ນະຄອນຫຼວງ! ເລັ່ງສ້າງຄັນຄູກັນຕາຝັ່ງເຈື່ອນ ເພື່ອປ້ອງກັນນ້ຳຖ້ວມໃນລະດູຝົນ

ນະຄອນຫຼວງ! ເລັ່ງສ້າງຄັນຄູກັນຕາຝັ່ງເຈື່ອນ ເພື່ອປ້ອງກັນນ້ຳຖ້ວມໃນລະດູຝົນ

17th May 2020 0 By Admin

ທ່ານ ວິ​ລຸນ​ໄຊ ຈິດ​ທະ​ໄຊ ຫົວ­ໜ້າ​ໜ່ວຍ​ງານ​ປ້ອງ​ກັນ​ຕາ​ຝັ່ງ​ເຈື່ອນ ຂະ­ແໜງ​ຄຸ້ມ​ຄອງ​ທາງ­ນ້ຳ ພະ​ແນກ ໂຍທາທິການ ແລະ ຂົນສົ່ງ ນະຄອນຫຼວງວຽງຈັນ (ຍທຂ ນວ) ໃຫ້​ຮູ້ວ່າ: ປັດຈຸບັນ ພະ​ແນກ ຍທຂ ນວ ໄດ້​ສຸມ​ໃສ່​ຫຼາຍ​ໂຄງ­ການ​ປ້ອງ​ກັນ​ຕາ​ຝັ່ງ​ເຈື່ອນ ທັງ​ໂຄງ­ການ​ທີ່​ຄ້າງ​ຄາ​ມາ​ຫຼາຍ​ປີ ແລະ ໂຄງ­ການ​ໃໝ່ ເນື່ອງ​ຈາກ​ໄລ­ຍະ​ນີ້​ເປັນ​ລະ­ດູ­ແລ້ງ​ນ້ຳ​ບົກ​ແຫ້ງ ເປັນ​ໂອ­ກາດ​ດີ​ທີ່​ຈະ​ດຳ­ເນີນ​ການ​ກໍ່­ສ້າງ​ຂອງ​ບໍ­ລິ­ສັດ​ຜູ້​ຮັບ​ເໝົາ ເປັນ­ຕົ້ນ​ໂຄງ­ການ​ຕາ­ຝັ່ງ​ເຈື່ອນ​ແຄມ​ຂອງ​ໄລ­ຍະ 2 ໂດຍ​ນຳ​ໃຊ້​ເງິນ​ກູ້​ຈາກ ສ ເກົາ­ຫຼີ ແຕ່​ທາດ​ຂາວ-ທ່າ­ເຮືອ​ຫຼັກ 4 ຕາມ​ແຜນ​ໃຫ້​ໄດ້​ປະ­ມູນ​ເດືອນ​ເມ­ສາ-ເດືອນ​ພຶດ­ສະ­ພາ 2020 ແຕ່​ຍ້ອນ​ມີ​ພະ­ຍາດ ໂຄວິດ-19 ລະ­ບາດ ຈຶ່ງ​ໄດ້​ເລື່ອນ​ໄປ ຄາດ​ວ່າ​ຈະ​ໄດ້​ປະ­ມູນ​ເດືອນ​ມິ­ຖຸ­ນາ 2020.

