ອະດີດປະທານພັກປະທານປະເທດ ເຄື່ອນໄຫວ ໂອ້ລົມການນໍາ ເມືອງສະໜາມໄຊ ແຂວງອັດຕະປື

ອະດີດປະທານພັກປະທານປະເທດ ເຄື່ອນໄຫວ ໂອ້ລົມການນໍາ ເມືອງສະໜາມໄຊ ແຂວງອັດຕະປື

17th June 2020 0 By Admin

ວັນທີ 16 ມິຖຸນາ 2020 ນີ້, ພະນະທ່ານ ຄໍາໄຕ ສີພັນດອນ ອະດີດປະທານພັກ, ອະດີດປະທານປະເທດ ແຫ່ງ ສປປ ລາວ ໄດ້ເຄື່ອນໄຫວຢ້ຽມຍາມ ໂອ້ລົມຄະນະພັກ- ອົງການປົກຄອງ ເມືອງສະໜາມໄຊ ແຂວງອັດຕະປື, ພ້ອມດ້ວຍ ທ່ານ ບົວສອນ ບຸບຜາວັນ ອະດີດນາຍົກລັດຖະມົນຕີ ແຫ່ງ ສປປ ລາວ​, ທ່ານ ວິໄລວົງ ບຸດດາຄໍາ ເຈົ້າແຂວງໆຈໍາປາສັກ ແລະ​ ຄະນະ​ ເຊິ່ງມີ​ ທ່ານ ເລັດ ໄຊຍະພອນ ເຈົ້າແຂວງໆອັດຕະປື ພ້ອມຄະນະນໍາຂອງແຂວງ ແລະເມືອງ​ ສະໜາມໄຊ​ ໃຫ້ການຕ້ອນຮັບ ຢ່າງ​ອົບ​ອຸ່ນ​.


ໃນການໄປຢ້ຽມຢາມຄັ້ງນີ້,​ ທ່ານ ອຸ່ນຫຼ້າ ຮອງເຈົ້າແຂວງໆອັດຕະປື ໄດ້ລາຍງານກ່ຽວກັບ ສະພາບການຈັດຕັ້ງປະຕິບັດວຽກງານການສ້າງສັງຄົມນິຍົມຈາກຮາກຖານ ລວມທັງ ສະພາບການຟື້ນຟູໄພພິບັດ ຢູ່ເມືອງສະໜາມໄຊ ຈາກເຫດການຄູກັນນໍ້າເຂື່ອນໄຟຟ້າເຊປຽນ-ເຊນໍ້ານ້ອຍແຕກ ໃນທ້າຍປີ 2018 ທີ່ຜ່ານມາ.

ເຊິ່ງໄດ້ກຳນົດເອົາ 4 ບ້ານ ເຂດໄພພິບັດຂອງເມືອງໜາມໄຊ ເປັນຈຸດໃນການສ້າງຄົມນິຍົມແຕ່ຂັ້ນຮາກຖານ, ເຊິ່ງປະຈຸບັນ​ ແມ່ນຢູ່ໄລຍະກະກຽມໜ້າວຽກຕ່າງໆ ໄດ້ສໍາເລັດການປະກາດ ແລະ ເຕົ້າໂຮມບ້ານນ້ອຍເປັນບ້ານໃຫຍ່; ໄດ້ຈັດກຸ່ມການຜະລິດເປັນສີນຄ້າ ແລະວຽກງານກໍໄດ້ຮັບການຈັດຕັ້ງປະຕິບັດຢ່າງມີຜົນສໍາເລັດເປັນກ້າວໆ.


ຈາກນັ້ນ, ພະນະທ່ານ ຄຳໄຕ ສີພັນດອນ ອະດີດປະທານປະເທດ​ ກໍ່ໄດ້ໃຫ້ກຽດໂອ້ລົມ ຊີ້ນໍາ ໂດຍໄດ້ເນັ້ນໜັກໃຫ້ອໍານາດການປົກຄອງແຂວງ ແລະ ເມືອງສະໜາມໄຊ ໃຫ້ຖືສຳຄັນຕໍ່ວຽກງານການສ້າງຄົມນິຍົມ, ໂດຍສະເພາະຖືກເອົາການສຶກສາອົບຮົມການເມືອງແນວຄິດໃຫ້ຖັນແຖວພະນັກງານຂັ້ນຮາກຖານບ້ານ ຕະຫຼອດຮອດປະຊາຊົນບັນດາເຜົ່າ ໃຫ້ເຊື່ອມຊືມ ແນວຄິດການເມືອງ ຢ່າງເລີກເຊິ່ງ ມີຄວາມຈົ່ງຮັກ ພັກດີ ຕໍ່ປະເທດຊາດບ້ານເມືອງ ແລະ ຕໍ່ປະຊາຊົນ, ເຮັດໃຫ້ປະຊາຊົນ​ ເຊື່ອໝັ້ນຕໍ່ການນໍາພາຂອງພັກ ແລະ ລັດ. ສ້າງໃຫ້ປະຊາຊົນມີຄວາມຮຸ່ງເຮືອງສີລິໄລ ມັ່ງຄັ້ງ ເຂັ້ມແຂງ ມີຄວາມສະຫງົບປອດໄພ ຕິດພັນກັບການສ້າງປະຖົມປັດໄຈເອື້ອອຳນວຍໃຫ້ແກ່ການຜະລິດແບບສະຫະກອນ ແລະກາຍເປັນສີນຄ້າ.


ໃນໂອກາດເຄື່ອນໄຫວຢ້ຽມຢາມເມືອງສະໜາມໄຊຄັ້ງນີ້,​ ທ່ານ ວິໄລວົງ ບຸດດາຄໍາ ເຈົ້າແຂວງໆຈໍາປາສັກ ໄດ້ນໍາເອົາເຄື່ອງຊ່ວຍເຫຼືອ ອຸປະກອນການແພດ ປ້ອງກັນພະຍາດລະບາດ ມາມອບໃຫ້ແຂວງອັດຕະປື ແລະ​ ຮັບໂດຍ ທ່ານ ເລັດ ໄຊຍະພອນ ເຈົ້າແຂວງໆອັດຕະປື.


ຂ່າວ: ທັດຊະນະ ນັກຂ່າວຫ້ອງວ່າການແຂວງ.