ອີກ​ບໍ່​ດົນ​ໂສມ​ໃໝ່​ທີ່​ສວຍ​ງາມ​ ແຄມຂອງນະຄອນໄກສອນພົມວິຫານ ຖ້າ​ສຳ​ຜັດ​ເລີຍ

ອີກ​ບໍ່​ດົນ​ໂສມ​ໃໝ່​ທີ່​ສວຍ​ງາມ​ ແຄມຂອງນະຄອນໄກສອນພົມວິຫານ ຖ້າ​ສຳ​ຜັດ​ເລີຍ

4th June 2020 0 By Admin

ມາຮອດປັດຈຸບັນ ໂຄງການກໍ່ສ້າງກັນຕາຝັ່ງເຈື່ອນແຄມຂອງໃນນະຄອນໄກສອນ ພົມວິຫານ, ແຂວງ ສະ ຫວັນນະເຂດ ຄືບຫນ້າຢ່າງຕໍ່ເນື່ອງ, ຄາດວ່າຈະສໍາເລັດ 100% ໃນຕົ້ນປີ 2021.


ໂຄງການດັ່ງກ່າວ ແມ່ນ 1 ໃນ 7 ກິດຈະກໍາທີ່ນອນຢູ່ ໃນໂຄງການພັດທະນາຕົວເມືອງຕາມແລວທາງເສດຖະ ກິດຕາເວັນອອກ-ຕາເວັນຕົກອະນຸພາກພື້ນແມ່ນໍ້າຂອງ ຫລື GMS ຂອງແຂວງ ສະຫວັນນະເຂດ, ເລີ່ມລົງມືກໍ່ສ້າງນັບແຕ່ທ້າຍປີ 2019 ເປັນຕົ້ນມາ, ມູນຄ່າທັງຫມົດ 4,5 ລ້ານກ່ວາໂດລາສະຫະລັດ ໂດຍແມ່ນທະນາຄານພັດທະ ນາອາຊີ ຫລື ADB ສະຫນອງທຶນໃຫ້ ແລະ ຮັບເຫມົາກໍ່ສ້າງໂດຍ ບໍລິສັດ ລາວມີໄຊ ກໍ່ສ້າງ.


ທ່ານ ຄໍາຟອງ ວໍລະບຸດ ຮອງຜູ້ອໍານວຍການບໍລິສັດ ລາວມີໄຊກໍ່ສ້າງ ໃຫ້ຮູ້ວ່າ: ໂຄງການນີ້ ປະກອບມີ 2 ຫນ້າວຽກໃຫຍ່ ຄື: ວຽກກໍ່ສ້າງກັນເຈື່ອນແຄມຂອງໃນຄວາມຍາວທັງໜົດ 980 ແມັດ ເລີ່ມຈາກທ່າບັກເກົ່າລຽບລົງໄປ ຕາມລໍາແມ່ຂອງໂດຍຈະໄດ້ມີການຖົມດິນຊາຍອອກຈາກຂອບທາງອອກໄປ 50 ແມ້ດ ແລະ ລຽງຫີນລຽບຕາມແຄມຂອງ, ມີບໍລິມາດຊາຍຖົມທັງໜົດ 246.717 ແມັດກ້ອນ ພ້ອມວຽກຕົບແຕ່ງຄວາມງາມໜ້າເດີ່ນດ້ວຍເບຕົງລວດ ລາຍ, ສວນດອກໄມ້, ບ່ອນຫັດກາຍ, ຈຸດນັ່ງຊົມວິນ-ນັ່ງເບິ່ງເຮືອຊ່ວງ ແລະ ຮ້ານຄ້າຂາຍເຄື່ອງ ເຊິ່ງໜ້າວຽກນີ້ສໍາເລັດແລ້ວຫລາຍກ່ວາ 70%.

ສ່ວນໜ້າວຽກທີ 2 ແມ່ນການກໍ່ສ້າງເສັ້ນທາງເບຕົງເສີມເຫຼັກຄວາມຍາວ 980 ແມັດຕາມຄວາມຍາວກັນເຈື່ອນ, ມີໜ້າທາງກວ້າງ 7 ແມັດ, ທາງ ຍ່າງສອງຂ້າງທາງ ແລະ ບ່ອນຈອດລົດສະເພາະ. ປັດຈຸບັນ ຫນ້າວຽກນີ້ ສໍາເລັດແລ້ວຫລາຍກ່ວາ 95%.


ສໍາລັບວຽກທີ່ຍັງຄ້າງຄາແມ່ນ ຈຸດນັ່ງຊົມວິວ-ນັ່ງເບິ່ງເຮືອຊ່ວງ, ຮ້ານຄ້າ, ກໍ່ສ້າງຫ້ອງນໍ້າ, ການຕົບແຕ່ງປະດັບດາ, ປູກຫຍ້າ ແລະ ລະບົບໄຟຟ້າຕ່າງໆ ຄາດວ່າທຸກຫນ້າວຽກ ຈະສໍາເລັດ 100% ໃນຕົ້ນປີ 2021 ຕາມແຜນທີ່ວາງໄວ້.
ໂຄງການດັ່ງກ່າວ ຖ້າຫາກກໍ່ສ້າງສໍາເລັດຈະຊ່ວຍໃຫ້ເຂດແຄມຂອງໃນນະຄອນໄກສອນ ພົມວິຫານ ມີໂສມຫນ້າໃຫມ່ ແລະ ຈະກາຍເປັນບ່ອນທ່ອງທ່ຽວ, ພັກຜ່ອນ ແລະ ອອກກໍາລັງກາຍແຫ່ງໃຫມ່ຂອງແຂວງ ສະຫວັນນະເຂດ ຕື່ມອີກ.