ໂຄງ­ການ​ຫຼຸດ­ຜ່ອນ​ໄພ­ພິ­ບັດ​ປີ 2019 ມີ​ໂຄງ­ການ​ປ້ອງ​ກັນ​ຕາ​ຝັ່ງ​ເຈື່ອນ​ຫ້ວຍ​ນ້ຳ​ເຄັມ ຍາວ 660 ແມັດ ມູນ​ຄ່າ 18,7 ຕື້​ກີບ ໂຄງ­ການ​ກໍ່­ສ້າງ​ຕາ­ຝັ່ງ​ເຈື່ອນ​ນ້ຳ​ງື່ມ​ຈຸດ​ສົ້ນ​ຂົວ​ທ່າ​ງ່ອນ ຍາວ 150 ແມັດ ມູນ​ຄ່າ 4,1 ຕື້​ກີບ ເຊິ່ງ​ໄດ້​ປະ­ມູນ ແລະ ຄັດ​ເລືອກ​ເອົາ​ບໍ­ລິ­ສັດ​ທີ່​ປຶກ­ສາ​ແລ້ວ ຄາດ​ວ່າ​ຈະ​ໄດ້​ກໍ່­ສ້າງ​ເດືອນ​ມິ­ຖຸ­ນາ 2020 ແລະ ຈະ​ໃຫ້​ສຳ­ເລັດ​ພາຍ​ໃນ 1 ປີ ນອກ​ນີ້ ຍັງ​ໄດ້​ສືບ­ຕໍ່​ປະ­ຕິ­ບັດ​ໂຄງ­ການ​ຟື້ນ​ຟູ​ໄພ­ພິ­ບັດ​ທີ່​ຄ້າງ​ຄາ​ມາ​ຫຼາຍ​ປີ ເປັນ­ຕົ້ນ​ໂຄງ­ການ​ປ້ອງ​ກັນ​ຕາ​ຝັ່ງ​ເຈື່ອນ​ບ້ານ​ຫ້ອມ ຍາວ 1.500 ແມັດ ຄືບ​ໜ້າ 65% ຄາດ​ວ່າ​ຈະ​ສຳ­ເລັດ​ທ້າຍ​ປີ 2021 ໂຄງ­ການ​ຕາ​ຝັ່ງ​ເຈື່ອນ​ບ້ານ​ຊາຍ​ຟອງ 800 ແມັດ ຄືບ​ໜ້າ 95% ຄາດ​ວ່າ​ຈະ​ສຳ­ເລັດ​ທ້າຍ​ປີ 2020 ແລະ ເດືອນ​ມິ­ຖຸ­ນາ 2020 ສືບ­ຕໍ່​ປະ­ຕິ­ບັດ​ໂຄງ­ການ​ຕາ­ຝັ່ງ​ເຈື່ອນ​ບ້ານ​ຫ້ວຍ​ຫາງ 1.760 ແມັດ ມູນ​ຄ່າ 51 ຕື້​ກີບ​ໃຫ້​ສຳ­ເລັດ​ປີ 2021.

ນອກ​ນີ້, ທ້າຍ​ປີ 2020 ຍັງ​ຈະ​ເລັ່ງ​ລົງ​ສຳ​ຫຼວດ​ຈຸດ​ທີ່​ມີ​ຄວາມ​ສ່ຽງ​ການ​ເຊາະ​ເຈື່ອນ​ຕາມ​ລຳ​ນ້ຳ­ຂອງ ໂດຍ​ສະ​ເພະ​ເຂດ​ເມືອງ​ຫາດ​ຊາຍ​ຟອງ ແລະ ເມືອງ​ປາກ​ງື່ມ ເພື່ອ​ສະ­ເໜີ​ເຂົ້າ​ແຜນ​ງົບ­ປະ­ມານ​ປີ 2021 ມີ 3 ໂຄງ­ການ ນວ ມີ​ນ້ຳ­ຂອງ​ຍາວ 182 ກິ­ໂລ­ແມັດ ໄດ້​ສຳ­ເລັດ​ການ​ປະ­ຕິ­ບັດ​ປ້ອງ​ກັນ​ຕາຝັ່ງ​ເຈື່ອນ​ແລ້ວ 63 ກິ­ໂລ­ແມັດ ເທົ່າ​ກັບ 34,6% ການ​ປະ­ຕິ­ບັດ​ໄດ້​ໜ້ອຍ ຍ້ອນ​ງົບ­ປະ­ມານ​ມີ​ຈຳ­ກັດ ອາ­ໄສ​ແຕ່​ງົບ­ປະ­ມານ​ຂອງ​ລັດ ແລະ ເງິນ​ກູ້​ຢືມ​ຈາກ​ຕ່າງ­ປະ­ເທດ​ຈຳ­ນວນ​ໜຶ່ງ.


