ໄຂ​ຂໍ້​ຂ້ອງ​ໃຈ ເປັນ​ຫຍັງ​ກະ​ຊວງ​ການ​ເງິນ​ຈຶ່ງ​ເປ​ັນ​ຜູ້​ແຕ່ງ​ຕັ້ງ ຜອ ຄົນ​ໃໝ່ ຂອງ ລັດ​ວິ​ສາ​ຫະ​ກິດ​ໄຟ​ຟ້າ​ລາວ

ໄຂ​ຂໍ້​ຂ້ອງ​ໃຈ ເປັນ​ຫຍັງ​ກະ​ຊວງ​ການ​ເງິນ​ຈຶ່ງ​ເປ​ັນ​ຜູ້​ແຕ່ງ​ຕັ້ງ ຜອ ຄົນ​ໃໝ່ ຂອງ ລັດ​ວິ​ສາ​ຫະ​ກິດ​ໄຟ​ຟ້າ​ລາວ

12th June 2020 0 By Admin

ຫຼັງຈາກທີ່ກະຊວງການເງິນໄດ້ອອກຂໍ້ຕົກລົງເລກທີ 1439/ກງ ລົງວັນທີ 8 ມິຖຸນາ 2020 ວ່າດ້ວຍການແຕ່ງຕັ້ງຜູ້ວ່າການອຳນວຍການ ລັດວິສາຫະກິດ ໄຟຟ້າລາວ ໂດຍມີຂໍ້ຕົກລົງແຕ່ງຕັ້ງ ທ່ານຈັນທະບູນ ສຸກອາລຸນ ຫົວໜ້າກົມແຜນການ ແລະການຮ່ວມມື ກະຊວງພະລັງງານ ແລະ ບໍ່ແຮ່ ເປັນຜູ້ວ່າການອຳນວຍການລັດວິສາຫະກິດ ໄຟຟ້າລາວ

ເຮັດໃຫ້ສັງຄົມມີຄວາມສົງໄສວ່າ ເປັນຫຍັງກະຊວງການເງິນ ຈື່ງສາມາດອອກຂໍ້ຕົກລົງ ແຕ່ງຕັ້ງຜູ້ວ່າການອຳນວຍການລັດວິສາຫະກິດ ໄຟຟ້າລາວ ໄດ້ ແທນທີຈະເປັນ ກະຊວງພະລັງງານ ແລະ ບໍ່ແຮ່ ເປັນຜູ້ອອກຂໍ້ຕົກລົງດັ່ງກ່າວ

ທັງນີ້, ອີງຕາມດໍາລັດວ່າດ້ວຍການຈັດຕັ້ງ ແລະ ເຄື່ອນໄຫວຂອງກະຊວງການເງິນ ທີ່ອອກໂດຍນາຍົກລັດຖະມົນຕີ ແຫ່ງ ສປປ ລາວ ລົງວັນທີ 8 ພຶດສະພາ 2017 ໄດ້ມີຂໍ້ກຳນົດຂອບເຂດສິດຂອງກະຊວງການເງິນ ທີ່ໄດ້ລະບຸໄວ້ໃນ ໝວດທີ 2 ໜ້າທີ່ ແລະ ຂອບເຂດສິດ, ມາດຕາທີ 4 ຂໍ້ທີ 12 ວ່າ: ກະຊວງການເງິນມີສິດ ແຕ່ງຕັ້ງ ສັບປ່ຽນຕໍາແໜ່ງຄະນະສະພາບໍລິຫານ ປົດຕໍາແໜ່ງຄະນະອໍານວຍການວິສາຫະກິດທີ່ລັດລົງທຶນ ທີ່ລັດມີສິດແຕ່ງຕັ້ງ ຕາມກໍານົດວາລະ ຫຼື ກ່ອນວາລະ ອີງຕາມສະພາບການດຳເນີນທຸລະກິດ ຫຼື ຕາມການປະຕິບັດໜ້າທີ່ ຫຼື ອີງຕາມຄວາມຮຽກຮ້ອງຕ້ອງການອຶ່ນໆຂອງການຈັດຕັ້ງ

ໂດຍ ລັດວິສາຫະກິດໄຟຟ້າລາວ ກໍຖືວ່າເປັນວິສາຫະກິດຂອງລັດ ດັ່ງນັ້ນແລ້ວ, ກະຊວງການເງິນຈຶ່ງມີສິດແຕ່ງຕັ້ງຕາມລະບຽບການ

ສ່ວນກະຊວງພະລັງງານ ແລະ ບໍ່ແຮ່ ນັ້ນ ເຖິງວ່າຈະເປັນໂຄງປະກອບການຈັດຕັ້ງຂອງລັດຖະບານ ທີ່ມີສິດຄຸ້ມຄອງ ຕິດຕາມ ແລະ ກວດກາ ບັນດາທຸລະກິດເອກະຊົນ ແລະ ລັດວິສາຫະກິດຕ່າງໆທີ່ຂຶ້ນກັບກະຊວງພະລັງງານ ແລະ ບໍ່ແຮ່ ກໍ່ຕາມ, ແຕ່ໃນຂອບເຂດສິດ ແມ່ນບໍ່ມີຂໍ້ໃດທີ່ລະບຸ ໃນການແຕ່ງຕັ້ງຕໍາແໜ່ງໃນຄະນະສະພາບໍລິຫານ ແລະ ຄະນະອໍານວຍການວິສາຫະກິດທີ່ລັດລົງທຶນ