ປະກາດການຈັດຕັ້ງຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງໄຊຍະບູລີ

ປະກາດການຈັດຕັ້ງຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງໄຊຍະບູລີ

17th June 2020 0 By Admin

ໃນວັນທີ 17 ມິຖຸນາ 2020 ນີ້ຢູ່ທີ່ຫ້ອງປະຊຸມພະແນກ ຖວທ ແຂວງໄຊຍະບູລີ ໄດ້ຈັດພິທີປະກາດແຕ່ງຕັ້ງຮອງຫົວໜ້າພະແນກ ຖວທ ຂຶ້ນ ໃຫ້ກຽດເຂົ້າຮ່ວມມີ ທ່ານ ດວງຕາ ໄຊວຸດ ກໍາມະການປະຈໍາພັກແຂວງ ຫົວໜ້າຄະນະຈັດຕັ້ງແຂວງ, ມີຫົວໜ້າພະແນກ, ຄະນະພະແນກ, ແຂກຖືກເຊີນ ພ້ອມດ້ວຍຫົວໜ້າຂະແໜງ, ຮອງຂະແໜງ ແລະ ພະນັກງານລັດຖະກອນພາຍໃນພະແນກເຂົ້າຮ່ວມ.


ໃນພິທີ ທ່ານ ໄພທອງ ຈິນດາ ຮອງຄະນະຈັດຕັ້ງແຂວງ ໄດ້ຜ່ານຂໍ້ຕົກລົງຂອງທ່ານເຈົ້າແຂວງ ເລກທີ 573/ຈຂຊຍ, ລົງວັນທີ 5 ມິຖຸນາ 2020 ວ່າດ້ວຍການແຕ່ງຕັ້ງຮອງຫົວໜ້າພະແນກ ຖວທ ແຂວງໄຊຍະບູລີ.

.

ອີງຕາມກົດໝາຍວ່າດ້ວຍການປົກຄອງທ້ອງຖິ່ນ ສະບັບປັບປຸງ ເລກທີ 68/ສພຊ, ລົງວັນທີ 14 ທັນວາ 2015 ພາກທີ III ໝວດທີ 4, ມາດຕາ 20 ວ່າດ້ວຍສິດ ແລະ ໜ້າທີ່ຂອງເຈົ້າແຂວງ, ເຈົ້າຄອງນະຄອນ, ອີງຕາມໜັງສືສະເໜີຂອງຄະນະຈັດຕັ້ງແຂວງ ສະບັບເລກທີ 109/ຄຈຂ.ຊຍ, ລົງວັນທີ 4/6/2020 ເຈົ້າແຂວງໄຊຍະບູລີ ຕົກລົງແຕ່ງຕັ້ງ ທ່ານ ກອງໄລ ວິໄລພອນ ຫົວໜ້າກອງວິຊາການສະຖານີ ວິທະຍຸ-ໂທລະພາບ ຂຶ້ນເປັນຮອງຫົວໜ້າພະແນກ ຖວທ ແຂວງໄຊຍະບູລີ.

.

ໃນໂອກາດນີ້ ທ່ານ ດວງຕາ ໄຊວຸດ ກໍາມະການປະຈໍາພັກແຂວງ ຫົວໜ້າຄະນະຈັດຕັ້ງແຂວງ ໄດ້ໃຫ້ກຽດໂອ້ລົມ ໂດຍທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄະນະທີ່ໄດ້ຮັບແຕ່ງຕັ້ງໃໝ່ ຍ້ອນມີຜົນງານ ແລະ ຄຸນງາມຄວາມດີໃນການຈັດຕັ້ງປະຕິບັດໜ້າທີ່ໆຮັບຜິດຊອບໃນໄລຍະຜ່ານມາ ແລະ ຈົ່ງໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ, ເພີ່ມທະວີຄວາມຮັບຜິດຊອບການເມືອງໃຫ້ສູງ, ເປັນເຈົ້າການຊີ້ນໍາໆພາວຽກງານໃຫ້ມີຜົນສໍາເລັດ,

ຕັ້ງໜ້າເຝິກຝົນຫຼໍ່ຫຼອມຕົນເອງ ທາງດ້ານຄຸນທາດການເມືອງສິນທໍາປະຕິວັດ, ປັບປຸງແບບແຜນເຮັດວຽກໃຫ້ດີ ເຮັດວຽກຕ້ອງລວມສູນປະຊາທິປະໄຕ, ເຮັດວຽກເປັນໝູ່ຄະນະ ບຸກຄົນຮັບຜິດຊອບ ມີລະບອບປະຊຸມປະຈໍາອາທິດ, ເດືອນ, 3 ເດືອນ ເພື່ອປຶກສາຫາລືວຽກງານທີ່ໄດ້ແບ່ງຄວາມຮັບຜິດຊອບວ່າສໍາເລັດ ຫຼື ຍັງຄົງຄ້າງ ພ້ອມທັງລາຍງານໃຫ້ສາຍຕັ້ງ, ສາຍຂວາງ ແຕ່ສິ່ງສໍາຄັນຕ້ອງເພີ່ມທະວີຄວາມສາມັກຄີພາຍໃນພັກ ກໍ່ຄືພະນັກງານລັດຖະກອນພາຍໃນພະແນກ ໂດຍຍືດໝັ້ນຕາມ 5 ຫຼັກການ 3 ທິດນໍາຂອງພັກ ເພື່ອພ້ອມກັນຈັດຕັ້ງປະຕິບັດວຽກງານທີ່ການຈັດຕັ້ງມອບໝາຍ ກໍ່ຄືພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໃຫ້ມີໃບໜ້າໃໝ່ຍິ່ງໃຫຍ່ກວ່າເກົ່າ

ຂ່າວ: ບຸນທີ, News.XBL