ຂອບ​ໃຈ​ອີ່ຫຼີ່ ຢີ່ປຸ່ນ ຊ່ວຍເຫຼືອລ້າ 13 ລ້ານໂດລາ ຊື້ອຸປະກອນທາງການແພດໃຫ້ລາວ

ຂອບ​ໃຈ​ອີ່ຫຼີ່ ຢີ່ປຸ່ນ ຊ່ວຍເຫຼືອລ້າ 13 ລ້ານໂດລາ ຊື້ອຸປະກອນທາງການແພດໃຫ້ລາວ

6th June 2020 0 By Admin

ຢີ່ປຸ່ນ ໃຫ້ການຊ່ວຍເຫຼືອລ້າ 13 ລ້ານໂດລາສະຫະລັດ ເພື່ອຊື້ອຸປະກອນທາງການແພດໃຫ້ ສປປ ລາວ
………………………
ວັນທີ 5 ມິຖຸນາ 2020 ທີ່ກະຊວງການຕ່າງປະເທດ, ນະຄອນຫຼວງວຽງຈັນ ໄດ້ມີພິທີລົງນາມເອກະສານແລກ ປ່ຽນສຳລັບໂຄງການຊ່ວຍເຫຼືອລ້າທີ່ມີຊື່ວ່າ: ໂຄງການພັດ ທະນາເສດຖະກິດ ແລະ ສັງຄົມ ໂດຍການລົງນາມຂອງທ່ານ ທອງສະຫວັນ ພົມວິຫານ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ທາເກວາກະ ເຄໂຊ, ເອກອັກ ຄະຣະຊະທູດຢິ່ປຸ່ນ ປະຈຳ ສປປ ລາວ, ມີຕາງໜ້າຈາກບັນ ດາກະຊວງເຂົ້າຮ່ວມເປັນສັກຂີພະຍານ.


ໂຄງການຊ່ວຍເຫຼືອລ້າຄັ້ງນີ້ ມີມູນຄ່າ 1,500 ລ້ານເຢັນ (ປະມານ 13.7 ລ້ານໂດລາສະຫະລັດ) ຈະນຳໃຊ້ເຂົ້າໃນການຈັດຊື້ລົດໂຮງໝໍ ແລະ ຕຽງສຳລັບຜູ້ຄົນເຈັບ ເພື່ອມອບໃຫ້ແກ່ລັດຖະບານລາວເຂົ້ານໍາໃຊ້ເຂົ້າໃນວຽກງານປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ COVID-19. ປັດຈຸບັນ, ປະເທດລາວສາມາດຈຳກັດການແຜ່ກະຈາຍຂອງເຊື້ອໂຄວິດ-19 ໄດ້ຢ່າງມີປະ ສິດທິພາບ, ແຕ່ການສືບຕໍ່ຍົກລະດັບລະບົບສາທາລະນະສຸກຂກແມ່ນມີຄວາມສຳຄັນເພື່ອກຽມພ້ອມຮັບມືຄວາມເປັນໄປໄດ້ຂອງການລະບາດພະຍາດດັ່ງກ່າວໃນຮອບໃໝ່.


ອຸປະກອນທາງການແພດທີ່ຖືກມອບພາຍໃຕ້ໂຄງ ການດັ່ງກ່າວນີ້ ຈະໄດ້ຮັບການນຳໃຊ້ ໂດຍສະເພາະໃນລະ ດັບຊຸມຊົນທ້ອງຖິ່ນຂອງລາວ ເຊີ່ງເປັນເຂດທີ່ຍັງມີຄວາມສ່ຽງທາງດ້ານລະບົບສາທາລະນະສຸກ.


ປີ 2020 ເປັນປີແຫ່ງການສ້າງຕັ້ງສາຍພົວພັນທາງ ການທູດລາວ-ຍິ່ປຸ່ນ ຄົບຮອບ 65 ປີ ແລະ ການເປັນຄູ່ຮ່ວມຍຸດທະສາດລະຫວ່າງສອງປະເທດຄົບຮອບ 5 ປີ. ທ່ານ ທູດທາເກວາກະ ກ່າວໃນພິທີວ່າ “ປະເທດຍີ່ປຸ່ນເອງໃນຖານະຄູ່ຮ່ວມຍຸດທະສາດຂອງ ສປປ ລາວ ຂໍສະແດງຄວາມເຄົາລົບ ແລະ ໃຫ້ການສະໜັບສະໜຸນຄວາມພາຍະຍາມຂອງລັດຖະບານລາວເພື່ອກ້າວຂ້າມສະຖານະການທີ່ຫຍຸ້ງຍາກໃນຄັ້ງນີ້. ໂດຍຜ່ານການຊ່ວຍເຫຼືອລ້າໃນຄັ້ງນີ້, ພວກເຮົາມີຄວາມຫວັງທີ່ຈະຈັບມືກັນຍ່າງກ້າວຂ້າມອຸປະສັກໃນຄັ້ງນີ້ໃຫ້ໄດ້”.
Cr: ສະຖານທູດຍິ່ປຸ່ນ ປະຈໍາ ສປປ ລາວ