5 ປີກອງກວດກາໄມ້ຍຶດຈັກສະຕີນ, ຈັກຕັດໄມ້ ໄດ້ທັງໝົດ 1.326 ເຄື່ອງ

5 ປີກອງກວດກາໄມ້ຍຶດຈັກສະຕີນ, ຈັກຕັດໄມ້ ໄດ້ທັງໝົດ 1.326 ເຄື່ອງ

25th June 2020 0 By Admin

ສະຫາຍ ແສງເພັດ ສີລິສົມບັດ ເລຂາໜ່ວຍພັກ ຫົວໜ້າກອງກວດກາປ່າໄມ້ ພະແນກກະສິກໍາ ແລະ ປ່າໄມ້ ແຂວງໄຊຍະບູລີ ໄດ້ກ່າວໃນກອງປະຊຸມໃຫຍ່ໜ່ວຍພັກ ຄັ້ງທີ II ທີ່ຈັດຂຶ້ນໃນວັນທີ 24 ມິຖຸນານີ້ວ່າ: ກອງກວດກາປ່າໄມ້ມີພາລະບົດບາດໜ້າທີ່ໃນການກວດກາ, ຕິດຕາມ, ການປົກປັກຮັກສາຊັບພະຍາກອນປ່າໄມ້ ໂດຍສະເພາະແມ່ນການຈັດຕັ້ງປະຕິບັດກົດໝາຍວ່າດ້ວຍປ່າໄມ້, ກົດໝາຍວ່າດ້ວຍສັດນໍ້າ ສັດປ່າ, ຄໍາສັ່ງເລກທີ 15/ນຍ ຢູ່ແຂວງໄຊຍະບູລີ ໃຫ້ມີຜົນສັກສິດ ມີຄວາມເປັນເອກະພາບ ແລະ ມີຄວາມຍຸຕິທໍາ ໂດຍແນໃສ່ເຮັດໃຫ້ການບຸກລຸກທໍາລາຍຊັບພະຍາກອນປ່າໄມ້ຫຼຸດລົງຢ່າງຕໍ່ເນື່ອງ ແລະ ກ້າວໄປເຖິງບ່ອນຢຸດຕິຢ່າງສິ້ນເຊີງ.

ພ້ອມນີ້ຍັງໄດ້ໂຄສະນາບັນດານິຕິກໍາກ່ຽວກັບວຽກງານຄຸ້ມຄອງປົກປັກຮັກສາປ່າໄມ້ ໂດຍສະເພາະປະຕິບັດຄໍາສັ່ງ ເລກທີ 15/ນຍ ຢູ່ບັນດາຈຸດຫຼໍ່ແຫຼມທີ່ມີຄວາມສ່ຽງໃນການທໍາລາຍປ່າໄມ້, ເຜີຍແຜ່ກົດໝາຍວ່າດ້ວຍປ່າໄມ້, ກົດໝາຍສັດນໍ້າ, ສັດປ່າ ໃຫ້ປະຊາຊົນບັນດາເຜົ່າ ຈຸດທີ່ຫຼໍ່ແຫຼມໄດ້ 10 ເມືອງ 287 ບ້ານ, ມີຜູ້ເຂົ້າຮ່ວມ 31.995 ຄົນ, ເອົາໃຈໃສ່ກວດກາການບຸກລຸກຫັນປ່ຽນເນື້ອທີ່ດິນປ່າໄມ້ ເປັນຕົ້ນການຖາງປ່າໄມ້ທີ່ບໍ່ໄດ້ຮັບອະນຸຍາດ ເພື່ອເປັນບ່ອນທໍາການຜະລິດມີ 397 ຕອນ, ມີເນື້ອທີ່ 303,04 ເຮັກຕາ, ມີ 360 ຄອບຄົວ. ໄດ້ສົມທົບກັບຂະແໜງການທີ່ກ່ຽວຂ້ອງລົງກວດກາການເກັບກູ້ໄມ້ບໍ່ຖືກຕ້ອງຕາມລະບຽບກົດໝາຍພົບເຫັນໄດ້ຄຸ້ມຄອງຈໍານວນ 1.032 ທ່ອນ ບໍລິມາດ 1.249.303 ເມັດກ້ອນ, ໄມ້ຫວງຫ້າມ 89 ປູດ ນໍ້າໜັກ 3.440 ໂຕນ:

