ລັດຖະມົນຕີ ຖວທ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຈໍາປາສັກ

ລັດຖະມົນຕີ ຖວທ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຈໍາປາສັກ

3rd July 2020 0 By Admin

ຂປລ. ໃນວັນທີ 2 ກໍລະກົດ 20202 ນີ້ ທ່ານ ກິແກ້ວ ໄຂຄໍາພິທູນ ຄະນະເລຂາທິການສູນກາງພັກ, ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ທັງເປັນຮອງຫົວໜ້າອະນຸກໍາມະການເນື້ອໃນກອງປະຊຸມໃຫຍ່ຄັ້ງທີ XI ຂອງພັກ ພ້ອມດ້ວຍຄະນະ ໄດ້ລົງເຄື່ອນ ໄຫວພົບປະ ແລະ ເຮັດວຽກກັບ ອໍານາດການປົກຄອງແຂວງຈໍາປາສັກ ເພື່ອເກັບກັບຂໍ້ມູນຊຸກຍູ້ການກະກຽມດ້ານເນື້ອໃນກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງຈໍາປາສັກ ກໍຄືກອງປະຊຸມໃຫຍ່ຄັ້ງທີ XI ຂອງພັກ, ພ້ອມທັງຊຸກຍູ້ວຽກງານຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ເປັນຕົ້ນແມ່ນວຽກງານການທ່ອງທ່ຽວ ຂອງແຂວງ ທີ່ເຫັນວ່າຜ່ານມາໄດ້ຮັບຜົນກະທົບຢ່າງໜັກໜ່ວງຈາກການລະບາດຂອງພະຍາດໂຄວິດ-19.


ໃນໂອກາດດັ່ງກ່າວ, ທ່ານ ວິໄລວົງ ບຸດດາຄໍາ ເລຂາຄະນະບໍລິຫານງານພັກແຂວງ, ເຈົ້າແຂວງຈໍາປາສັກ ໄດ້ລາຍງານສະພາບການໂດຍຫຍໍ້ ໃຫ້ຮູ້ວ່າ: ຄະນະພັກແຕ່ລະຂັ້ນໄດ້ເອົາໃຈໃສ່ໃນການສ້າງຮາກຖານພັກໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນທາງດ້ານການເມືອງແນວຄິດ, ການຈັດຕັ້ງ ແລະ ແບບແຜນວິທີເຮັດວຽກ ກໍຄືການນໍາພາຂອງພັກ; ພ້ອມກັນນັ້ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງໄລຍະຜ່ານມາ, ຄະນະພັກແຕ່ລະຂັ້ນກໍໄດ້ຖືເອົາການພັດທະນາເສດ ຖະກິດເປັນໃຈກາງຊຸກຍູ້ບັນດາຂະແໜງການຕ່າງໆຕາມທ່າແຮງ, ຊຸກຍູ້ສົ່ງເສີມກໍາລັງແຮງຂອງທຸກພາກສ່ວນເສດຖະກິດ ປະກອບສ່ວນຢ່າງຕັ້ງໜ້າເຂົ້າໃນການເຮັດທຸລະກິດການຜະລິດ ແລະ ການບໍລິການໄດ້ຮັບການເພີ່ມຂຶ້ນໃນແຕ່ລະປີ, ສ້າງຄວາມເຂັ້ມແຂງໃຫ້ເສດຖະກິດຂອງແຂວງມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການຍົກລະດັບດີຂຶ້ນເທື່ອລະກ້າວ. ນອກນີ້, ວຽກງານປ້ອງກັນຊາດ-ປ້ອງກັນຄວາມສະຫງົບ ກໍໄດ້ມີຜົນສໍາເລັດເຊິ່ງໄດ້ສ້າງພື້ນຖານອັນໜັກແໜ້ນໃນການປົກປັກຮັກສາເຂດນໍ້າແດນດິນໃຫ້ມີຄວາມໝັ້ນຄົງ, ຄວາມເປັນ ລະບຽບຮຽບຮ້ອຍ ຕີຖອຍປະກົດ ການຫຍໍ້ທໍ້ຕ່າງໆ.


ໃນໂອກາດນີ້, ທ່ານ ກິແກ້ວ ໄຂຄຳພິທູນ ກໍໄດ້ມີຄໍາເຫັນທິດຊີ້ນໍາຕໍ່ກອງປະຊຸມວ່າ: ດ້ວຍຄວາມເອົາໃຈໃສ່ໃນການຊີ້ນໍາໆພາຂອງອົງຄະນະພັກແຂວງ ທີ່ຜ່ານມາກໍເຫັນວ່າໄດ້ມີຜົນສໍາເລັດຫລາຍດ້ານເປັນຕົ້ນແມ່ນການກໍານົດແຜນຍຸດທະສາດການພັດທະນາເສດຖະກິດ-ສັງຄົມ, ການກໍານົດເປົ້າໝາຍຕ່າງໆ ເພື່ອແນ່ໃສ່ຮັບປະກັນໃຫ້ມີປະສິດທິພາບ, ປະສິດທິຜົນສູງ ມີຄວາມສອດຄ່ອງກົມກຽວ; ມີຈຸດສຸມພັດທະນາເປັນລະບົບ ແລະ ມີຄວາມຍືນຍົງ.

ເນື່ອງຈາກວ່າ ສປປ ລາວ ກໍໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ເຮັດໃຫ້ຕ່ອງໂສ້ການຜະລິດ ແລະ ການບໍລິການໄດ້ຮັບຜົນກະທົບຢ່າງໜັກໜ່ວງ, ໂດຍສະເພາະຂະແໜງການບໍລິການ ແລະ ການທ່ອງທ່ຽວ ສະນັ້ນອໍານາດການປົກຄອງຕ້ອງເປັນເຈົ້າການເພີ່ມທະວີພາຍໃນພັກ-ລັດ ຮັບປະກັນຄວາມມີສະເຖຍລະພາບທາງດ້ານການເມືອງ, ຕ້ອງເປັນແບບຢ່າງໃນການນໍາພາປະກອບສ່ວນສ້າງເສດຖະກິດການຜະລິດກະສິກໍາ ເປັນພື້ນຖານໃຫ້ແກ່ການຫັນໄປສູ່ອຸດສາຫະກໍາທີ່ທັນສະໄໝ ໂດຍນໍາໃຊ້ທ່າແຮງເຂົ້າໃນການຜະລິດກະສີກໍາສະອາດຕິດພັນກັບການປຸງແຕ່ງທີ່ໂດດເດັ່ນ. ພ້ອມກັນນັ້ນກໍໃຫ້ສຸມໃສ່ພັດທະນາໂຄງລ່າງການທ່ອງທ່ຽວ ທໍາມະຊາດ, ປະຫວັດສາດ ແລະ ວັດທະນະທໍາ ດຶງດູດ ແລະ ຂົນຂວາຍຜູ້ປະກອບການລົງທຶນເຂົ້າໃນການບໍລິການທ່ອງທ່ຽວໃຫ້ໄດ້ຕາມມາດຕະຖານທີ່ທັນສະໄໝ.

ຂ່າວ,ພາບ:ຂັນໄຊ