ທ່ານ ຫຸມພັນ ຄອນສະຫວັດ ອຳນວຍການວິທະຍາໄລຄູຫຼວງພະບາງຜູ້ໃຫ່ມ ຍິນ​ດີ​ນຳ

ທ່ານ ຫຸມພັນ ຄອນສະຫວັດ ອຳນວຍການວິທະຍາໄລຄູຫຼວງພະບາງຜູ້ໃຫ່ມ ຍິນ​ດີ​ນຳ

12th June 2020 0 By Admin

ພິທີມອບ-ຮັບ ໜ້າທີ່ຜູ້ອຳນວຍການວິທະຍາໄລຄູຫຼວງພະບາງ ລະຫວ່າງ ຜູ້ເກົ່າ ແລະ ຜູ້ໃໝ່ ແລະ ແຕ່ງຕັ້ງຮອງຜູ້ອຳນວຍການຄົນໃໝ່ ໄດ້ຈັດຂື້ນວັນທີ 11 ມິຖຸນາ 2020 ນີ້, ທີ່ຫ້ອງປະຊຸມວິທະຍາໄລຄູ ໂດຍມີ ທ່ານ ຮສ ປອ ກອງສີ ແສງມະນີ ຮອງລັດຖະມົນຕີກະຊວງສຶກສາທີການ ແລະ ກິລາ, ທ່ານ ສຸກັນ ບຸນຍົງ ຮອງເຈົ້າແຂວງຫລວງພະບາງ, ມີຄະນະອຳນວຍການ, ຕາງໜ້າກົມ, ພາກສ່ວນທີ່ກ່ຽວຂ້ອງຂອງແຂວງ, ພ້ອມດ້ວຍພະນັກງານພາຍໃນວິທະຍາໄລຄູເຂົ້າຮ່ວມ.


ໃນພິທີ ຕາງໜ້າກົມຈັດຕັ້ງ-ພະນັກງານ ກະຊວງສຶກສາທິການແລະກິລາ ໄດ້ຂື້ນຜ່ານຂໍ້ຕົກລົງຂອງລັດຖະມົນຕີກະຊວງສຶກສາທິການ ແລະ ກິລາ ສະບັບເລກທີ 8432/ສສກ ລົງວັນ 5 ທັນວາ 2019 ວ່າດ້ວຍການອະນຸມັດໃຫ້ພະນັກງານລັດຖະກອນອອກພັກການ ເພື່ອຮັບອຸດໜູນເບ້ຍບຳນານ ລັດຖະມົນຕີກະຊວງສຶກສາຕົກລົງ ເຫັນດີໃຫ້ ທ່ານ ບຸນສຸວັນ ລັດຕະນາ ອໍານວຍການວິທະຍາໄລຄູຫຼວງພະບາງ ອອກພັກຜ່ອນຮັບອຸດໜູນເບ້ຍບຳນານ ພາຍຫຼັງຮອດອາຍຸກະສຽນຕາມບຽບກົດໝາຍ ວ່າດ້ວຍ ພະນັກງານ-ລັດຖະກອນ.

ຜ່ານຂໍ້ຕົກຂອງລັດຖະມົນຕີກະຊວງສຶກສາທິການແລະກິລາ ເລກທີ 1409/ສສກ ລົງວັນທີ 28 ພຶດສະພາ 2020 ວ່າດ້ວຍການແຕ່ງຕັ້ງພະນັກງານດຳລົງຕຳແໜ່ງບໍລິຫານ ວິທະຍາໄລຄູຫຼວງພະບາງ, ລັດຖະມົນຕີກະຊວງສຶກສາທິການ ແລະກິລາ ຕົກລົງເຫັນດີອະນຸມັດແຕ່ງຕັ້ງທ່ານ ຫຸມພັນ ຄອນສະຫວັດ ຮອງຜູ້ອຳນວຍການ ຂຶ້ນເປັນອຳນວຍການວິທະຍາໄລຄູຫຼວງພະບາງຜູ້ໃຫ່ມ,