ນອກ­ຈາກ​ແຄມ​ນ້ຳ­ຂອງ ແລະ ແຄມ​ນ້ຳ​ງື່ມ​ແລ້ວ ຍັງ​ໄດ້​ສຸມ​ໃສ່​ກໍ່­ສ້າງ​ຕາ​ຝັ່ງ​ເຈື່ອນ​ຕາມ​ດອນ​ກາງ​ແມ່­ນ້ຳ​ຂອງ ເປັນ­ຕົ້ນ​ດອນ​ວັງ​ຄີ ຍາວ 4,5 ກິ­ໂລ­ແມັດ ສຳ­ເລັດ​ປີ 2019 ສືບ­ຕໍ່​ໂຄງ­ການ​ປ້ອງ​ກັນ​ຕາ­ຝັ່ງ​ເຈື່ອນ​ດອນ​ຊີງ​ຊູ້ ຍາວ 5,76 ກິ­ໂລ­ແມັດ ຈະ​ໃຫ້​ສຳ­ເລັດ​ປີ 2022 ນອກ​ນີ້ ລະ­ດູ­ຝົນ​ປີ 2020 ຍັງ​ໄດ້​ກະ­ກຽມ​ຄວາມ​ພ້ອມ​ຕ້ານ​ຖ້ວມ ມີ​ເຮືອນ​ກູ້​ຊີບ 2 ລຳ ຈັກ­ສູບ­ນ້ຳ​ເຄື່ອນ​ທີ່ 5 ເຄື່ອງ ສ້າງ​ລະ­ບົບ​ສູບ​ນ້ຳ​ຫ້ວຍ​ສີ​ຊົມ­ຊື່ນ ບ້ານ​ເກົ້າ​ລ້ຽວ ແລະ ລະ­ບົບ​ປະ­ຕູ​ນ້ຳ​ເຂດ​ວັດ​ຈັນ ທີ່​ໄດ້​ມີ​ການ​ສ້ອມ­ແປງ​ລະ­ບົບ​ລະ­ບາຍ​ນ້ຳ​ສຳ­ເລັດ ດ້ວຍ​ງົບ­ປະ­ມານ​ໄພ­ພິ­ບັດ​ປີ 2018.

ສຳ­ລັບ​ແຜນ​ຍຸດ​ທະ​ສາດ​ປ້ອງ​ກັນ​ຕາ­ຝັ່ງ​ເຈື່ອນ ໄດ້​ລົງ​ເກັບ​ກຳ​ຂໍ້​ມູນ​ທີ່​ຫຼໍ່​ແຫຼມ​ບ່ອນ​ທີ່​ມີ​ຄວາມ​ສ່ຽງ​ທີ່​ຈະ​ເຊາະ​ເຈື່ອນ 7 ຈຸດ ໃນ​ນີ້​ມີ 3 ດອນ​ກາງ­ຂອງ ຄື: ເຂດ​ສົ້ນ​ຂົວ​ສີ​ທອງ ບ້ານ​ໄຮ່​ປາກ​ງື່ມ ເຂດ​ບ້ານ​ຖິ່ນ​ແທ່ນ ບ້ານ​ຄວາຍ​ແດງ ເມືອງ​ຫາດ​ຊາຍ​ຟອງ ເຂດ​ບ້ານ​ຖິ່ນ​ເພຍ ເຂດ​ບ້ານ​ທ່າ​ເດື່ອ ເຂດ​ດອນ​ຈັນ​ເບື້ອງ​ນອກ ແລະ ດອນ​ກາງ­ຂອງ​ເມືອງ​ສັງ​ທອງ ກຳ­ລັງ​ລົງ​ສຳ​ຫຼວດ​ເກັບ​ກຳ​ຂໍ້​ມູນ ແລະ ດອນ​ໝາກ­ໂມ ເມືອງ​ສີ​ໂຄດ​ຕະ­ບອງ ຍາວ 6,5 ກິ­ໂລ­ແມັດ.

ທີ່ມາ, ວຽງຈັນໃໝ່: ຍຂ່າວ & ພາບ : ສົມ​ສະ­ຫວັນ