ຜູ້ເສຍສະຫຼະຕອນສົງຄາມ 34 ຄົນ ຢູ່ເມືອງທ່າແຕງ ໄດ້ຮັບເງິນອຸດໜູນຫຼາຍກ່ວາ 800 ລ້ານກີບ

ຜູ້ເສຍສະຫຼະຕອນສົງຄາມ 34 ຄົນ ຢູ່ເມືອງທ່າແຕງ ໄດ້ຮັບເງິນອຸດໜູນຫຼາຍກ່ວາ 800 ລ້ານກີບ

24th June 2020 0 By Admin

ຜູ້ເສຍສະຫຼະຊີວິດປາງສົງຄາມແລະຍັງມີຊີວິດ 34 ຄົນຢູ່ເມືອງທ່າແຕງໄດ້ຮັບເງິນອຸດໜູນຫຼາຍກ່ວາ 800 ລ້ານກີບ

ຫ້ອງການແຮງງານ ແລະ ສະຫັວດດີການ-ສັງຄົມເມືອງ ທ່າແຕງ ແຂວງ ເຊກອງ ມອບເງິນນະໂຍບາຍອຸນໜູນ 865.058.275 ກີບໃຫ້ຜູ້ເສຍສະຫຼະຊີວິດປາງສົງຄາມ ແລະ ເງິນອຸດໜູນເທື່ອດຽວໃຫ້ຜູ້ຍັງມີຊີວິດຢູ່ເມືອງທ່າແຕງ ໃນວັນທີ 24 ມິຖຸນາ 2020 ນີ້.

ທີ່ຫ້ອງການແຮງງານສະຫັວດດີການສັງຄົມ. ລະຫ່ວາງທ່ານ ແສງສຸບັນ ໄຊສະຫວັນ ຮອງເຈົ້າເມືອງ ທ່າແຕງ ຜູ້ຊີ້ນໍາຂົງເຂດວັດທະນະທໍາ-ສັງຄົມເມືອງເປັນຜູ້ມອບ ແລະ ຍາດພີ່ນ້ອງຂອງຜູ້ເສຍສະຫຼະຊີວິດປາງສົງຄາມ ແລະ ຍັງຜູ້ມີຊີວິດຈໍານວນ 34 ຄອບຄົວເປັນຜູ້ຮັບ ຊຶ່ງມີທ່ານ ສີສັກດາ ແສງນາລີວົງ ຫົວໜ້າຫ້ອງການແຮງງານ ແລະ ສະຫັວດດີການສັງຄົມເມືອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.


ໃນການມອບ-ຮັບເງິນນະໂຍບາຍອຸດໜູນຄັ້ງນີ້ ປະກອບມີຜູ້ເສຍສະຫຼະຊີວິດປາງສົງຄາມຈໍານວນ 31 ທ່ານ,ລວມເງິນທັງໝົດ 758.272.000ກີບ ແລະ ຜູ້ທີ່ຍັງມີຊີວິດ ຈໍານວນ 3 ທ່ານ,ລວມເງິນທັງໝົດ 106.786.275 ກີບ. ທັງນີ້ ກໍເພື່ອປະຕິບັດຕາມຂໍ້ຕົກລົງຂອງກະຊວງແຮງງານ ແລະ ສະຫັວດດີການສັງຄົມ,ລົງວັນທີ 31 ຕຸລາ 2019 ວ່າດ້ວຍປະຕິບັດນະໂຍບາຍ ເງິນອຸດໜູນເສຍສະຫຼະຊີວິດ ແລະ ອຸດໜູນເທື່ອດຽວໃຫ້ຜູ້ຍັງມີຊີວິດ.


ໂອກາດນີ້ທ່ານ ແສງສຸບັນ ໄຊສະຫັວນ ຮອງເຈົ້າເມືອງໆທ່າແຕງ ໄດ້ເນັ້ນໜັກໃຫ້ຄອບຄົວ ທີ່ໄດ້ຮັບເງິນນະໂຍບາຍຕ້ອງນໍາໃຊ້ເງິນດັ່ງກ່າວ ເຂົ້າໃນການພັດທະນາຄອບຄົວໃຫ້ຖືກເປົ້າໝາຍ ແລະ ມີຜົນປະໂຫຍດຕໍ່ຄອບຄົວ,ສືບຕໍ່ຮັກສາມູນເຊື້ອຄຸນງາມຄວາມດີ ທີ່ໄດ້ເສຍສະຫຼະຊີວິດເພື່ອຊາດ ເພື່ອປະຊາຊົນໃນເມື່ອກ່ອນ,ສືບຕໍ່ປຸກລະດົມຊຸກຍູ້ລູກຫຼານ ແລະ ສັງຄົມເອົາໃຈໃສ່ເຮັດວຽກງານປົກປັກຮັກສາ ແລະ ສ້າງສາພັດທະນາປະເທດຊາດ,ບ້ານເມືອງ ໃຫ້ໄດ້ຮັບການພັດທະນາ ນັບມື້ມີຄວາມຈະເລີນກ້າວໜ້າຂຶ້ນເທື່ອລະກ້າວ.


ໂດຍ: ພອນ ບຸນອຸທິດ 020 5632 8844
ເພື່ອນຮ່ວມງານ 24/6/2020