ຈະເປີດນໍາໃຊ້ໃນທ້າຍປີນີ້ ທາງດ່ວນນະຄອນຫຼວງວຽງຈັນ-ວັງວຽງ

ຈະເປີດນໍາໃຊ້ໃນທ້າຍປີນີ້ ທາງດ່ວນນະຄອນຫຼວງວຽງຈັນ-ວັງວຽງ

16th June 2020 0 By Admin

ມາຮອດປັດຈຸບັນ ໂຄງການກໍ່ສ້າງທາງດ່ວນຈາກນະ ຄອນຫຼວງວຽງຈັນ ຫາ ເມືອງວັງວຽງ, ແຂວງວຽງຈັນ ສໍາເລັດຫຼາຍກວ່າ 70% ຊອງຫນ້າວຽກທັງຫມົດ, ຫຼັງຈາກເລີ່ມລົງມືກໍ່ສ້າງມາແຕ່ກາງເດືອນພະຈິກ 2018, ຄາດວ່າການກໍ່ສ້າງຈະສໍາເລັດ ແລະ ເປີດນໍາໃຊ້ຢ່າງເປັນທາງການ ໃນໂອກາດສະເຫຼີມສະຫຼອງວັນຊາດ ທີ 2 ທັນວາ 2020.

ໂຄງການດັ່ງກ່າວ ມີຄວາມຍາວທັງໝົດປະມານ 109.12 ກິໂລແມັດ, ກວ້າງ 23 ແມັດ ເປັນເສັ້ນທາງຄູ່ຂະ ໜານ ນັບແຕ່ເມືອງນາຊາຍທອງ, ນະຄອນຫຼວງວຽງຈັນ ໂດຍຜ່ານເມືອງໂພນໂຮງ, ຫີນເຫີບ ແລະ ເມືອງວັງວຽງ ແຂວງວຽງຈັນ.

ເສັ້ນທາງນີ້ ເປັນການລົງທຶນຂອງນັກທຸ ລະກິດຈີນ, ມີອາຍຸສໍາປະທານທັງໝົດ 50 ປີ, ມູນຄ່າການກໍ່ສ້າງທັງໝົດ 1.2 ຕື້ ໂດລາສະຫະລັດ, ໃນນີ້ ລັດຖະບານລາວຖືຫຸ້ນນໍາ 5% ເຊີ່ງຖືກອອກແບບໃຫ້ມີວົງວຽນຈຸດເຊື່ອມຕໍ່ເຂົ້າ-ອອກ 7 ຈຸດ, ມີອຸໂມງ 1 ແຫ່ງ (ເຂດພູພະນັງ), ມີຂົວຂ້າມທາງທັງໝົດ 31 ແຫ່ງ ໃນນີ້ມີຂົວຂ້າມທາງ 13 ເໜືອ 3 ຈຸດ, ຂ້າມທາງລົດໄຟ 4 ຈຸດ ແລະ ຂ້າມທາງເຂົ້າບ້ານທົ່ວໄປ 23 ຈຸດ.


ປັດຈຸບັນ, ໄດ້ສໍາເລັດການປູຢາງໝາກຕອຍຊັ້ນທໍາອິດຫຼາຍກ່ວາ 50 ກິໂລແມັດ ແລະ ການເຈາະອຸໂມງເຂດພູພະ ກໍ່ໄດ້ສໍາເລັດສົມບູນແລ້ວ, ສ່ວນຫນ້າວຽກທີ່ເລັ່ງໃສ່ຈັດຕັ້ງປະຕິບັດໃນປັດຈຸບັນແມ່ນການຕິດຕັ້ງລະບົບໄຟຟ້າ ຕາມເສັ້ນທາງ ແລະ ໃນອຸໂມງ.


ໂຄງການເສັ້ນທາງດ່ວນ ວຽງຈັນ–ວັງວຽງ ໃນເບື້ອງ ຕົ້ນຄາດວ່າຈະສໍາເລັດໃນທ້າຍປີ 2021 ແຕ່ຜ່ານການກໍ່ສ້າງຕົວຈິງຈະສ້າງສໍາເລັດ ໃນປີ 2020. ຫຼັງຈາກເປີດການນໍາໃຊ້, ລາຄາການບໍລິການຈະແມ່ນ 550 ກີບຕໍ່ກິໂລແມັດ ຫຼື ລວມທັງໝົດ 62,000 ກີບ ແຕ່ນະຄອນ ຫຼວງວຽງຈັນ ຫາ ເມືອງວັງວຽງ.

Cr: ຫນັງສືພິມວຽງຈັນທາຍ