ສຸດຍອດນັກຮຽນລາວ! ນ້ອງ ປານີພອນ ໄວ 15 ປີ ຂຶ້ນກ່າວປາໄສໃນເວທີໂລກ ທີ່ນິວຢອກ

ສຸດຍອດນັກຮຽນລາວ! ນ້ອງ ປານີພອນ ໄວ 15 ປີ ຂຶ້ນກ່າວປາໄສໃນເວທີໂລກ ທີ່ນິວຢອກ

21st November 2019 0 By Admin

ຊື່ນໃຈ ແລະ ດີນຳນຳນ້ອງ ປານີພອນ ໄວ 15 ປີ ນັກຮຽນລາວ ທີ່ມີຄວາມສາມາດ ທາງດ້ານການຮຽນ ແລະ ທັກສະການສື່ສານພາສາອັງກິດ ທີ່ໄດ້ເປັນຕົວແທນ ເດັກນ້ອຍລາວ ຂຶ້ນກ່າວປາໄສໃນເວທີໂລກ ທີ່ນະຄອນຫຼວງນິວຢອກ ປະເທດ ສະຫະລັດອາເມລິກາ. ຖືໄດ້ວ່າເປັນອີກໜຶ່ງນ້ອງທີ່ສາມາດສ້າງຊື່ສຽງໃຫ້ປະເທດລາວເປັນທີ່ຮູ້ຈັກ ໃນເວທີສາກົນ.

ເຊິ່ງໃນວັນທີ 20 ພະຈິກ ທີ່ຜ່ານມາ ນາງ ປານີພອນ ວົງມາລາ ອາຍຸ 15 ປີ ນັກຮຽນຈາກໂຮງຮຽນ ມັດທະຍົມ ສົມບູນວຽງຈັນ ເປັນຕົວແທນເດັກ ຈາກ ສປປ ລາວ, ແລະ ຕົວແທນເດັກອື່ນໆຈາກທົ່ວໂລກ ຂຶ້ນນຳສະເໜີກ່ຽວກັບ ການສຶກສາ ແລະ ສິ່ງແວດລ້ອມ ແລະ ເປັນຜູ້ນຳທີມ ໃນການນຳສະເໜີ ໃນກອງປະຊຸມຂັ້ນສູງ Lao Generation 2030 ໃນກອງປະຊຸມໃຫຍ່ ໃນວັນເດັກໂລກ ທີ່ສຳນັກງານໃຫຍ່ອົງການສະຫະປະຊາຊາດທີ່ນິວຢອກ ສະຫະລັດອາເມລິກາ.

ນ້ອງ ປານີພອນ ໃຫ້ຮູ້ວ່າ: ກ່ອນທີ່ຈະໄປເຂົ້າຮ່ວມກອງປະຊຸມຄັ້ງສຳຄັນນີ້ ຕ້ອງກຽມຕົວສົມຄວນທັງໃນເລື່ອງຂໍ້ມູນ, ຄວາມຮູ້ ແລະທັກສະພາສາອັງກິດ ເຖິງຈະຝຶກຢູ່ຕະຫຼອດກໍ່ຕ້ອງໄດ້ຝຶກໜັກຂຶ້ນ ເພາະນີ້ເປັນເວທີໃຫຍ່ລະດັບໂລກ ແລະ ເປັນຄັ້ງທຳອິດທີ່ໄດ້ເດີນທາງໄປສະຫະລັດອາເມລິກາ.

ນ້ອງບອກວ່າ ຫົວຂໍ້ທີ່ໄດ້ຮັບຄື ການສຶກສາໃຊ້ເວລາ 20 ນາທີໃນການຂຶ້ນເວທີ ເນື້ອໃນສຳຄັນຄືການສຶກສາຢູ່ບ້ານເຮົາຍັງມີບັນຫາຫຍັງແດ່ , ວິທີການແກ້ໄຂ ແລະວິໄສທັດທີ່ນ້ອງໆເຫັນໃນປີ 2030 ທັງໝົດຕ້ອງເວົ້າເປັນພາສາອັງກິດ ກໍ່ບໍ່ງ່າຍປານໃດແຕ່ກໍ່ພະຍາຍາມຫາຂໍ້ມູນຄວາມຮູ້ຂອງປະເທດເຮົາ ໄປໃຊ້ເວລາ 20 ນາທີໃຫ້ເກີດປະໂຫຍດສູງສຸດ ເປັນຕົ້ນການສະແດງຄວາມຮູ້ຄວາມສາມາດໃຫ້ຊາວໂລກໄດ້ເຫັນ.