ຈາກເສດຂີ້ເຫຍື້ອທີ່ຄົນອື່ນຖິ້ມ ! ສູ່ຜະລິດຕະພັນຫຼາຍຢ່າງ

ຈາກເສດຂີ້ເຫຍື້ອທີ່ຄົນອື່ນຖິ້ມ ! ສູ່ຜະລິດຕະພັນຫຼາຍຢ່າງ

25th November 2019 0 By Admin

ໃນທີ່ສຸດ ໂຮງຮຽນ ແກ້ວປັນຍາ, ເມືອງຊໍາເໜືອ ແຂວງ ຫົວພັນ ກໍຖືກປະກາດຢ່າງເປັນທາງການແລ້ວ ໃຫ້ເປັນ ໂຮງຮຽນ ປະສະຈາກຈອກ ແລະ ທໍ່ດູດຢາງ (Zero Plastic Cup and Straw) ໂຮງຮຽນທໍາອິດ ໃນ ສປປ ລາວ ໃນວັນທີ 20 ພະຈິກ 2019

.

.

ຈາກທີ່ກ່ອນໜ້ານີ້ເລື່ອງລາວຂອງໂຮງຮຽນ ແກ້ວປັນຍາ ໄດ້ຖືກນໍາມາເຜີຍແຜ່ແຜ່ຫຼາຍທັງໃນສື່ອອນລາຍ ແລະ ສື່ຕ່າງໆ ກ່ຽວກັບ ກິດຈະກໍາຂອງນ້ອງນັກຮຽນ, ແນວທາງຂອງຜູ້ອໍານວຍການ, ຄູອາຈານທີ່ມີເປົ້າໝາຍຢາກສ້າງໂຮງຮຽນຂອງຕົນເປັນໂຮງຮຽນ ສິ່ງແວດລ້ອມທີ່ດີ, ປະສະຈາກຈອກ ແລະ ທໍ່ດູດຢາງ ພ້ອມທັງປູກຈິດສໍານຶກໃຫ້ນັກຮຽນ ຮັກສາສິ່ງແວດລ້ອມ, ສ້າງແວດລ້ອມທີ່ດີ, ໝູນໃຊ້ສິ່ງເສດເຫຼືອໃຫ້ເກີດປະໂຫຍດສູງສຸດ.

.

.

ໂດຍ ທ່ານ ຄໍາແກ້ວ ອຸນນານົງນຸດ, ອໍານວຍການໂຮງຮຽນ ແກ້ວປັນຍາ, ເມືອງຊໍາເໜືອ ແຂວງຫົວພັນ ກ່າວວ່າ: ຂ້າພະເຈົ້າໃນນາມ ຜູ້ອໍານວຍການ, ເປັນຜູ້ທີ່ມີແນວຄິດລິເລີ່ມທີ່ດີໃນການຢາກເຫັນສິ່ງແວດລ້ອມສວຍງາມ, ໜ້າຢູ່ຄູ່ຄົນເຮົາໄປຕະຫຼອດ ຈຶ່ງໄດ້ມີວິໄສທັດ ແນວຄິດໃນການປູກຈິດສໍານຶກ ແລະ ຝຶກວິໄນ ໃຫ້ແກ່ນ້ອງໆ ນັກຮຽນ ແລະ ຄູອາຈານ ໃນໂຮງຮຽນ ໃນການປະກອບສ່ວນ ຮັກສາສິ່ງແວດລ້ອມ.

.

ບໍ່ວ່າຈະເປັນການເກັບກະຕຸກທີ່ໃຊ້ແລ້ວມາປະດິດເປັນສິ່ງຕ່າງ, ເລີ່ມທົດລອງ ໃຫ້ນັກຮຽນ ເອົາວັດຖຸ(ໄມ້ໄຜ່) ທີ່ມີຈາກທຳມະຊາດ ມາຜະລິດ ເປັນຈອກ ແລະ ທໍ່ດູດ ແທນພາສຕິກ, ປູກຕົ້ນໄມ້…

.

ຢາກເຫັນທຸກຄົນເປັນຜູ້ປົກປັກຮັກສາສິ່ງແວດລ້ອມ ເພາະເຮົາເປັນຜູ້ອາໄສສິ່ງແວດລ້ອມ ຖ້າສິ່ງແວດລ້ອມດີເຮົາກໍຈະມີ ອາກາດບໍລິສຸດ ສະພາບແວດລ້ອມດີ ອັນສົ່ງຜົນເຮັດໃຫ້ເຮົາຢູ່ເຢັນເປັນສຸກກາຍ ແລະ ໃຈ.

.

ໂດຍກິດຈະກໍາແບບນີ້ໄດ້ເລີ່ມເຮັດມາໄດ້ 4 ປີແລ້ວ ຈາກຄໍາຂວັນຂອງທ່ານຜູ້ອໍານວຍການ “ເລີ່ມເດີນເທື່ອລະກ້າວກິນເຂົ້າເທຶ່ອລະຄໍາ” ລອງຜິດລອງຖືກ ຈົນປັດຈຸບັນກໍຖືວ່າໄດ້ຮັບຄວາມສົນໃຈ ແລະ ນັກຮຽນຄູອາຈານກໍປະຕິບັດຕາມດ້ວຍຈຸດມຸ້ງຫວັງອັນດຽວກັນ.

.

ແລະ ກໍຫວັງວ່າການທີ່ເຮົາຄິດໄດ້, ສອນພຽງລົມປາກ ມັນບໍ່ເທົ່າກັບການທີ່ເຮົາເປັນເຮົາຜູ້ເລີ່ມຕົ້ນ, ປະຕິບັດໃຫ້ເຫັນເປັນຕົວຢ່າງ ຈຶ່ງຈະມີຜູ້ສືບທອດໄປເລື້ອຍໆດັ່ງໂຮງຮຽນຂອງພວກເຮົາທີ່ເລີ່ມປະຕິບັດແລ້ວ.


ນອກຈາກນັ້ນ ທ່ານ ຍັງບອກອີກວ່າ: ປັດຈຸບັນຍັງກໍາລັງສ້າງ, ປະດິດສິ່ງຕ່າງໆຈາກກະປອງ, ຂີ້ເຫຼືອທີ່ນໍາມາໃຊ້ຄືນໄດ້ໃຫ້ເປັນປະໂຫຍດ ແລະ ສ້າງເຮືອນຂີ້ເຫຍື້ອຫຼັງທໍາອິດຢູ່.