ເຈົ້າເມືອງຊົນນະບູລີ ລົງຕິດຕາມແຮງງານລາວ ທີ່ສູນກັກກັນຊົ່ວຄາວ ໂຮງຮຽນປະຖົມໂນນຄູ້

ເຈົ້າເມືອງຊົນນະບູລີ ລົງຕິດຕາມແຮງງານລາວ ທີ່ສູນກັກກັນຊົ່ວຄາວ ໂຮງຮຽນປະຖົມໂນນຄູ້

19th May 2020 0 By Admin

ຫຼັງຈາກທີ່ໄດ້ເປິດສູນກັກກັນຊົ່ວຄາວເພື່ອຮອງຮັບແຮງງານທີ່ກັບຈາກຕ່າງປະເທດ ທີ່ມີການລະບາດຂອງພະຍາດ ໂຄວິດ 19 ໃນຮອບທໍາອິດ ໃນທົ່ວເມືອງກໍ່ໄດ້ເປິດສູນຮອງຮັບເພື່ອກັກຕົວ 14 ວັນ ເພື່ອຕິດຕາມອາການພະຍາດ ໂຄວິດ 19 ຜ່ານການຕິດຕາມຢ່າງໃກ້ຊິດຂອງບັນດາແພດໝໍ ອໍານາດການປົກຄອງບ້ານ, ທະຫານ-ຕໍາຫຼວດ ແລະ ການນໍາຂອງເມືອງ ເຫັນໄດ້ວ່າແຮງງານທີ່ຖືກກັກຊົ່ວຄາວຄົບ 14 ວັນ ບໍ່ມີກໍລະນີສົງໃສຕິດເຊື້ອ.

ດັ່ງນັ້ນ, ທາງທີມງານແພດໝໍ ຈິງໄດ້ເຮັດໃບຢັ້ງຢືນຮັບຮອງ ແລະໃຫ້ກັບບ້ານໄດ້. ແຕ່ເຖີງແມ່ນວ່າເມືອງຊົນນະບູລີ ຈະບໍ່ມີກໍ່ລະນີສົງໃສກໍ່ຕາມ ແຕ່ທາງການນໍາຂອງເມືອງກໍ່ຍັງໄດ້ເອົາໃຈໃສ່ສຶບຕໍ່ເຝົ້າລະວັງ ແລະກະກຽມຄວາມພ້ອມຮອບດ້ານ ໂດຍສະເພາະກໍ່ແມ່ນສູນຮອງຮັບແຮງງານທີ່ກັບຄືນປະເທດອີກຄັ້ງທີ 2 ເຊີ່ງເມືອງກໍ່ໄດ້ກໍານົດສູນກັກກັນຊົ່ວຄາວ 2 ສູນຄື: ສູນໂຮງຮຽນປະຖົມສົມບູນໂນນຄູ້ ແລະສູນໂຮງຮຽນປະຖົມບ້ານນາທອງ ດັ່ງນັ້ນ ມາໃນວັນທີ 18 ພຶດສະພາ 2020 ນີ້ ທ່ານ ສຸວິໄລ ຫຼວງຊະລາດ ເລຂາພັກເມືອງເຈົ້າເມືອງຊົນນະບູລີ ໄດ້ລົງຕິດຕາມກວດກາແຮງງານທີ່ສູນກັກກັນຊົ່ວຄາວໂຮງຮຽນປະຖົມສົມບູນໂນນຄູ້ ມີຈໍານວນຜູ້ທີ່ຖືກກັກກັນທັງໝົດ 21 ຄົນ ຍີງ 6 ຄົນ.

