ສາ​ທຸ! ວາງສີລາລຶກການກໍ່ສ້າງຫໍປະດິດສະຖານພຣະເຈົ້າອົງຕື້ຈໍາລອງ ເຂດເສດຖະກິດພິເສດວັງເຕົ່າ

ສາ​ທຸ! ວາງສີລາລຶກການກໍ່ສ້າງຫໍປະດິດສະຖານພຣະເຈົ້າອົງຕື້ຈໍາລອງ ເຂດເສດຖະກິດພິເສດວັງເຕົ່າ

4th July 2020 0 By Admin

ວາງສີລາລຶກການກໍ່ສ້າງຫໍປະດິດສະຖານພຣະເຈົ້າອົງຕື້ຈໍາລອງຢູ່ເຂດເສດຖະກິດພິເສດວັງເຕົ່າ ເມືອງໂພນທອງ

.

ແຂວງຈໍາປາສັກ ວາງສີລາລຶກການກໍ່ສ້າງຫໍປະດິດສະຖານພຣະພຸດທະຮູບອົງຕື້ຈໍາລອງຫຼື ພຣະພຸດທະມັງຄະລະຣັດຕະມຸນີຢູ່ເຂດເສດຖະກິດພິເສດວັງເຕົ່າ ເມືອງໂພນທອງ ໃນຕອນເຊົ້າວັນທີ 3 ກໍລະກົດ 2020 ໃຫ້ກຽດເຂົ້າຮ່ວມມີ ທ່ານ ປອ ວິໄລວົງ ບຸດດາຄໍາ ເຈົ້າແຂວງໆຈໍາປາສັກ,ທ່ານ ເມກສະຫວັນ ພົມພິທັກ ປະທານສະພາປະຊາຊົນແຂວງຈໍາປາສັກ,ທ່ານ ອຸດອນ ແກ້ວດວງດີ ປະທານບໍລິສັດດວງດີ ກໍ່ສ້າງຂົວ-ທາງ ຄົບວົງຈອນຈໍາກັດ ພ້ອມຄອບຄົວ ໃນນາມເຈົ້າສັດທາການກໍ່ສ້າງປະດິດສະຖານພຣະອົງຕື້ ຕະຫຼອດຮອດພະນັກງານພະແນກການ,ກົມກອງອ້ອມຂ້າງແຂວງ ແລະ ເມືອງໂພນທອງ,ນັກທຸລະກິດພາກສ່ວນຕ່າງໆເຂົ້າຮ່ວມ.

ການກໍ່ສ້າງ ແລະ ປະດິດສະຖານ #ພຣະອົງຕື້ຈໍາລອງຢູ່ເຂດເສດຖະກິດພິເສດວັງເຕົ່າ ເມືອງໂພນທອງ ແມ່ນໜຶ່ງນອນໃນໂຄງການພັດທະນາເຂດເສດຖະກິດຂອງແຂວງຈໍາປາສັກ,ກໍ່ສ້າງຂຶ້ນດ້ວຍຈິດໃຈໃສສັດທາຂອງ ທ່ານ ອຸດອນ ແກ້ວດວງດີ ປະທານບໍລິສັດດວງດີ ກໍ່ສ້າງຂົວທາງ ຄົບວົງຈອນຈໍາກັດ ພ້ອມຄອບຄົວ ແລະຍາດພີ່ນ້ອງ,ເພື່ອເປັນບ່ອນຂາບໄຫວ້ສັກກາລະບູຊາຂອງປະຊາຊົນຊາວພຸດ ໂດຍສະເພາະຊາວແຂວງຈໍາປາສັກກໍຄື ປະຊາຊົນຊາວແຂວງພາກໃຕ້ ແລະ ປະເທດໃກ້ຄຽງອ້ອມຂ້າງ ຈາກນີ້ກໍຍັງເປັນສະຖານຖານທີ່ທ່ອງທ່ຽວທາງດ້ານວັດທະນະທໍາຜູ້ທີ່ເຫຼື້ອມໃສໃນທາງພຸດທະສາສະໜາອີກດ້ວຍ.


ພຣະພຸດທະຮູບອົງຕື້ຈໍາລອງທີ່ຈະປະດິດສະຖານຢູ່ເຂດເສດຖະກິດພິເສດ ວັງເຕົ່າໄດ້ມີພິທີປັ້ນລໍ່ ໃນວັນທີ 28 ກຸມພາ 2020 ໂດຍສໍາເລັດ ແລະມີພິທີອະພິເສກເປັນທີ່ຮຽບຮ້ອຍຢູ່ທີ່ວັດອົງຕື້ ນະຄອນຫຼວງວຽງຈັນ,ການປັ້ນລໍ່ແມ່ນນໍາໃຊ້ແຮ່ທາດແລະ ວັດຖູມົງຄົນຫຼາຍຊະນິດ ຫຼື ທອງສໍາລິດ,ມີຂະໜາດໜ້າຕັກກ້ວາງ 2 ແມັດເຄິ່ງ,ສູງ 3 ແມັດ,ທັງໝົດມີສັດທາການກໍ່ສ້າງ 250 ລ້ານກີບ.


ໃນພິທີ ພະອາຈານ ມະຫາ ສຸວັນ ຈັນທິລາດ ປະທານອົງການພຸດທະສາສະໜາສໍາພັນລາວ ແຂວງຈໍາປາສັກ ພ້ອມດ້ວຍຄະນະສົງ ໄດ້ນໍາພາດໍາເນີນພິທີທາງສາສະໜາໄຫວ້ພະຣັດຕະນະໄຕ ສູດໄຊຍັນໂຕ,ຮັບຫານຖວາຍທານ,ຢາດນໍ້າທໍາບຸນ ເພື່ອຄວາມສັກສິດ ແລະເປັນສີລິມົງຄົນ,ຈາກນັ້ນທ່ານເຈົ້າແຂວງ, ທ່ານປະທານສະພາປະຊາຊົນແຂວງ,ເຈົ້າພາບເຈົ້າສັດທາ,ບັນດາທ່ານທີ່ເຂົ້າຮ່ວມໄດ້ວາງສີລາລຶກການກໍ່ສ້າງ, ນໍາເອົາດອກໄມ້ທູບທຽນ,ຊັບສິນເງິນຄໍາ ຕາມສັດທາ ຂອງຕົນລົງຫຼຸມໃຈກາງບ່ອນກໍ່ສ້າງຫໍປະດິດສະຖານແລ້ວອັດແໜ້ນດ້ວຍແຜ່ນສີລາຈາລຶກ,

ຈາກນັ້ນກໍຊ້ວານແຮ່ຊາຍລົງ ຕາມປະເພນີ ແລະເປັນສັນຍາລັກວ່າໄດ້ກໍ່ສ້າງຫໍປະດິດສະຖານພຣະພຸດທະຮູບ(ພະເຈົ້າອົງຕື້)ຈໍາລອງຢູ່ເຂດເສດຖະກິດພິເສດວັງເຕົ່າ ເມືອງໂພນທອງ ຢ່າງເປັນທາງການ.ເຊິ່ງນັບແຕ່ວາງສີລາລຶກກໍ່ສ້າງຕາມແຜນການຈະກໍ່ສ້າງໃຫ້ສໍາເລັດ ແລະປະດິດສະຖານພຣະອົງຕື້ຈໍາລອງ ໃນໄວໆນີ້.

.

ຈາກ: ເກດສະໜາ ແກ້ວສຸວັນນະແສງ