ພິທີເຊັນບົດບັນທຶກມອບ-ຮັບ ໂຄງການກໍ່ສ້າງສີລາຈາລຶກກອງຮ້ອຍຫີນເພັດ

ພິທີເຊັນບົດບັນທຶກມອບ-ຮັບ ໂຄງການກໍ່ສ້າງສີລາຈາລຶກກອງຮ້ອຍຫີນເພັດ

16th June 2020 0 By Admin

ວັນທີ 12 ມິຖຸນາ 2020 ນີ້, ຢູ່ຫ້ອງປະຊຸມກົມໃຫຍ່ການເມືອງກອງທັບ ໄດ້ມີພິທີເຊັນບົດບັນທຶກ ມອບ-ຮັບໂຄງການກໍ່ສ້າງສີລາຈາລຶກກອງຮ້ອຍຫີນເພັດ ທີ່ໄດ້ກໍ່ສ້າງສໍາເລັດ 100%ແລ້ວ ລະຫວ່າງ ກົມໃຫຍ່ການເມືອງກອງທັບ ກັບ ບໍລິສັດແສງທອງກໍ່ສ້າງຈຳກັດ ຜູ້ດຽວ ໂດຍການເປັນປະທານ ຂອງ ສະຫາຍ ພົນຕີ ສອນທອງ ພົມລາວົງ ກໍາມະການຄະນະພັກກະຊວງປ້ອງກັນປະເທດ, ຮອງຫົວໜ້າກົມໃຫຍ່ການເມືອງ ກອງທັບ, ຫົວໜ້າຄະນະຮັບຜິດຊອບໂຄງການ, ມີປະທານບໍລິສັດ ແສງທອງກໍ່ສ້າງຈໍາກັດຜູ້ດຽວ, ມີບັນດາຄະນະກໍາມະການຮັບຜິດຊອບໂຄງການ, ວິຊາການ ແລະ ພາກສ່ວນກ່ຽວຂ້ອງເຂົ້າຮ່ວມ.

ສະຫາຍ ຮ້ອຍໂທ ອານຸໄຊ ວິຊາການພາກສະໜາມ ໄດ້ລາຍງານຫຍໍ້ ຜ່ານການຕິດຕາມໂຄງການກໍ່ສ້າງສີລາຈາລຶກກອງຮ້ອຍຫີນເພັດ ວ່າ: ບໍລິສັດ ໄດ້ເອົາໃຈໃສ່ຈັດຕັ້ງ ປະຕິບັດຕາມສັນຍາກໍ່ສ້າງຢ່າງເຂັ້ມງວດ ໂດຍສຸມທຶນຮອນທາງດ້ານວັດຖຸ ແລະ ແຮງງານການກໍ່ສ້າງແມ່ນ ໄດ້ເຮັດຖືກຕ້ອງຕາມເຕັກນິກ ແລະ ຮູບແບບ. ແຕ່ກໍຍັງມີບາງດ້ານ ຄົງຄ້າງຈຳນວນໜຶ່ງເຊັ່ນ: ໂຄງ ການຍັງມີຄວາມຊັກຊ້າ ຍ້ອນ ດິນຟ້າອາກາດບໍ່ເອື້ອອຳນວຍ ບວກໃສ່ກັບສະພາບການແຜ່ລະບາດຂອງ ເຊື້ອພະຍາດໂຄວິດ-19, ເຮັດໃຫ້ທາງບໍລິສັດໄດ້ຢຸດການກໍ່ສ້າງຊົ່ວຄາວໄປໄລຍະໜຶ່ງ. ໂຄງການດັ່ງກ່າວໄດ້ເລີ່ມລົງມືມາແຕ່ວັນທີ 1/3/2020 ຮອດ 10/6/2020 ທາງຄະນະ
ກຳມະການຮັບຜິດຊອບໂຄງການ, ວິຊາການ ແລະ ພາກສ່ວນກ່ຽວຂ້ອງໄດ້ລົງກວດກາຕົວຈິງ ເຫັນວ່າ ໂຄງການດັ່ງກ່າວແມ່ນສຳເລັດແລ້ວ 100% .ລວມມູນຄ່າການກໍ່ສ້າງ ທັງໝົດແມ່ນ 618.485.000 ກີບ.


ສະຫາຍ ພົນຕີ ສອນທອງ ພົມລາວົງ ໄດ້ກ່າວຕື່ມວ່າ: ໂຄງການດັ່ງກ່າວເຖິງແມ່ນວ່າເປັນໂຄງການນ້ອຍ ມູນຄ່າການກໍ່ສ້າງບໍ່ສູງປານໃດ, ແຕ່ເປັນໂຄງການທີ່ມີຄວາມໝາຍ ຄວາມສໍາຄັນອັນເລິກເຊີ່ງທາງປະຫວັດສາດຂອງຊາດລາວເຮົາ ສະນັ້ນ, ຂ້າພະເຈົ້າຕາງໜ້າໃຫ້ກົມໃຫຍ່ການເມືອງກອງທັບ ຂໍຊົມເຊີຍທຸກພາກສ່ວນ ບໍ່ວ່າຈະເປັນທາງບໍລິສັດ ຜູ້ຮັບເໝົາກໍ່ສ້າງ, ຄະນະຮັບຜິດຊອບທີ່ກ່ຽວຂ້ອງທຸກຝ່າຍ ໄດ້ພ້ອມກັນຈັດຕັ້ງປະຕິບັດຕາມ ບົດບັນທຶກສັນຍາຈົນສໍາເລັດໂຄງການ. ພ້ອມກັນນັ້ນ ຈຶ່ງມອບໃຫ້ຫ້ອງການກົມໃຫຍ່ ການເມືອງກອງທັບ ເປັນຜູ້ປະສານງານ ກັບທຸກພາກສ່ວນ ເພື່ອກະກຽມຈັດຕັ້ງພິທີເປີດສີລາຈາລຶກກອງຮ້ອຍຫີນເພັດແຫ່ງນີ້ ຢ່າງເປັນທາງການ.


ໂຄງການກໍ່ສ້າງ ສີລາຈາລຶກ ກອງຮ້ອຍຫີນເພັດ ໄດ້ສ້າງຂຶ້ນຢູ່ບໍລິເວນທີ່ຕັ້ງເດີມຂອງກອງຮ້ອຍຫີນເພັດ, ເຊີ່ງເປັນທີ່ຕັ້ງຂອງສຳນັກງານສູນກາງແນວລາວສ້າງຊາດປັດຈຸບັນ ແລະ ກໍ່ເປັນທີ່ຕັ້ງຂອງສຳນັກງານຜູ້ຕາງໜ້າແນວລາວຮັກຊາດປະຈຳຢູ່ນະຄອນຫຼວງວຽງຈັນໃນເມື່ຶອກ່ອນ.
ໂດຍ: ທອງເພັດ