ສໍາລັບບຸກຄົນທີ່ຖືກກັກກັນໃນຄັ້ງນີ້ແມ່ນຈະໄດ້ມີການຕິດຕາມກວດກາສຸຂະພາບຢ່າງໃກ້ສິດ ຈາກພະນັກງານແພດໝໍປະຈໍາຈົນກວ່າຈະເຖິງກໍານົດ 14 ວັນ ຫາກບໍ່ພົບກໍລະນີສົງໃສ ຫຼື ເປັນໄຂ້ທາງສູນແມ່ນຈະອະນຸຍາດໃຫ້ກັບບ້ານເຮືອນຂອງຕົນໄດ້. ສໍາລັບຢູ່ສູນໂຮງຮຽນປະຖົມບ້ານນາທອງ ມີຜູ້ຖືກກັກກັນທັງໝົດ 5 ຄົນ ຍິງ 1 ຄົນ.


ໂອກາດລົງເຄື່ອນໄຫວຕິດຕາມກວດກາແຮງງານລາວທີ່ກັບຄືນປະເທດ ທີ່ສູນກັກກັນຊົ່ວຄາວໃນຄັ້ງນີ້ ທ່ານເຈົ້າເມືອງຊົນນະບູລີ ກໍ່ໄດ້ເນັ້ນໜັກໜ່ວຍສະເພາະກິດ ທະຫານ, ຕໍາຫຼວດ, ແພດໝໍ ແລະອໍານາດການປົກຄອງບ້ານຕ້ອງເພີ່ມທະວີການເຝົ້າລະວັງ ແລະຕິດຕາມຢ່າງໃກ້ຊິດ ຕໍ່ແຮງງານດັ່ງກ່າວຢ່າງເຄັ່ງຄັດ ເປັນຕົ້ນແມ່ນໃຫ້ແຍກຫ້ອງກັກກັນທີ່ມີຈໍານວນຫຼາຍໃຫ້ມີຈໍານວນໜ້ອຍລົງເພື່ອລີກລ້ຽງການແອອັດ, ຖ້າຫາກບຸກຄົນໃດມີອາການໄຂ້ຕ້ອງໄດ້ແຍກປ່ຽວ ພ້ອມທັງຕິດຕາມຢ່າງໃກ້ຊິດ ພ້ອມນີ້ທ່ານຍັງໄດ້ເນັ້ນໃສ່ພະນັກງານ ແລະພາກສ່ວນທີ່ກ່ຽວຂ້ອງຕ້ອງເອົາໃຈໃສ່ໂຄສະນາສຸຂະສຶກສາໃຫ້ປະຊາຊົນມີຄວາມຕືນຕົວເປັນເຈົ້າການ ໃນການເຝົ້າລະວັງ, ຮ່ວມກັນສືບຕໍ່ແກ້ໄຂທາງດ້ານຂໍ້ຫຍຸ້ງຍາກຕ່າງໆ ກຽມພ້ອມຮອງຮັບຕື່ມອີກ ເນື່ອງຈາກວ່າໄລຍະນີ້ຍັງມີແຮງງານລາວຢູ່ຕ່າງປະເທດເດີນທາງກັບຄືນບ້ານເມືອງຢູ່ເລື້ອຍໆ.

ນອກຈາກພະຍາດດັ່ງກວ່ານີ້ແລ້ວຍັງຈະຕ້ອງເອົາໃຈໃສ່ໃນການເຜົ້າລະວັງຕໍ່ກັບພະຍາດໄຂ້ຍຸງລາຍໃນໄລຍະລະດູຝົນ. ຫຼັງຈາກນັ້ນທ່ານເຈົ້າເມືອງກໍ່ໄດ້ມອບຜ້າອັດປາກ, ສະບູ, ເຈວລ້າງມື ແລະ ຖັງໃສ່ນໍ້າ ທີ່ໄດ້ຮັບຈາກການຊ່ວຍເຫຼືອຂອງອົງການສຸພານິມິດປະຈໍາເມືອງຊົນນະບູລີ ມອບໃຫ້ຜູ້ທີ່ຖຶກກັກກັນໃນສູນໄດ້ນໍາໃຊ້ ເພື່ອປ້ອງກັນຄວມຄຸມການແຜລະບາດຂອງພະຍາດໂຄວິດ 19


ທີ່ມາ: ຖວທ ເມືອງຊົນນະບູລີ