ໃກ້​ຈະ​ໄດ້​ຊົມ​ຄວາມ​ງາມ​ແຄມ​ຂອງ ໃນນະຄອນໄກສອນ ພົມວິຫານ ກໍ່​ສ້າງ​ກັນ​ເຈື່ອນໃກ້ສໍາເລັດແລ້ວ

ໃກ້​ຈະ​ໄດ້​ຊົມ​ຄວາມ​ງາມ​ແຄມ​ຂອງ ໃນນະຄອນໄກສອນ ພົມວິຫານ ກໍ່​ສ້າງ​ກັນ​ເຈື່ອນໃກ້ສໍາເລັດແລ້ວ

15th June 2020 0 By Admin

ປັດຈຸບັນ ໂຄງການກໍ່ສ້າງກັນຕາຝັ່ງເຈື່ອນແຄມຂອງໃນນະຄອນໄກສອນ ພົມວິຫານ, ແຂວງ ສະຫວັນນະເຂດ ຄືບຫນ້າແລ້ວ 75% ຂອງໜ້າວຽກທັງໝົດ, ຄາດວ່າຈະສໍາເລັດ 100% ໃນຕົ້ນປີ 2021 ພາຍຫລັງເລີ່ມລົງມືກໍ່ ສ້າງນັບແຕ່ທ້າຍປີ 2019 ເປັນຕົ້ນມາ, ລວມມູນຄ່າຂອງໂຄງການທັງຫມົດ 4,5 ລ້ານກ່ວາໂດລາສະຫະລັດ ໂດຍແມ່ນທຶນກູ້ຢືມດອກເບ້ຍຕໍ່າຈາກທະນາຄານພັດທະນາອາ ຊີ ຫຼື ADB ແລະ ຮັບເຫມົາກໍ່ສ້າງໂດຍ ບໍລິສັດ ລາວມີໄຊ ກໍ່ສ້າງ.

.

ໂຄງການກໍ່ສ້າງກັນຕາຝັ່ງເຈື່ອນແຄມຂອງແມ່ນ 1 ໃນ 7 ກິດຈະກໍາທີ່ນອນຢູ່ໃນໂຄງການພັດທະນາຕົວເມືອງຕາມແລວທາງເສດຖະກິດຕາເວັນອອກ-ຕາເວັນຕົກອະນຸພາກພື້ນແມ່ນໍ້າຂອງ ຫຼື ໂຄງການ GMS ຂອງແຂວງສະ ຫວັນນະເຂດ.

ໂຄງການນີ້ ປະກອບມີ 2 ຫນ້າວຽກໃຫຍ່ຄື: ການກໍ່ສ້າງກັນຕາຝັ່ງເຈື່ອນແຄມຂອງ ມີຄວາມຍາວ 980 ແມັດ ເລີ່ມຈາກທ່າບັກເກົ່າລຽບລົງໄປຕາມລໍາແມ່ນໍ້າຂອງ ໂດຍໄດ້ຖົມດິນຊາຍອອກຈາກຂອບທາງອອກໄປ 50 ແມັດ ແລະ ລຽງຫີນລຽບຕາມແຄມຂອງ, ມີບໍລິມາດຊາຍຖົມ 246.717 ແມັດກ້ອນ ພ້ອມວຽກຕົບແຕ່ງຄວາມງາມໜ້າເດີ່ນດ້ວຍເບຕົງລວດລາຍ, ສວນດອກໄມ້, ບ່ອນຫັດກາຍ, ຈຸດນັ່ງຊົມວິວ-ນັ່ງເບິ່ງເຮືອຊ່ວງ ແລະ ຮ້ານຄ້າຂາຍເຄື່ອງ.

ສ່ວນໜ້າວຽກທີ່ພວມສຸມໃສ່ຈັດຕັ້ງປະຕິບັດໃນປັດຈຸບັນແມ່ນວຽກຕົບແຕ່ງ ເຊັ່ນ: ປູກຫຍ້າ, ຕົ້ນໄມ້, ສ້າງຮາວກັນຕົກ ແລະ ອື່ນຯ.
ທ່ານ ທ່ອນແກ້ວ ພຸດທະໄກຍະລາດ, ຮອງເຈົ້າແຂວງສະຫວັນນະເຂດ ໃຫ້ສໍາພາດວ່າ: ໂຄງການນີ້ຈະປະກອບສ່ວນສໍາຄັນເຮັດໃຫ້ນະຄອນໄກສອນ ພົມວິຫານ ກໍ່ຄື ແຂວງສະຫວັນນະເຂດ ມີໃບໜ້າໃໝ່ ເພາະເມື່ອມີກັນຕະ ຝັ່ງກັນເຈື່ອນແລ້ວ ນອກຈາກຈະມີຄວາມປອດໄພຈາກນໍ້າຖ້ວມ ສະຖານທີ່ແຫ່ງນີ້ ຈະກາຍເປັນບ່ອນທ່ອງທ່ຽວ, ພັກ ຜ່ອນ ແລະ ອອກກໍາລັງກາຍແຫ່ງໃຫມ່ຂອງແຂວງສະ ຫວັນນະເຂດ ຕື່ມອີກ.

.

ໂດຍ: ມົດແດງນ້ອຍ