ເສັ້ນທາງບ້ານວັງຊຽງຫາບ້ານດອນເງິນ ເມືອງໂພນທອງ ແຂວງຫຼວງພະບາງ ສ້ອມແປງສໍາເລັດແລ້ວ

ເສັ້ນທາງບ້ານວັງຊຽງຫາບ້ານດອນເງິນ ເມືອງໂພນທອງ ແຂວງຫຼວງພະບາງ ສ້ອມແປງສໍາເລັດແລ້ວ

25th June 2020 0 By Admin

ພິທີມອບ-ຮັບໂຄງການກໍ່ສ້າງ ແລະສ້ອມແປງເສັ້ນທາງເລກທີ 2986 ແຕ່ບ້ານ ວັງຊຽງ-ບ້ານດອນເງິນ ເມືອງໂພນທອງ ແຂວງຫຼວງພະບາງ ທີ່ໄດ້ຮັບຜົນກະທົບຈາກໄພພິບັດໃນປີ 2019 ໄດ້ຈັດຂື້ນວັນທີ 19 ມີຖຸນາ 2020 ຜ່ານມານີ້ ໂດຍມີທ່ານ ບຸນຈັນ ປານຟອງເຟັດ ເຈົ້າເມືອງໂພນທອງ, ທ່ານ ໄຊສະຫວາດ ມະນີວົງ ປະທານບໍລິສັດຮັບເໝົາກໍ່ສ້າງ, ມີຄະນະກຳມະການຄຸ້ມຄອງການລົງທຶນຂອງລັດ,ສະມາຊິກສະພາປະຊາຊົນແຂວງປະຈຳເມືອງໂພນທອງ,ຕະຫຼອດຮອດອົງການປົກຄອງທັງ 3 ບ້ານທີ່ຊົມໃຊ້ເສັ້ນທາງເຂົ້າຮ່ວມ.

ທ່ານ ໄຊສະຫວາດ ມະນີວົງ ໄດ້ລາຍງານການຈັດຕັ້ງປະຕິບັດ ໂຄງການກໍ່ສ້າງ ສ້ອມແປງ ແລະ ຂົວທາງເສັ້ນທາງຊົນນະບົດ ຂອງບ້ານວັງຊຽງ-ບ້ານດອນເງິນ ໂດຍໄດ້ຮັບທືນສະໜັບສະໜູນ ຈາກໂຄງການລັດຖະບານລາວ 100% ໃນມູນຄ່າການກໍ່ສ້າງ 481.680.000 ກ່ວາກີບ, ເສັ້ນທາງ ມີຄວາມຍາວ 6 ກິໂລແມັດ,ກວ້າງ 5,5 ແມັດ,ເປັນເສັ້ນທາງດິນ,ປູດ້ວຍຫີນ.ເລີ່ມລົງມື້ກໍ່ສ້າງ-ສ້ອມແປງ ແຕ່ວັນທີ 22 ພຶດສະພາ 2020,ມາຮອດ ວັນທີ 15 ມີຖຸນາ 2020 ແມ່ນສໍາເລັດ 100% ໃຊ້ເວລາ 30 ວັນ.ຈາກນັ້ນ ທ່ານ ໄຊສະຫວາດ ມະນີວົງ ປະທານບໍລິສັດ ໄຊຍະຫວາດ ກໍ່ສ້າງຂົວທາງ ຜູ້ຮັບເໝົາ ກໍ່ໄດ້ກ່າວມອບໂຄງການກໍ່ສ້າງເສັ້ນທາງ ດັ່ງກ່າວ ໃຫ້ອົງການປົກຄອງເມືອງ ເພື່ອໃຫ້ປະຊາຊົນ 3 ບ້ານພາຍໃນກຸ່ມໂພນທອງ ເປັນຜູ້ປົກປັກຮັກສາ ແລະ ຊົມໃຊ້.


ໂອກາດນີ້ ທ່ານ ບຸນຈັນ ປານຟອງເພັດ ເຈົ້າເມືອງໂພນທອງ ໄດ້ກ່າວຍ້ອງຍໍຊົມເຊີຍທຸກພາກສ່ວນ ທີ່ມີສ່ວນຮ່ວມພັດທະນາ ຟື້ນຖານໂຄງລ່າງຂອງເມືອງໂພນທອງ ແລະ ຮຽກຮ້ອງໃຫ້ປະຊາຊົນ ຊ່ວຍກັນໃນການປົກປັກຮັກສາ ແລະຄຸ້ມຄອງເສັ້ນທາງ ໃຫ້ໄດ້ນຳໃຊ້ຢ່າງຍາວນານ. ໂດຍສະເພາະແມ່ນ ນຳໃຊ້ເຂົ້າໃນການສັນຈອນ ແລະ ຂົນສົ່ງສິນຄ້າໄປຈໍາຫນ່າຍ ເພື່ອແກ້ໄຂຄວາມທຸກຍາກ ຂອງປະຊາຊົນໃຫ້ດີຂື້ນ. ພ້ອມນີ້ ເຈົ້າເມືອງໂພນທອງ ກໍ່ໄດ້ຕາງໜ້າເມືອງມອບໜັງສືຂອບໃຈໃຫ້ ບໍລີສັດ ໄຊສະຫວາດ ພັດທະນາທີ່ປະກອບສ່ວນ ໃນການພັດທະນາຟື້ນຖານໂຄງລ່າງຂອງເມືອງໂພນທອງ.


ຂ່າວ: ສົມເພັດ ໄຊມີກອນ ນັກຂ່າວເມືອງໂພນທອງ