11 ໜ່ວຍພັກຂຶ້ນກັບເຂດຈຸດສຸມພັດທະນາທີ່ 1 ໄດ້ຮັບ ນາມມະຍົດເປັນໜ່ວຍພັກປອດໃສ ເຂັ້ມແຂງ ໜັກແໜ້ນ

11 ໜ່ວຍພັກຂຶ້ນກັບເຂດຈຸດສຸມພັດທະນາທີ່ 1 ໄດ້ຮັບ ນາມມະຍົດເປັນໜ່ວຍພັກປອດໃສ ເຂັ້ມແຂງ ໜັກແໜ້ນ

22nd June 2020 0 By Admin

ວັນທີ 19 ມິຖຸນາ 2020ຜ່ານມານີ້, ເຂດຈຸດສຸມພັດທະນາທີ 1ໄດ້ຈັດພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2019 ໃຫ້ 11 ໜ່ວຍພັກ,ໂດຍການເຂົ້າຮ່ວມເປັນປະທານຂອງສະຫາຍ ບຸນສວນ ບຸດບຸນມາ ຄະນະປະຈຳພັກເມືອງ ຫົວໜ້າຄະນະຈັດຕັ້ງເມືອງທ່າແຕງ,ມີຄະນະກຳມະການປະເມີນໜ່ວຍພັກປອດໃສ,ເຂັ້ມແຂງ – ໜັກແໜ້ນ,ມີຄະນະພັກຮາກຖານ11 ໜ່ວຍພັກທີ່ຂຶ້ນກັບເຂດຈຸດສຸມພັດທະນາທີ່ 1 ພ້ອມດ້ວຍສະມາຊິກພັກເຂົ້າຮ່ວມຢ່າງຫຼວງຫຼາຍ.

ກອງປະຊຸມໄດ້ຮັບຟັງການສະຫຼຸບລາຍງານການຕີລາຄາ-ປະເມີນໜ່ວຍພັກປອດໃສ,ເຂັ້ມແຂງ ແລະໜັກແໜ້ນ ໂດຍຫຍໍ້ຈາກ ສະຫາຍນາງ ບົວລຳພັນ ເລຂາຄະນະໜ່ວຍພັກບ້ານທ່າແຕງເໜືອຕາງໜ້າ11ໜ່ວຍພັກທີ່ຂື້ນກັບເຂດຈຸດສຸມພັດທະນາທີ 1 ຊຶ່ງໄດ້ຍົກໃຫ້ເຫັນເນື້ອໃນ ແລະ ຂັ້ນຕອນສະຫຼຸບຕີລາຄາການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2019ແລະທິດທາງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2020; ຕີລາຄາການຊີ້ນໍາໆພາຢ່າງຮອບດ້ານຂອງໜ່ວຍພັກໂດຍແນໃສ່ບັນດາສາມະຊິກພັກພາຍໃນໜ່ວຍຂອງຕົນຕ້ອງໄດ້ຖືສໍາຄັນໃນການສຶກສາອົບຮົມການເມືອງແນວຄິດເພື່ອເຮັດໃຫ້ສາມະຊິກພັກເຊື່ອໝັ້ນຕໍ່ແນວທາງຂອງພັກ.


ສະຫາຍ ເພັດຕຸລາ ສຸດທິຈັກ ຮອງຄະນະຈັດຕັ້ງເມືອງທ່າແຕງໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ເຊກອງ ສະບັບເລກທີ 656,657, 658,659, 660, 661, 662, 663, 664, 665, ແລະ ສະບັບເລກທີ 666/ຄຈພຂ,ລົງວັນທີ 31 ທັນວາ 2019 ວ່າດ້ວຍຮັບຮອງໜ່ວຍພັກປອດໃສ, ເຂັ້ມແຂງແລະໜັກແໜ້ນປະຈໍາປີ 2019 ພ້ອມດຽວກັນນີ້ໃນພິທີຍັງໄດ້ມີການມອບບັດແດງໃຫ້ແກ່ສະມາຊິກພັກສົມບູນທີໄດ້ມາດຖານຈຳນວນ 30 ສະຫາຍ,ຍິງ 7 ສະຫາຍ ໂດຍສະເພາະແມ່ນຜູ້ທີ່ມີຜົນງານດີເດັ່ນໃນການປະກອບສວ່ນປະຕິບັດໜ້າທີ່ວຽກງານທີ່ການຈັດຕັ້ງ ພັກ-ລັດມອບໝາຍໃຫ້ຢ່າງມີຜົນສໍາເລັດ.


ໂອກາດດັ່ງກ່າວ ສະຫາຍ ບຸນສວນ ບຸດບຸນມາ ຄະນະປະຈຳພັກ ຫົວໜ້າຄະນະຈັດຕັ້ງເມືອງໄດ້ມີຄຳເຫັນໂອ້ລົມຊຶ່ງໄດ້ເນັ້ນໜັກໃຫ້ບັນດາສະມາຊິກພັກ, ພາຍໃນໜ່ວຍດັ່ງກ່າວຈົ່ງສືບຕໍ່ສຸມໃສ່ປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ໂດຍຖືເອົາວຽກງານສຶກສາອົບຮົມການເມືອງ-ແນວຄິດ, ເຕົ້າໂຮມຄວາມສາມັກຄີຂອງສະມາຊິກພັກພາຍໃນໜ່ວຍຂອງຕົນ, ດວ້ຍການຕໍານິສົ່ງຂ່າວພາຍໃນພັກ ແລະຊ່ວຍເຫຼືອເຊິ່ງກັນ ແລະກັນ, ປັບປຸງແບບແຜນວິທີເຮັດວຽກ, ເອົາໃຈໃສ່ຊີ້ນໍາໆພາ, ເພື່ອພ້ອມກັນປະຕິບັດໜ້າທີ່ວຽກງານໃຫ້ໄດ້ຮັບຜົນສໍາເລັດຢ່າງໃຫຍ່ຫຼວງກວ່າເກົ່າ.

ຂະນະດຽວກັນນັ້ນ,ເຂດຈຸດສຸມພັດທະນາທີ່1 ຍັງໄດ້ຈັດກອງປະຊຸມຖອດຖອນບົດ 6 ເດືອນຕົ້ນປີ 2020 ແລະ ທິດທາງແຜນການສຶບຕໍ່ 6 ເດືອນທ້າຍປີ2020ຕື່ມອີກ.


ໂດຍ: ເຈີນ ແດນວົງວິຈິດ 020 5580 8242
ເພື່ອນຮ່ວມງານ 22/6/2020