ຈັດພິທີນຳສົ່ງແຮງງານຕ່າງປະເທດທີ່ລັກລອບເຂົ້າເມືອງ ແລະ ລັກລອບປະກອບອາຊີບ ຢູ່ໂຄງການເສັ້ນທາງລົດໄຟ ລາວ-ຈີນ ທີ່ ແຂວງວຽງຈັນ

ຈັດພິທີນຳສົ່ງແຮງງານຕ່າງປະເທດທີ່ລັກລອບເຂົ້າເມືອງ ແລະ ລັກລອບປະກອບອາຊີບ ຢູ່ໂຄງການເສັ້ນທາງລົດໄຟ ລາວ-ຈີນ ທີ່ ແຂວງວຽງຈັນ

20th November 2019 0 By Lao Admin

ໃນວັນທີ 18 ພະຈິກ 2019 ຜ່ານມານີ້ຢູ່ຫ້ອງປະຊຸມພະແນກແຮງງານ ແລະ ສະຫວັດດີການສັງຄົມ ແຂວງວຽງຈັນໄດ້ຈັດພິທີນຳສົ່ງຄົນຕ່າງປະເທດທີ່ມາເຄື່ອນໄຫວລັກລອບເຂົ້າປະເທດລາວ ແລະ ປະກອບອາຊີບບໍ່ຖືກຕ້ອງໃຫ້ກັບກົມກວດກາຄົນເຂົ້າ – ອອກເມືອງ ກະຊວງປ້ອງກັນຄວາມສະຫງົບ ຈຳນວນ 9 ຄົນ ຍິງ 1 ຄົນ ເດັກນ້ອຍ 1 ຄົນ ເພື່ອນຳສົ່ງກັບຄືນປະເທດ ໂດຍການເຂົ້າຮ່ວມຂອງ ທ່ານຄຳພູ ສຸພິດາ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມ ແຂວງວຽງຈັນ , ທ່ານ ພັທ ໄຊໝານ ສິງຂະປັນຍາ ຫົວໜ້າພະແນກຄຸ້ມຄອງຄົນຕ່າງປະເທດຫ້ອງສັນຕີບານ ປກສ ແຂວງວຽງຈັນ ມີບັນດາພະນັກງານທີ່ກ່ຽວຂ້ອງ ແລະ ຄົນຕ່າງປະເທດ(ປະເທດກຳປູເຈ່ຍ) ເຂົ້້າຮ່ວມ.

ໂດຍປະຕິບັດຕາມ ກົດໝາຍວ່າດ້ວຍການເຂົ້າ-ອອກເມືອງ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວ ສະບັບປັບປຸງໃໝ່ ເລກທີ 59/ສພຊ, ລົງວັນທີ່ 26 ທັນວາ 2014, ອີງຕາກົດໝາຍວ່າດ້ວຍແຮງງານ(ສະບັບປັບປຸງໃໝ່) ເລກທີ 43/ສພຊ, ລົງວັນທີ 24 ທັຍວາ 2013 ແລະ ຂໍ້ຕົກລົງຂອງທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ເລກທີ 4277/ຮສສ, ລົງວັນທີ 6 ທັນວາ 2016 ວ່າດ້ວຍ ການຈັດຕັ້ງ ແລະ ການເຄື່ອນໄຫວຂອງເຈົ້າໜ້າທີ່ກວດກາແຮງງານ ພ້ອມທັງສືບຕໍ່ແຜນຂອງ 2 ກະຊວງຄືກະຊວງແຮງງານ ແລະ ສະຫວັດດີການສັງຄົມ ແລະ ກະຊວງປ້ອງກັນຄວາມສະຫງົບ ໃນການແກ້ໄຂຄົນຕ່າງປະເທດທີ່ເຂົ້າມາເຄື່ອນໄຫວບໍ່ຖືກຕ້ອງຕາມລະບຽບກົດໝາຍຂອງ ສປປ ລາວ ສະບັບເລກທີ 0584/ຮສສ ລົງວັນທີ 27 ກຸມພາ 2019

 

ສະນັ້ນໃນວັນທີ 13 ພະຈີກ 2019 ເຈົ້າໜ້າທີ່ 2 ຂະແໜງການຮ່ວມ ພະແນກແຮງງານ ແລະ ສະຫວັດດີການສັງຄົມ ແລະ ເຈົ້າໜ້າທີ່ຕຳຫຼວດ ປກສ ແຂວງວຽງຈັນ ໄດ້ລົງກວດກາຢູ່ເຂດກໍ່ສ້າງເສັ້ນທາງລົດໄຟລາວ-ຈີນ ຢູ່ບ້ານໂພນທອງ ເມືອງຫີນເຫີບ ແຂວງວຽງຈັນ ຈື່ງສາມາດກວດພົບເຫັນຄົນຕ່າງປະເທດໂດຍສະເພາະແມ່ນຄົນ (ປະເທດກຳປູເຈ່ຍ) ຈໍານວນ 9 ຄົນ ຍິງ 1 ຄົນ ເດັກນ້ອຍ 1 ຄົນ ເຊີ່ງພວກກ່ຽວໄດ້ເຂົ້າມາປະເທດລາວໂດຍຈ້າງເຮືອຈັກຂ້າມແມ່ນ້ຳຂອງເຂົ້າມາທາງແຂວງຈຳປາສັກໂດຍບໍ່ໄດ້ຜ່ານດ່ານເຂົ້່າ – ອອກເມືອງ ເຂົ້າມາບໍ່ຖືກຕ້ອງຕາມກົດໝາຍ ໂດຍມີນາຍໜ້າໄປຮັບເອົາພວກກ່ຽວມາປະກອບອາຊີບເປັນກຳມະກອນຢູ່ນຳບໍລິສັດຊີນາຍໂນຮາຍໂດສັນຍາທີ່ V ສາຂາ IIໂຄງການກໍ່ສ້າງເສັ້ນທາງລົດໄຟລາວ-ຈີນ ທີ່ ເມືອງຫີນເຫີບ ແຂວງວຽງຈັນ

 

ພວກກ່ຽວແມ່ນລັກລອບເຂົ້າເມືອງຜິດກົດໝາຍ ແລະ ລັກປະກອບອາຊີບຢູ່ ສປປ ລາວ ໂດຍບໍ່ມີເອກະສານ, ບໍ່ມີບັດພັກເຊົາ, ບໍ່ມີບັດອອກແຮງງານ ຖ້າຢາກມາປະກອບອາຊິບ ຫຼື ອອກແຮງງານຢູ່ ສປປ ລາວ ຕ້ອງປະກອບເອກະສານໃຫ້ຖືກຕ້ອງຕາມລະບຽບກົດໝາຍຂອງ ສປປ ລາວ ຈື່ງສາມາດອອກແຮງງານໄດ້ ຄົນຕ່າງປະເທດຈຳນວນດັ່ງກ່າວແມ່ນຈະໄດ້ສົ່ງໃຫ້ກົມ 206 ກະຊວງປ້ອງກັນຄວາມສະຫງົບ ເພື່ອນໍາສົ່ງພວກກ່ຽວກັບຄືນປະເທດຢ່າງປອດໄພ.

 

ທີ່ມາ: ຂ່າວ ປກສ ແຂວງວຽງຈັນ