ໄມ້ຕັບ 7ຕັບ ບໍລິມາດ 0,673 ແມັດກ້ອນ ໄມ້ດັ່ງກ່າວໄດ້ຍຶດມາເປັນຂອງລັດ ແລະ ສົ່ງບັນຊີໄມ້ໃຫ້ພະແນກອຸດສາຫະກໍາ ແລະ ການຄ້າແຂວງ ເພື່ອປະມູນຂາຍຕາມລະບຽບກົດໝາຍ. ຄ່ຽງຄູ່ກັນນີ້ ໄດ້ລົງກວດກາ ແລະ ດັດສົມໂຮງງານໃນເມື່ອກ່ອນມີ ໂຮງງານປຸງແຕ່ງໄມ້ທັງໝົດ 111 ແຫ່ງ, ຜ່ານການດັດສົມປະຈຸບັນເຫຼືອພຽງ 26 ແຫ່ງ ໄດ້ຕິດຕາມກວດກາການຊື້ – ຂາຍ ເຄື່ອນຍ້າຍສັດນໍ້າ-ສັດປ່າທີ່ບໍ່ຖືກຕ້ອງຕາມລະບຽບກົດໝາຍໄດ້ 26 ຄັ້ງ, ມີ 105 ຄົນ, ຍຶດສັດນໍ້າ – ສັດປ່າໄດ້ທັງໝົດ 601,5 ກິໂລ, ເປັນຊິ້ນສ່ວນ 577 ກິໂລ; ຍັງມີຊີວິດ 23 ກິໂລ, ມີ 39 ໂຕ ຊິ້ນສ່ວນດັ່ງກ່າວແມ່ນໄດ້ທໍາລາຍຖິ້ມ ແລະ ຈໍານວນສັດມີຊີວິດໄດ້ປ່ອຍຄືນສູ່ທໍາມະຊາດ.

ໄດ້ລົງເກັບພາຫະນະຍຶດຈັກສະຕີນ ໄດ້ທັງໝົດ 1.326 ເຄື່ອງ , ໝໍ້ໄຟຊອດປາ 14 ເຄື່ອງ, ໜໍ້ດູດປາ 4 ເຄື່ອງ, ປືນລ່າສັດ 117 ກະບອກ ແລະ ດິນລະເບີດ 5 ກິໂລ ສ່ວນການນໍາໃຊ້ມາດຕະການຕໍ່ຜູ້ລະເມີດ ແມ່ນໄດ້ ເຮັດບົດບັນທຶກສຶກສາອົບຮົມ ມີ 324 ຄົນ, ສຶກສາອົບຮົມດັດສ້າງ ດ້ານບໍລິຫານ 40 ຄົນ ດໍາເນີນຄະດີລາຍງານໃຫ້ໄອຍະການມີ 7 ເລື່ອງ, ມີ 21 ຄົນ, ສານຕັດສິນຄະດີ 9 ຄົນ, ປັບໃໝ ແລະ ລົງວິໄນ 1 ເລື່ອງ ເຊິ່ງມາຮອດປະຈຸບັນທົ່ວແຂວງໄຊຍະບູລີ ການບຸກລຸກທໍາລາຍປ່າໄມ້ ແມ່ນຖືກຫຼຸດລົງ ໂດຍສະເພາະການດໍາເນີນທຸລະກິດໄມ້, ການຂຸດຄົ້ນໄມ້, ໂຮງງານປຸງແຕ່ງໄມ້ ແລະ ການເຄື່ອນຍ້າຍໄມ້.

.

ຈາກຜົນງານທີ່ໄດ້ກ່າວມານັ້ນ ຜ່ານການກວດກາຕີລາຄາແບ່ງປະເພດສະມາຊິກພັກໄດ້ ປະເພດ ແຂງ 17 ສະຫາຍ, ຍິງ 1 ສະຫາຍ, ພະນັກງານໄດ້ປະເພດດີ 3 ສະຫາຍ, ປະເພດຂະແໜງການ 4 ຂະແໜງການໄດ້ ແຂງ, 3 ອົງການຈັດຕັ້ງ ຊາວໜຸ່ມ, ແມ່ຍິງ, ກໍາມະບານ ໄດ້ ແຂງ, ປະເພດກອງກວດກາປ່າໄມ້ໄດ້ປະເພດ ແຂງ, ໜ່ວຍພັກກອງກວດກາປ່າໄມ້ເປັນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ. ດອງປະຊຸມຜູ້ເຂົ້າຮ່ວມ ຍັງໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ມີຜູ້ສະໝັກ 5 ສະຫາຍ, ເລືອກເອົາ 3 ສະຫາຍ. ກອງປະຊຸມຄັ້ງປະຖົມມະລຶກໄດ້ເປັນເອກະສັນກັນເລືອກເອົາ ສະຫາຍ ຍຸດທະສິນ ສີປະມວນ ເປັນເລຂາໜ່ວຍພັກ, ສະຫາຍພອນສະຫວັດ ສິງງາມ ເປັນຮອງເລຂາທັງເປັນປະທານກວດກາໜ່ວຍພັກ ແລະ ສະຫາຍ ກອງທ່ຽນ ໄຊຍະພອນ ເປັນຄະນະໜ່ວຍພັກ.
.

ຂ່າວ: ບຸນທີ.
#News.XBL