ຮ້ານປຶ້ມດີບຸກ ມອບປຶ້ມອ່ານໃຫ້ ໂຮງຮຽນມັດທະຍົມສົງ ຫົງສາ ຈຳນວນ 400 ກວ່າຫົວ

ຮ້ານປຶ້ມດີບຸກ ມອບປຶ້ມອ່ານໃຫ້ ໂຮງຮຽນມັດທະຍົມສົງ ຫົງສາ ຈຳນວນ 400 ກວ່າຫົວ

26th May 2020 0 By Admin

ຮ້ານປຶ້ມດີບຸກ ນະຄອນຫຼວງວຽງຈັນ ໄດ້ນຳເອົາປຶ້ມອ່ານ ຈຳນວນ 441 ຫົວ ມູນຄ່າ 12 ລ້ານ 7 ແສນກວ່າກີບ ມອບໃຫ້ແກ່ໂຮງຮຽນມັດທະຍົມສຶກສາສົງ ເມືອງຫົງສາ ແຂວງໄຊຍະບູລີ ໃນຕອນເຊົ້າຂອງວັນທີ 25 ພຶດສະພາ 2020 ນີ້, ຢູ່ທີ່ໂຮງຮຽນແຫ່ງດັ່ງກ່າວ.

ໂດຍກ່າວມອບແມ່ນທ່ານ ສົມໄໝ ພົມມະຈັນ ຜູ້ຈັດການຮ້ານປຶ້ມດີບຸກ ພ້ອມດ້ວຍທີມງານ ແລະ ກ່າວຮັບໂດຍແມ່ນພະອາຈານ ອ່ອນຕາ ສາລິກາທອງ ເຈົ້າຄະນະ ອພສ ເມືອງຫົງສາ ແລະ ເຂົ້າຮ່ວມເປັນສັກຄີພິຍານໃນຄັ້ງນີ້, ມີຕ່າງໜ້າຫ້ອງການ ສຶກສາທິການ ແລະ ກິລາເມືອງ, ມີຄະນະຜູ້ອຳນວຍການໂຮງຮຽນມັດທະຍົມສຶກສາສົງ ພ້ອມດ້ວຍຄູ-ອາຈານ ແລະ ນັກຮຽນສົງເຂົ້າຮ່ວມຈຳນວນໜຶ່ງ.

ເຊິ່ງປຶ້ມທີ່ນຳມາມອບໃນຄັ້ງນີ້, ປະກອບມີປຶ້ມໝວດທຳມະ, ໝວດສ້າງແຮງບັນດານໃຈ, ໝວດບໍລິຫານ, ທຸລະກິດ-ການເງິນ, ຈິດຕະວິທະຍາ, ໝວດພັດທະນາຕົນເອງ, ເລື່ອງສັ້ນ, ນະວະນິຍາຍ ແລະ ປະຫວັດສາດຕ່າງໆ ຕື່ມອີກ.,​ເຊິ່ງ​ໄດ້ຈາກປຸກລະດົມໃນການປະກອບສ່ວນ​ຂອງນັກອ່ານ,​ນັກຂຽນ ແລະ​ ຜູ້​ໃຈບຸນຫລາຍທ່ານ ໃນນີ້ ເປັນປຶ້ມພາສາລາວ ກວມ 70% ແລະ ພາສາຕ່າງປະເທດ 30%.

ທັງນີ້, ເພື່ອເປັນການສົ່ງເສີມນັກຮຽນ-ນັກສຶກສາໃນການຝຶກຝົນທັກສະ, ແນວຄວາມຄິດ ແລະ ຈິດໃຈໃຫ້ແກ່ໄວໜຸ່ມລາວໃຫ້ເປັນຄົນມັກອ່ານ, ໃຫ້ເປັນຄົນທີ່ມີຄວາມຮູ້-ຄວາມສາມາດ ແລະ ເປັນບຸກຄົນສືບທອດໃນການພັດທະນາປະເທດຊາດໃນອະນາຄົດສືບໄປ.
ຂ່າວ​: ກິດ​ຕິ​ສັກ