທ່ານ ພັນຕີ ສູນທອນ ສອນມະນີ ເປັນຜູ້ຜັດປ່ຽນກັນຂຶ້ນມອບ.


ໃນຕອນທ້າຍ ທ່ານ ນາງ ວັນເພັງ ພະຫົງຈັນ ໄດ້ມີຄໍາເຫັນໂອ້ລົມກ່າວວ່າ: ການສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງແມ່ນອິງໃສ່ຄຳສັ່ງແນະນຳຂອງກົມໃຫຍ່ການເມືອງກອງທັບສະບັບເລກທີ 3430/ກມທ, ລົງວັນທີ 11 ກັນຍາ 2014 ເພື່ອແນໃສ່ເຮັດໃຫ້ຮາກຖານມີຄວາມສະຫງົບປອດໄພ 100% ພ້ອມທັງຮຽກຮ້ອງໃຫ້ອໍານາດການປົກຄອງບ້ານ ຕະຫຼອດຮອດປະຊາຊົນທີ່ໄດ້ກາຍເປັນຄອບຄົວປ້ອງກັນຊາດເຂັ້ມແຂງ.

ຕ້ອງໄດ້ເປັນເຈົ້າການສືບຕໍ່ປະກອບສວ່ນ ເຂົ້າຮ່ວມການຈັດຕັ້ງເຄື່ອນໄຫວເຮັດວຽກງານປ້ອງກັນຊາດ – ປ້ອງກັນຄວາາມສະຫົງບ, ພ້ອມກັນນີ້ກໍ່ຕ້ອງປັບປຸງຕາໜ່າງກອງຫຼອນຂັ້ນບ້ານໃຫ້ມີຄວາມໜັກແໜ້ນເຂັ້ມແຂງ, ຕ້ານ ແລະ ສະ ກັດກັ້ນບັນຫາປະກົດການຍໍ້ທໍ້ຕ່າງໆທີ່ອາດເກີດຂື້ນ, ພ້ອມກັນນີ້, ກໍ່ຕ້ອງໄດ້ເອົາໃຈໃສ່ ການສ້າງເສດຖະກິດຄອບຄົວ ໂດຍສຸມໃສ່ການປູກຝັງ-ລ້ຽງສັດເພື່ອຍົກລະດັບຊີວິດການເປັນຢູ່ຄອບຄົວໃຫ້ນັບມື້ດີຂຶ້ນເປັນກ້າວໆ.