ກັກຄູ່ຜົວເມຍສໍ້ໂກງຊັບ ດ້ວຍຮູບການກໍ່ເຫດນໍາຫຼາຍບໍລິສັດ ອັນ​ຕະ​ລາຍ​ແທ້

ກັກຄູ່ຜົວເມຍສໍ້ໂກງຊັບ ດ້ວຍຮູບການກໍ່ເຫດນໍາຫຼາຍບໍລິສັດ ອັນ​ຕະ​ລາຍ​ແທ້

10th June 2020 0 By Admin

ໃນວັນທີ 9 ມິຖຸນາ 2020, ພັທ ສົມເພັດ ນາມມະວົງ ຮອງຫົວໜ້າພະແນກຕໍາຫຼວດ ກອງບັນຊາການ ປກສ ເມືອງຫາດຊາຍຟອງ ນວ ໄດ້ໃຫ້ສຳພາດຕໍ່ນັກຂ່າວ ປກສ ນວ ວ່າ: ພາຍຫຼັງໄດ້ຮັບຄຳຮ້ອງຟ້ອງຈາກຫຼາຍບໍລິສັດ ເລື່ອງການສໍ້ໂກງຊັບຂອງພົນລະເມືອງວ່າ: ທ້າວຈັນທະຄອນ ອາຍຸ 47 ປີ ອາຊີບ ຄ້າຂາຍ ແລະ ນາງ ຄຳເດືອນ ອາຍຸ 36 ປີ ອາຊີບຄ້າຂາຍ ບ້ານທ່ານາ ເມືອງຫາດຊາຍຟອງ (ຄູ່ຜົວເມຍ) ໄດ້ໄປຊື້(ຈ່າຍຜ່ອນ)ລົດຈັກ ຈໍານວນ 12 ຄັນຈາກຫຼາຍບໍລິສັດ.

ຫຼັງຈາກນັ້ນ, ເຈົ້າໜ້າທີ່ຕໍາຫຼວດພວກເຮົາຈຶ່ງໄດ້ກວດກາ ແລະ ເກັບກຳຂໍ້ມູນຫຼັກຖານຢ່າງລະອຽດ ເພື່ອຕິດຕາມຜູ້ກໍ່ເຫດມາດຳເນີນຄະດີ. ມາຮອດວັນທີ 2 ມິຖຸນາ 2020 ຈຶ່ງໄດ້ເຂົ້າກັກຕົວມາດຳເນີນການສືບສວນ.

.

ຜ່ານການສືບສວນ-ສອບສວນ ທ້າວ ຈັນນະຄອນ ແລະ ນາງ ຄຳເດືອນ ໄດ້ຍອມຮັບສາລະພາບຕໍ່ເຈົ້າໜ້າທີ່ວ່າ: ພວກກ່ຽວທັງສອງຄົນກໍ່ເຫດສໍ້ໂກງຊັບພົນລະເມືອງ (ລົດຈັກ) ຈຳນວນ 12 ຄັນ ນຳຮ້ານຂາຍລົດຈັກ ແລະ ບໍລິສັດຕ່າງໆແທ້, ໂດຍໃຊ້ຮູບການຜັດປ່ຽນກັນເປັນຜູ້ຊື້ ດ້ວຍການຈ່າຍຜ່ອນ ແລະ ປ່ຽນກັນເປັນຜູ້ຄ້ຳປະກັນ ພາຍຫຼັງໄດ້ລົດຈັກມາແລ້ວທັງສອງຄົນ ກໍໄດ້ເອົາລົດຈັກຈໍານວນດັ່ງກ່າວໄປໃຫ້ຄົນທີ່ບໍ່ຮູ້ຈັກນໍາໃຊ້ຕໍ່ ເພື່ອເອົາເງິນເປີເຊັນຄ່າດາວລົດຈັກນໍາເຂົາເຈົ້າ;

ສ່ວນເງິນທີ່ໄດ້ມາກໍເອົາໄປໃຊ້ຈ່າຍໃນຊີວິດປະຈຳວັນ ແລະ ທີ່ສໍາຄັນເມື່ອຮອດກຳນົດຈ່າຍເງິນຄ່າຜ່ອນຊໍາລະລົດ ພວກຜູ້ກ່ຽວພັດບໍ່ປະຕິບັດຕາມສັນຍາຂອງບໍລິສັດ.

.
ຕໍ່ກັບຄະດີດັ່ງກ່າວ, ເຈົ້າໜ້າທີ່ໜ່ວຍງານວິຊາສະເພາະ ປກສ ເມືອງຊາຍຟອງ ນະຄອນຫຼວງວຽງຈັນ ກຳລັງສືບຕໍ່ເປີດກວ້າງຂະຫຍາຍຜົນ ແລະ ເກັບກູ້ລົດຈັກກັບຄືນມາເພື່ອມອບໃຫ້ເຈົ້າຂອງເດີມ.