ເປີດການນໍາໃຊ້ລະບົບນ້ຳບາດານອ່າງສູງໃຫ້ແກ່ປະຊາຊົນ 5 ບ້ານ

ເປີດການນໍາໃຊ້ລະບົບນ້ຳບາດານອ່າງສູງໃຫ້ແກ່ປະຊາຊົນ 5 ບ້ານ

4th July 2020 0 By Admin

ພິທີມອບ-ຮັບ ເປີດການນໍາໃຊ້ລະບົບນ້ຳບາດານອ່າງສູງໃຫ້ແກ່ປະຊາຊົນ 5 ບ້ານ ຄື: ບ້ານຫາດເກາະນ້ຳ, ຫາດເກົ່າ, ຫາດຕີນເກົ່າ, ຫາດຕີນໃໝ່ ແລະ ບ້ານກະທ້າງ ຕິດພັນກັບການປະກາດ 4 ບ້ານສາທາລະນະສຸກແບບຢ່າງ ແລະ ຢຸດຕິການຖ່າຍຊະຊາຍ ຈັດຂຶ້ນໃນວັນທີ 2 ກໍລະກົດ 2020 ນີ້ ໂດຍການເຂົ້າຮ່ວມຂອງ ທ່ານ ໜູຄໍາ ສີສະຫວັດ ຮອງເຈົ້າເມືອງສາລະວັນ ຜູ້ຊີ້ນຳວຽກງານວັດທະນະທຳ-ສັງຄົມ, ມີທ່ານ ດຣ ຄໍາຄ້າຍ ຄໍາສິງສະຫວັດ ຮອງຫົວໜ້າພະແນກສາທາລະນະສຸກແຂວງສາລະວັນ, ທ່ານ ນາງ ໂອດ ແກ້ວວົງໂຄດ ທີ່ປຶກສາໂຄງການ ສຸຂະສຶກສາ ແລະ ພັດທະນາສຸຂະພາບ, ມີບັນດາແຂກຖືກຊີນຈາກພະແນກການທີ່ກ່ຽວຂ້ອງອ້ອມຂ້າງແຂວງ ແລະ ເມືອງ, ນາຍບ້ານ ແລະ ປະຊາຊົນ ເຂົ້້າຮ່ວມ.


ທ່ານ ບຸນທ່ຽງ ບົນວິນ ຕາງໜ້າ ໂຄງການສຸຂະສຶກສາ ແລະ ພັດທະນາສຸຂະພາບ ໄດ້ຜ່ານບົດລາຍງານການກໍ່ສ້າງວິດຖ່າຍ ແລະ ນ້ຳບາດານອ່າງສູງ ໃຫ້ຮູ້ວ່າ: ເປັນການຊ່ວຍໃຫ້ປະຊາຊົນໄດ້ມີນ້ຳຊົມໃຊ້ທີ່ສະອາດ, ມີນ້ຳພຽງພໍກັບຄວາມຕ້ອງການຂອງປະຊາຊົນພາຍໃນບ້ານ ແລະ ເພື່ອປັບປຸງຊີວິດການເປັນຢູ່ຂອງເຂົາເຈົ້າໃຫ້ດີຂຶ້ນ, ເຊີ່ງປະຊາຊົນມີສ່ວນຮ່ວມ ໂດຍປະກອບສ່ວນຊື້ທໍ່ນ້ຳແລ່ນເຂົ້າເຮືອນຕົນເອງ, ກົງເຕີນ້ຳ, ກັອກນ້ຳ, ຂໍ້ຕໍ່ນ້ຳ ແລະ ອື່ນໆ ໃນນັ້ນຍັງມີແຮງງານຂຸດຂຸມຝັງທໍ່ນ້ຳທັງໝົດພາຍໃນບ້ານ ( ເງິນສ່ວນຮ່ວມລະບົບນໍ້າຄອບຄົວທົ່ວໄປແມ່ນ 5 ແສນກີບ, ຄອບຄົວທຸກຍາກ 2 ແສນກີບ. ສໍາລັບວິດຖ່າຍ ຄອບຄົວທົ່ວໄປ 2 ແສນກີບ, ຄອບຄົວທຸກຍາກ 50 ພັນກີບ).

ລະບົບນໍ້າບາດານມີທັງໝົດ 5 ບໍ່ ໂດຍແມ່ນທຶນສະໜັບສະໜູນຈາກ ໂຄງການຂະສຶກສາ ແລະ ພັດທະນາສຸຂະພາບ ເປັນຕົ້ນແມ່ນ: ປູນ, ເຫຼັກ, ແຮ່-ຊາຍ, ໂປມນ້ຳ, ສາຍໄຟ, ກົງເຕີໄຟ, ແທັງນ້ຳ, ທໍ່ແລ່ນນ້ຳຂຶ້ນແທັງ ແລະ ລົງຈາກແທັງໄປຫາປະຕູເປີດ/ປິດ ມູນຄ່າທັງໝັດ 222 ລ້ານກວ່າກີບ, ລະບົບນໍ້າບາດານອ່າງສູງ ແມ່ນເປັນບໍ່ປິດ ເລິກ 41-52 ແມັດ, ລະດັບໜ້ານໍ້າ 8-9 ແມັດ, ມີກົງເຕີ ແລະ ກັອກນໍ້າ 139 ຈຸດ, ຫ້ອງການບ້ານ 4 ຈຸດ.

ນອກນີ້ຍັງສະໜັບສະໜູນທຶນກໍ່ສ້າງວິດຖ່າຍ ມູນຄ່າ 142 ລ້ານກວ່າກີບ, ໃນນັ້ນຍັງມີທຶນຈາກການປະກອບສ່ວນຂອງບ້ານ ລວມມູນຄ່າ 102 ລ້ານກວ່າກີບ, ລວມມູນຄ່າທັງໝົດ 466,688,000 ກີບ ເຊິ່ງໄດ້ເລີ່ມ ລົງມືກໍ່ສ້າງ ແຕ່ວັນທີ 26 ພະຈິກ 2019-12 ມິຖຸນາ 2020 ໄດ້ສໍາເລັດ

ໃນພິທີຍັງໄດ້ມີການເຊັນບົດບັນທຶກການມອບ-ຮັບ ລະບົບນ້ຳບາດານອ່າງສູງ ລະຫວ່າງ ທ່ານ ໜູຄໍາ ສີສະຫວັດ ຮອງເຈົ້າເມືອງສາລະວັນ, ກັບທ່ານ ນາງ ໂອດ ແກ້ວວົງໂຄດ ທີ່ປຶກສາໂຄງການ ສຸຂະສຶກສາ ແລະ ພັດທະນາສຸຂະພາບ, ພ້ອມດຽວກັນ ທ່ານ ດຣ ຄໍາຄ້າຍ ຄໍາສິງສະຫວັດ ຮອງຫົວໜ້າພະແນກສາທາລະນະສຸກແຂວງ ກໍໄດ້ມີການມອບໃບຢັ້ງຢືນປະກາດ 4 ບ້ານຄື: ບ້ານຫາດເກາະນ້ຳ, ບ້ານກະທ້າງ, ບ້ານນາໂພນ້ອຍ ແລະ ບ້ານຫາດ 4 ຄຸ້ມ, ເປັນບ້ານສາທາລະນະສຸກແບບຢ່າງ ແລະ ຢຸດຕິການຖ່າຍຊະຊາຍ.

ໂດຍ: ກິນດາວັນ