ແລະ ຜ່ານຂໍ້ຕົກລົງ ລັດຖະມົນຕີກະຊວງສຶກສາທິການ ແລະກິລາ ລົງວັນທີ 1093/ສສກ ວ່າດ້ວຍ ການແຕ່ງຕັ້ງພະນັກງານດຳລົງຕຳແໜ່ງ ບໍລິຫານ ວິທະຍາໄລຄູຫຼວງພະບາງ, ເຫັນດີຕົກລົງແຕ່ງຕັ້ງ ທ່ານ ອານຸສິດ ມະໂນສານ ຫົວໜ້າຫ້ອງການ ວິທະຍາໄລຄູ ຂຶ້ນເປັນ ຮອງຜູ້ອຳນວຍການວິທະຍາໄລຄູຫຼວງພະບາງ. ຈາກນັ້ນ ທ່ານ ບຸນສຸວັນ ລັດຕະນາ ຜູ້ອຳນວຍການວິທະຍາໄລຄູຫຼວງພະບາງຜູ້ເກົ່າກໍ່ຂຶ້ນຜ່ານຜົນງານການເຄື່ອນໄຫວໃນໄລຍະທີ່ຕົນໄດ້ດຳລົງຕໍາແໜງໂດຍໄດ້ຍົກໃຫ້ເຫັນຜົນງານອັນພົ້ນເດັ່ນຫຼາຍດ້ານ ແລະ ຂໍ້ຄົງຄ້າງບາງບັນຫາ, ພ້ອມທັງກ່າວລາໜ້າທີ່ ແລະເຊັ່ນບົດບັນທຶກການມອບ-ຮັບໜ້າທີ່ວຽກງານ ,ພ້ອມທັງມອບໃບຍ້ອງຍໍຜົນງານດີເດັ່ນຂອງກະຊວງສຶກສາທິການແລະກິລາ ໂດຍຊ່ອງໜ້າຄະນະປະທານ, ແຂກທີ່ຖືກເຊີນຢ່າງເປັນທາງການ.


ເພື່ອເຮັດໃຫ້ພິທີດັ່ງກ່າວມີຄວາມໝາຍໜັກແໜ້ນ ທ່ານ ຮສ ປອ ກອງສີ ແສງມະນີ ຮອງລັດຖະມົນຕີກະຊວງສຶກສາທີການ ແລະກິລາ ກໍ່ໄດ້ມີຄໍາໂອລົມໃຫ້ຄໍາເນາະນໍາຫຼາຍບັນຫາ ກ່ອນອື່ນທ່ານໄດ້ສະແດງຄວາມຢ້ຽມຢາມຖາມຂ່າວອັນອົບອຸ່ນ ແລະ ຍ້ອງຍໍຜົນງານອັນພົ້ນເດັ່ນຂອງວິທະຍາໄລຄູຫຼວງພະບາງ, ທ່ານຍັງໄດ້ເໜັ້ນໜັກໃຫ້ຜູ້ຮັບໜ້າທີ່ດຳລົງຕໍາແໜ່ງໃຫ່ມສືບຕໍ່ ການປັບປຸງແຜນການຮຽນການສອນ ສ້າງຊັບພະຍາກອນມະນຸດ, ຫຼັກການຮຽນ-ສອນຕ້ອງຮັບປະກັນທາງດ້ານປະລິມານ ແລະຄຸນນະພາບ, ການເປັນຄູຕົວແບບ, ວຽກງານບໍລິຫານ, ວຽກງານບຸກຄະລາກອນ, ວິທີການສິດສອນ, ການປະສານງານສາຍຕັ້ງ-ສາຍຂວາງ ແລະຂະແໜງການທີ່ກ່ຽວຂ້ອງ ຕາມຫຼັກການຂອງກະຊວງສຶກສາທິການ ແລະກິລາວາງອອກໃຫ້ໄດ້ຮັບຜົນດີ.