ປະກາດ ບ້ານວັງຊຽງ ເປັນບ້ານປ້ອງກັນຊາດເຂັ້ມແຂງ

ປະກາດ ບ້ານວັງຊຽງ ເປັນບ້ານປ້ອງກັນຊາດເຂັ້ມແຂງ

14th July 2020 0 By Admin

ວັນທີ 6 ກໍລະກົດ ປີ 2020 ນີ້ ກອງບັນຊາການທະຫານເມືອງໂພນທອງ ໄດ້ຈັດພິທີປະກາດຮັບຮອງເອົາ ບ້ານວັງຊຽງ ເປັນບ້ານປ້ອງກັນຊາດເຂັ້ມແຂງ, ຢູ່ສະໂມສອນໃຫຍ່ຂອງເມືອງ ໂດຍເປັນປະທານຮ່ວມຂອງ ທ່ານ ສົມວອນ ແກ້ວຄຳພອນ ຮອງເລຂາພັກເມືອງໂພນທອງ, ພັນໂທ ສົມພອນ ໂຊທຣາງ ຫົວໜ້າກອງບັນຊາການທະຫານເມືອງ, ທ່ານ ວັນໄຊ ສິນທໍາ ນາຍບ້ານບ້ານວັງຊຽງ, ມີພະນັກງານ, ນັກຮົບ, ພະນັກງານອາວຸໂສບຳນານ, ພ້ອມດ້ວຍແຂກຮັບເຊີນ, ອົງການປົກຄອງບ້ານ ແລະປະຊາຊົນເຂົ້າຮ່ວມ.

ໃນພິທີ ທ່ານ ວັນໄຊ ສິນທໍາ ໄດ້ຂື້ນຜ່ານບົດສະຫຼຸບ ການກໍ່ສ້າງຄອບຄົວ ແລະບ້ານປ້ອງກັນຊາດເຂັ້ມແຂງໃນໄລຍະ 1 ປີຜ່ານມາວ່າ: ຜ່ານມາອົງການປົກຄອງບ້ານ ໄດ້ຖືເອົາການສຶກສາອົບຮົມການເມືອງ-ແນວຄິດ, ແນວທາງນະໂຍບາຍຂອງພັກ, ກົດໝາຍຂອງລັດ ເຜີຍແຜ່ໃຫ້ປະຊາຊົນໄດ້ຮັບຮູ້ຢ່າງທົ່ວເຖິງ ແລະຖືເອົາວຽກງານປ້ອງກັນຊາດ-ປ້ອງກັນຄວາມສະຫງົບ ເປັນບັນຫາສຳຄັນໃນການກໍ່ສ້າງແຕ່ລະຄອບຄົວ, ບ້ານວັງຊຽງ ມີທັງໝົດ 385 ຄອບຄົວ, ພົນລະເມືອງ 3.555 ຄົນ, ຍິງ 1.352 ຄົນ, ຜ່ານການປະເມີນຕາມມມາດຖານເງື່ອນໄຂ ການສ້າງເປັນຄອບຄົວປ້ອງກັນຊາດເຂັ້ມແຂງ ມີ 372 ຄອບຄົວ ເທົ່າກັບ 96,62% ທີ່ບັນລຸມາດຖານເງື່ອນໄຂ ຂອງການເປັນຄອບຄົວປ້ອງກັນຊາດເຂັ້ມແຂງ ຍັງບໍ່ທັນບັນລຸ 13 ຄອບຄົວ ເທົ່າກັບ 3,37%.

ເພື່ອຢັ້ງຢືນເຖິງຜົນສຳເລັດ ກອງບັນຊາການທະຫານເມືອງ ຈຶ່ງມອບໃບຢັ້ງຢືນໃຫ້ຄອບຄົວ ໂດຍການຂື້ນມອບຂອງ ພັນໂທ ສົມພອນ ໂຊທຣາງ ແລະ ມີຕາງໜ້າແຕ່ລະໜ່ວຍຂື້ນຮັບ ພ້ອມນີ້ ໄດ້ໃບຢັ້ງຢືນບ້ານປ້ອງກັນຊາດເຂັ້ມແຂງ ມອບໂດຍ ທ່ານ ສົມວອນ ແກ້ວຄຳພອນ ແລະຮັບໂດຍອົງການປົກຄອງບ້ານວັງຊຽງ. ຕອນທ້າຍ ຮອງເລຂາພັກເມືອງໂພນທອງ ໄດ້ເນັ້ນໜັກໃຫ້ອົງການປົກຄອງບ້ານທຸກຂັ້ນ ພ້ອມກັນສຶບຕໍ່ເອົາໃຈໃສ່ ເຮັດໃຫ້ບ້ານມີຄວາມສະຫງົບ-ຄວາມເປັນລະບຽບຮຽບຮ້ອຍ ແລະຮັກສານາມມະຍົດ ທີ່ໄດ້ແລ້ວໄວ້ໃຫ້ຢືນຍົງ, ຈາກນັ້ນ ໄດ້ຮ່ວມກັນລັ່ນຄ້ອງ 9 ບາດ ແລະເປີດປ້າຍບ້ານປ້ອງກັນຊາດເຂັ້ມແຂງຂື້ນຢ່າງເປັນທາງການ.


ຂ່າວ: ສົມເພັດ ມີໄຊກອນ ນັກຂ່າວເມືອງໂພນທອງ