ຕິດຄຸກ4ຄັ້ງບໍ່ຫລາບ! ກັບ​ມາ​ຂີ້ລັກ​ຄື​ເກົ່າ

ຕິດຄຸກ4ຄັ້ງບໍ່ຫລາບ! ກັບ​ມາ​ຂີ້ລັກ​ຄື​ເກົ່າ

4th June 2020 0 By Admin

ເຈົ້າໜ້າທີ່ຕໍາຫຼວດພະແນກສືບສວນ-ສອບສວນ ປກສ ແຂວງ ບໍລິຄໍາໄຊ ໄດ້ຈັບ ທ້າວ ເກັ່ງ ຫຼື ໄມຄໍາ ອາຍຸ 33 ປີ ຢູ່ບ້ານ ນໍ້າງອມ ເມືອງວຽງທອງ ແຂວງ ບໍລິຄໍາໄຊ ເຊິ່ງເປັນຜູ້ຖືກຫາໃນຄະດີ ລັກຊັບພົນລະເມືອງ ປະເພດລົດຈັກ, ຖືກເຈົ້າໜ້າທີ່ກັກຕົວ ໃນວັນທີ 15 ມັງກອນ 2020 ໄດ້ຮັບສາລະພາບວ່າ ຕົນເຄີຍຖືກຈໍາຄຸກມາແລ້ວ 4 ຄັ້ງໃນສະຖານລັກຊັບພົນລະເມືອງ, ພາຍຫຼັງອອກຄຸກມາກໍ່ໄດ້ເຄື່ອນໄຫວລັກຊັບອີກ ຈໍານວນ 4 ຄັ້ງກ່ອນຖືກເຈົ້າໜ້າທີ່ກັກຕົວ ມາດໍາເນີນຄະດີ.

ຮູບແບບເຄື່ອນໄຫວ ແມ່ນທຳທ່າຂໍຢືມ ແລ້ວນໍາເອົາໄປຂາຍ ມາແລ້ວ 4 ຄັ້ງ, ໄດ້ລົດຈັກ 4 ຄັນ ເຊິ່ງຄັ້ງທີ່ 1 ເດືອນພະຈິກ 2019 ໄດ້ໄປຕັວະຢືມລົດຈັກເວບໂຄລາວສີດໍາບໍ່ມີປ້າຍທະບຽນ ຂອງນາງ ນີ ຢູ່ບ້ານ ຫ້ວຍເລິກ ເມືອງ ທ່າພະບາດ ແຂວງ ບໍລິຄໍາໄຊ ເອົາໄປຂາຍໃນລາຄາ 700,000 ກີບ, ຄັ້ງທີ 2 ໃນເດືອນ ທັນວາ 2019 ໄດ້ຕັວະຂໍຢືມລົດຈັກເວບຈີນ ສີແດງ-ດໍາ ຂອງທ້າວ ວັນ ຢູ່ບ້ານນາພົງ ເມືອງ ປາກກະດິງ ເອົາໄປຂາຍໃນລາຄາ 500,000 ກີບ, ຄັ້ງທີ 3 ໃນຄັ້ງວັນທີ 1 ມັງກອນ 2020 ຕັວະຢືມລົດຈັກເວບຈີນ ຂອງທ້າວ ຄໍາພາ ຢູ່ບ້ານປ່າຄາ ເມືອງ ຄໍາເກີດ ລາຄາ 500,000 ກີບ, ຄັ້ງທີ່ 4 ໃນໄລຍະເດືອນ ມັງກອນ 2020 ໄດ້ໄປຕັວະຢືມລົດຈັກເວບ 100 ສີແດງດໍາ ຂາຍໃນລາຄາ 1.700,000 ກີບ.

ສ່ວນເງິນທີໄດ້ຈາກການຂາຍລົດແຕ່ລະຄັ້ງກໍ່ເອົາໄປໃຊ້ຈ່າຍຊື້ເບຍມາດື່ມກັບໝູ່ ແລະ ເງິນທີໄດ້ຫຼ້າສຸດ 1.700,000 ກໍ່ເຊັ່ນດຽວກັນ ເອົາໄປຈ່າຍໝົດເງິນ 400.000 ກີບ, ຈາກນັ້ນ ເມຍ ຂອງຜູ້ຊື້ລົດໄດ້ເອົາລົດຈັກທີ່ຮັບຊື້ມາສົ່ງ ພ້ອມທັງຂໍເງິນຄືນ, ແຕ່ໂຈນບໍ່ມີເງິນໃຫ້ຄົບເພາະເອົາໄປຈ່າຍແລ້ວ ຈະສົ່ງຄືນແຕ່ຈໍານວນ 1.300,000 ກີບ, ຈຶ່ງເຮັດໃຫ້ເມຍຜູ້ຮັບຊື້ບໍ່ພໍໃຈ ແລະ ໄດ້ໄປແຈ້ງຄວາມກັບນາຍບ້ານ ນາງອຍ ແຈ້ງໃຫ້ເຈົ້າໜ້າທີ່ ປກສ ເມືອງ ຄໍາເກີດ ມາກັກຕົວຜູ້ກ່ຽວໄປດໍາເນີນຄະດີ.